Samwele 2 5:1-25
5 Kutwala muze vatu vakumiyachi yavaIsalele yosena vejile kuli Ndavichi kuHevelone,+ vamwambile ngwavo: “Tala! Etu twapwa tuvausoko wove vahalinyinga.+
2 Kunyima omu Saulu apwile mwangana wetu, ove yove wapwile nakutwaminyina vaIsalele kujijita.*+ Yehova ambile kuli ove ngwenyi, ‘Naukafunganga vatu jami vaIsalele, kaha naukapwa utwamina yavo.’”+
3 Shikaho, vakulwane javaIsalele vosena vejile kuli mwangana kuHevelone, kaha Mwangana Ndavichi alikashile navo chivwasano+ kumeso aYehova. Kufumaho, vamuwavishile apwenga mwangana wavaIsalele.+
4 Ndavichi apwile namyaka yakusemuka 30 omu vamuswanyishile hawangana, kaha ayulile myaka 40.+
5 Ayulile vaYuta muHevelone hamyaka 7 natukweji 6, kaha ayulile vaIsalele navaYuta vosena muYelusalema+ hamyaka 33.
6 Jino mwangana navatu jenyi vayile kuYelusalema mangana vakalwe jita navaYevuse+ vaze vatwaminenga mungalila kana. Oloze vaYevuse vahulamishile Ndavichi ngwavo: “Ove kaweshi kahasa kwiza kunoko. Ove vanahase kukuhanga nakuli tupuputa navitonji.” Vambilenga mumichima yavo ngwavo, ‘Ndavichi keshi kahasa kwiza kunoko.’+
7 Oloze Ndavichi atambwile nganda yakukola yaZeyone yize vavulukilenga jino ngwavo Nganda yaNdavichi.+
8 Ngocho Ndavichi ambile halikumbi lize ngwenyi: “Vaze navaya nakulukuka vaYevuse vahichile mutupila vameya mangana vajihe vitonji natupuputa mwomwo ami Ndavichi ngwavahunga.” Shikaho vambila ngwavo: “Tupuputa navitonji kaveshi kukengila muzuvoko.”
9 Kufumaho Ndavichi atwaminenga jino munganda kaneyi yakukola, kaha vayivulukilenga ngwavo Nganda yaNdavichi. Aputukile kutunga jikembwe najizuvo kuMulundu*+ nakuvihela vyeka munganda.+
10 Ngocho Ndavichi azaminenga lika,+ kaha Yehova Kalunga wamayongomena apwilenga naikiye.+
11 Hilame+ mwangana waTule atumine valuwa kuli Ndavichi. Amutuminyine nawa vitondo vyamushitale,+ navaka-kusonga, navaka-kwola malolwa akutungisa jikembwe, kaha vaputukile kutungila Ndavichi zuvo.*+
12 Ngocho Ndavichi atachikijile jino ngwenyi Yehova namuzamisa kupwa mwangana wavaIsalele,+ kaha nawa nazezula wangana wenyi+ mwomwo yavatu jenyi vaIsalele.+
13 Ndavichi ambachile mapwevo natulumbu twamasano+ vakwavo muYelusalema omu afumine kuHevelone. Kaha asemene cheka vana vamalunga navava vamapwevo.+
14 Ava vakiko vana vaze Ndavichi asemenene muYelusalema: Shamuwa, naShovave, naNatane,+ naSolomone,+
15 naIvihale, naElishuwa, naNefwenge, naYafwiya,
16 naElishama, naEliyata, naElifwelete.
17 Omu vaFwilishite vevwile ngwavo Ndavichi vanamuwavisa kupwa mwangana wavaIsalele,+ vaFwilishite vosena vejile nakumutondatonda.+ Kahomu Ndavichi evwile mujimbu kana, achinyinyine kuchihela chachikalu kuheta.+
18 Kaha vaFwilishite vejile, valitanjikile muChinema* chaLefwaime.+
19 Jino Ndavichi ehwile Yehova+ ngwenyi: “Uno nguyenga nakulwa jita navaFwilishite tahi? Kutala naunguhanavo mulivoko lyami nyi?” Yehova amukumbulwile ngwenyi: “Yakonga, nangukuhanavo mulivoko lyove.”+
20 Ngocho Ndavichi ayile kuMbale-pelajime, ajihile vaFwilishite kuze. Kaha ambile ngwenyi: “Yehova nalivange kulutwe lwami kwijiva nge muta walivaji, kaha nanongesa vaka-kole jami.”+ Shikaho alukilile chize chihela ngwenyi Mbale-pelajime.*+
21 VaFwilishite vasezele makombelo avo kuze, kaha Ndavichi navatu jenyi vawambachile nakuya nawo.
22 Kutwala muze vaFwilishite vejile cheka, valitanjikile muChinema* chaLefwaime.+
23 Ndavichi ehwile Yehova, oloze amwambile ngwenyi: “Kanda nauvejilila kulutweko. Vahichile kunyima mangana ufuminyine kuviputa vyambeka uvalukuke.
24 Kahomu nawivwa chivumo chajishindo helu lyaviputa kana, kanda naulangisa kuvalukukako mwomwo Yehova natetekela kulutwe lwove mangana ajihe maswalale javaFwilishite.”
25 Ngocho Ndavichi alingile nge muze amulwezele Yehova, kaha ajihile vaFwilishite+ kufuma kuNgeva+ swi nakuNgezele.+
Kwinyikila Chamwishi
^ Hepe., “ove yove wavalowelenga vaIsalele nakuvengisengisa cheka.”
^ Chipwe “kuMilo.” Milo hilizu lyachiHepeleu lyalumbununa “kuzala.”
^ Chipwe “nganda.”
^ Chipwe “muChana.”
^ Ulumbunwiso, “Mwata Wakupuzwojola.”
^ Chipwe “muChana.”
