Samwele 2 7:1-29
7 Omu mwangana atwaminenga jino kanawa muzuvo* yenyi,+ nomu nawa Yehova amulingishile atwame mukuunda chakuzeneka kumuzungisa kuli vaka-kole jenyi vosena vaze vamujingilikile,
2 ambile kuli kapolofweto Natane+ ngwenyi: “Tala, ami nguli nakutwama muzuvo yakutunga namishitale,+ oloze Chikasha chaKalunga wamuchano chili nakutwama mumbalaka.”+
3 Kaha Natane ambile kuli mwangana ngwenyi: “Yakonga ulinge vyeshovyo vili kumuchima wove, mwomwo Yehova ali nayove.”+
4 Haufuku vene uze, Yehova ahanjikile kuli Natane ngwenyi:
5 “Yakonga ulweze ngamba yami Ndavichi ngwove, ‘Yehova nambe ngwenyi: “Kutala watela kungutungila zuvo ngutwamengamo nyi?+
6 Ami kanda ngutwamengaho lyehi muzuvo kufuma vene halikumbi ngwalowele vaIsalele muEjipitu palanga nakulikumbi lyalelo.+ Ngunanungwojokanga* mujimbalaka namujitavanaku.+
7 Myaka yoseneyi ngunatambukanga navaIsalele,* kutala ngwalwezaho lyehi vatwamina vamiyachi yavaIsalele vaze ngwatongwele vafungenga vatu jami vaIsalele ngwami, ‘Ika munazenekela kungutungila zuvo yamishitale nyi?’”’
8 Shikaho lweza ngamba yami Ndavichi ngwove, ‘Yehova wamayongomena nambe ngwenyi: “Ngwakufumishile kuulilo wavimuna, ngwakufumishile kumulimo wakulama mikoko+ mangana upwenga utwamina yavatu jami vaIsalele.+
9 Kaha nangupwanga nayove kweshokwo nauyanga.+ Nangunongesa nawa vaka-kole jove vosena vafume kumeso ove.+ Nangufumakanyisa lijina lyove+ nganomu afumakana majina avatu vavalemu vatwama hamavu.
10 Nangusakwila vatu jami vaIsalele chihela mangana vatwamengamo. Navatwamangamo chakuzeneka kwivwa woma. Vatu vavapi kaveshi kukavayanjisa chekako nganomu vanapunga nakulinga kunyima,+
11 kufuma halikumbi ngwatongwele vaka-kuyula+ mangana vayulenga vatu jami vaIsalele. Nangukulingisa utwame mukuunda chakuzeneka kukuzungisa kuli vaka-kole jove vosena.+
“‘“Yehova nakulweze nawa ngwenyi Yehova mwakuhana chisaka chawangana.+
12 Omu naukatoka+ ngana mwavakakuluka jove, nangukatongola muka-tanga* yove, mwanove* mangana akakuswane. Kaha nangukazamisa wangana wenyi.+
13 Ikiye mwakatunga zuvo yize navavulukilanga lijina lyami.+ Nangukazamisa nawa litanda lyawangana wenyi haya myaka yosena.+
14 Nangukapwanga nguise, kaha ikiye mwakapwanga mwanami.+ Kachi nge mwakahengesa, nangukamuzangamisa nachitondo chavatu veka nakumuveta vikote vyavana vavatu.+
15 Nangukamusolwelanga lika zangi yami yakwilila, keshi nge muze ngwalingile kuli Saulu+ uze ngwakanyine kumeso oveko.
16 Chisaka chove nawangana wove navipwanga vyakukingiwa haya myaka yosena. Litanda lyove nalizamanga haya myaka yosena.”’”+
17 Natane alwezele Ndavichi mazu osenawa navyuma vyosena amwene muchakumumwenesa.+
18 Ngocho Mwangana Ndavichi ejile, atwamine kumeso aYehova, ambile ngwenyi: “Ove Mwata Wakulitulaho Yehova, ami yami iyaze? Chisaka chami kachatelemo kuchilingila vyuma vyosenevi unachilingilako.+
19 Ove Mwata Wakulitulaho Yehova, kawakuminyine hakungulingila vyuma kanevi kahako, oloze unahanjika nawa vyuma naukalingila chisaka chayami ngamba yove kulutwe. Ove Mwata Wakulitulaho Yehova, elu lukiko lushimbi navakakavangizanga vatu vosena.
20 Ove Mwata Wakulitulaho Yehova, vyuma vyeka mukaze nanguhanjika kuli ove ami ngamba yove? Ove wangutachikiza kanawa.+
21 Unalingi vyuma vyosenevi vyavinene nakuvisolola kuli ami ngamba yove kweseka nomu mwaya mazu ove, kaha nawa mukiko mwaya muchima wove.+
22 Ove Mwata Wakulitulaho Yehova, shikaho wapwila uwamunene chikuma.+ Kakweshi Kalunga weka apwa nge oveko,+ kaha nawa kakweshi Kalunga wekako shina yove kaha.+ Vyuma vyosena twevwa vyasolola hatoma chishina kanechi.
23 Kakweshi muyachi weka uze walifwana namuyachi wavatu jove vaIsaleleko.+ Ove Kalunga, wavasokwele mangana vapwenga vatu jove.+ Wafumakanyishile lijina lyove+ hakuvalingila vyuma vyavinene, vyakwivwisa woma.+ Wahangile vaka-mafuchi eka natulunga twavo mwomwo yavatu jove vaze wasokwele muEjipitu.
24 Wazamishile vatu jove vaIsalele mangana vapwenganga lika vatu jove haya myaka yosena.+ Ove Yehova, ove wapwa uKalunga kavo.+
25 “Ove Yehova Kalunga, lushiko unangushiki ami ngamba yove nachisaka chami ulutesemo haya myaka yosena. Kaha ulinga kweseka nomu unashiki.+
26 Lijina lyove valizezulenga haya myaka yosena,+ mangana vatu vahanjikenga ngwavo, ‘Yehova wamayongomena ikiye Kalunga kaIsalele.’ Chisaka chayami ngamba yove Ndavichi chizamenga lika kumeso ove.+
27 Mwomwo ove Yehova wamayongomena, Kalunga kaIsalele, ove unangulweze ami ngamba yove vyuma navikasoloka kulutwe ngwove, ‘Nangukuhana chisaka chawangana.’+ Echi chikiko chinangulingisa ngumike* nakulomba kuli ove ngana.
28 Shikaho, ove Mwata Wakulitulaho Yehova, ove wapwa uKalunga wamuchano, kaha mazu ove apwa muchano.+ Ami ngamba yove unangushiki vyumevi vyamwaza.
29 Ngocho fwila kukisula chisaka chayami ngamba yove, kaha chipwengangako lika haya myaka yosena.+ Mwomwo ove Mwata Wakulitulaho Yehova, ove unashiki lushiko, ngocho chisaka chayami ngamba yove uchikisulenga haya myaka yosena.”+
Kwinyikila Chamwishi
^ Chipwe “munganda.”
^ Hepe., “Ngunatambwojokanga.”
^ Hepe., “navana vaIsalele.”
^ Hepe., “mbuto.”
^ Hepe., “mwanove wakulovoka mujimo lyove.”
^ Hepe., “chinangulingisa nguwane muchima.”
