Samwele 2 4:1-12
4 Omu Ishe-mboshete+ mwanaSaulu* evwile ngwavo Avanele nafu kuHevelone,+ evwile namuvifuwa keke. Kaha vaIsalele vosena nawa valizuzukilile chikuma.
2 Jino kwapwile malunga vavali vaze vapwile tupitau twamazavu amwanaSaulu avaka-kunyemukila. Kapitau umwe apwile ikiye Mbana, kaha mukwavo apwile ikiye Lekave. Vapwile vana vaLimone wakuMbelote,+ wakumuyachi waMbenjamine. (Mbelote vayimwenenga kupwa ngalila yavaMbenjamine.
3 Vatu vamuMbelote vachinyinyine kuNgitayime,+ kaha vapwa vamwiza kuze palanga nakulelo lino.)
4 Jino Yonatane+ mwanaSaulu apwile namwana walunga uze atengukile mahinji.+ Lijina lyenyi ikiye Mefwivoshete. Utonji wenyi wamuwanyine ngane: Apwile namyaka yitanu omu mujimbu wakufwa chaSaulu naYonatane wejile kufuma kuYezelele.+ Jino omu vatambwile mujimbu kana, ndeji yenyi amumbachile nakuchina. Oloze omu apwile nakuchina, amuholwele, kaha Mefwivoshete+ atengukile.
5 Jino Lekave naMbana, vana vaLimone wakuMbelote vayile kuzuvo yaIshe-mboshete, kaha vakahetele kuze musana ndololo. Halwola kana Ishe-mboshete apwile nakunoka.
6 Vengilile muzuvo kwijiva nge vali nakuya nakumbata tiliku, kaha vamutuvile poko yamukwale hajimo. Kufumaho Lekave nandumbwenyi Mbana+ vachinyine.
7 Halwola vengilile muze muzuvo, vawanyine Ishe-mboshete nasavala hakahela mukapete kenyi kakusavala. Vamutuvile poko yamukwale nakumujiha, kaha vamutetele mutwe. Kufumaho vambachile mutwe wenyi, vatambukile ufuku wosena mujila yakuya kuAlava.
8 Kutwala muze, vatwalile uze mutwe waIshe-mboshete+ kuli Ndavichi kuHevelone. Vambile kuli mwangana Ndavichi ngwavo: “Tunakunehela mutwe waIshe-mboshete mwanamuka-kole wove Saulu+ uze asakilenga kukujiha.+ Yehova nalingila ove mwata wetu mwangana sambanjinga likumbi lyalelo. Nakulingila sambanjinga kuli Saulu navaka-tanga yenyi.”
9 Oloze Ndavichi ambile kuli Lekave nandumbwenyi Mbana, vana vaLimone wakuMbelote ngwenyi: “Omu ayoya Yehova tu, ou angupululwile* muluyando lwosena,+
10 manenu ngumilweze omu alingile mukwenu umwe. Ejile nakungulweza ngwenyi, ‘Saulu nafu,’+ hakushinganyeka ngwenyi ali nakungulweza mujimbu wamwaza. Oloze ngwamukwachile nakumujiha+ kuJikilange. Eyi yikiko yapwile fweto yenyi atambwile kuli ami.
11 Nyi ngachilihi enu vatu vavapi, enu munajihila mutu wakwoloka muzuvo yenyi, hakahela kenyi? Nangwihula manyinga enyi kumavoko enu+ nakuminongesa mufume hamavu.”
12 Ngocho Ndavichi alwezele vakweze jenyi vajihe malunga kana.+ Vavatetele mavoko namahinji, kaha mijimba yavo vayisukikile+ kuchijiva chamuHevelone. Oloze vambachile mutwe waIshe-mboshete, vaufunjile hafuka yaAvanele muHevelone.
