Samwele 2 6:1-23
6 Ndavichi akungulwile cheka maswalale vangolo vamuIsalele vosena. Vapwile malunga 30,000.
2 Kufumaho Ndavichi navava malunga apwile navo vosena vayile kuMbale-yuta mangana vakambate Chikasha chaKalunga wamuchano.+ KuChikasha kana kukiko vatu vasanyikililenga halijina lyaYehova wamayongomena,+ uze atwama halitanda helu* lyavakeluve.+
3 Oloze Chikasha chaKalunga wamuchano vachimbachilile mulitemba lyalihya+ kufuma kuzuvo yaAvinatave+ yize yapwililile hapili. Kaha Uza naAhiyo vana vaAvinatave vakiko vatambukishile lize litemba.
4 Ngocho vafumishile Chikasha chaKalunga wamuchano kuzuvo yaAvinatave hapili nakuya. Kaha Ahiyo atetekelele kulutwe lwachize Chikasha.
5 Ndavichi navaze vakuzuvo yaIsalele vosena vapwile nakukina nakwimba kumeso aYehova navisaji vyakulisezaseza vyaminjunyipe, natulyalya, navisaji vyeka vyamikole,+ natungoma,+ najiwawa, najingunga.+
6 Oloze omu vahetele kuchizungwilo chaNakone, vangombe vasakile kuholola Chikasha chaKalunga wamuchano, ngocho Uza olwele livoko lyenyi nakuchikwachilila.+
7 Jino Yehova akwachilile Uza utenu, kaha amuvetele+ hakazamuzamu kenyi.+ Ngocho afwililile kwakuze vene kuChikasha chaKalunga wamuchano.
8 Oloze Ndavichi apihililile hakuwana nge Yehova azangamishile Uza. Ngocho chihela kana vachivuluka ngwavo Peleze-uza* palanga nakulelo lino.
9 Shikaho Ndavichi evwile Yehova+ woma, ambile ngwenyi: “Kahaze Chikasha chaYehova nachiya ngachilihi kuzuvo yami?”+
10 Ndavichi kasakile jino Chikasha chaYehova vachinehe muNganda yaNdavichi muze apwileko.+ Oloze alwezele vatu vachitwale kuzuvo yaOvete-etome+ wakuNgata.
11 Chikasha chaYehova chatwamine kuzuvo yaOvete-etome wakuNgata tukweji vatatu. Kaha Yehova akiswilenga Ovete-etome navaze vakuzuvo yenyi vosena.+
12 Kutwala muze, Mwangana Ndavichi vamulwezele ngwavo: “Yehova nakisula vaze vakuzuvo yaOvete-etome navyuma vyenyi vyosena mwomwo yaChikasha chaKalunga wamuchano.” Ngocho Ndavichi ayile nakumbata Chikasha chaKalunga wamuchano kuzuvo yaOvete-etome, achinehele muNganda yaNdavichi oku nawahilila.+
13 Omu vaka-kumbata+ Chikasha chaYehova vatambukile jitambo 6, hahaze vene Ndavichi ajihile ngombe wakuji nachimuna weka wakununa.
14 Ndavichi akinyine chikuma kumeso aYehova. Halwola kanelu, avwalile lipunu.+
15 Ndavichi navaze vakuzuvo yaIsalele vosena vanehele Chikasha+ chaYehova oku vali nakulikuwa+ nakwimba jineta.+
16 Oloze omu Chikasha chaYehova chahetele muNganda yaNdavichi, Mikale+ mwanaSaulu atalile munjanena, kaha amwene Mwangana Ndavichi ali nakusambwojoka nakukina kumeso aYehova. Ngocho amulumbilishile mumuchima wenyi.+
17 Jino vanehele chize Chikasha chaYehova, kaha vachihakile muchihela chacho mumbalaka yize achijikilile Ndavichi.+ Kufumaho, Ndavichi ahanyine mawana akulumba+ namawana akusolola kuunda+ kumeso aYehova.+
18 Omu Ndavichi akumishile kuhana mawana akulumba namawana akusolola kuunda, akiswile vatu mulijina lyaYehova wamayongomena.
19 Kaha nawa ambachile jimbolo jamujingulule, navindanda vyamihako yamukoma, navindanda vyamihako yamivinyo yaumu, avipangilile vatu vosena, liyongomena lyosena lyavaIsalele, malunga namapwevo. Kufumaho vatu vosena vayile kujizuvo javo.
20 Omu Ndavichi ayile mangana akisule vaze vakuzuvo yenyi, Mikale+ mwanaSaulu alovokele nakumusesa. Ambile ngwenyi: “Ocho kusauka kana nasauka mwangana wavaIsalele likumbi lyalelo omu alizulanga kumeso avandungo vamapwevo vavangamba jenyi! Asolokanga nge hichileya uze eji kulizulanga mukachi kavatu.”+
21 Ngocho Ndavichi ambile kuli Mikale ngwenyi: “Ami ngwapwanga nakukina nakusambwojoka kumeso aYehova ou angusakwile ami mukutela kusakula iso navaze vakuzuvo yenyi vosena, ou nawa angutongwele ngupwenga ngutwamina yavatu jaYehova vaIsalele.+ Shikaho, nangukina nakusambwojoka kumeso aYehova.
22 Kaha nawa nangulisawisa lika kuhambakana aha nakulinyisa chikuma. Oloze vandungo vamapwevo vaze unavuluka navanguvumbika.”
23 Kufuma halwola kana, Mikale+ mwanaSaulu kasemene mwana numba umweko palanga nakukufwa chenyi.