Samwele 2 8:1-18
8 Kutwala muze, Ndavichi afungulwile vaFwilishite.+ Kaha atambwile nganda yaMetenge-yama yize yapwile mumavoko avaFwilishite.
2 Afungulwile nawa vaMowave,+ kaha avasavalikile hamavu mumukana umwe nakuvapima namukole. Avapimine muvimbwa vitatu, vimbwa vivali avijihile, kaha chimbwa chimwe achisezeleho.+ Ngocho vaMowave vapwile jino vangamba jaNdavichi, kaha vamunehelelenga milambu.+
3 Ndavichi afungulwile nawa Hatatezele mwanaLehove mwangana waZova+ omu Hatatezele apwile nakuya nakuzamisa cheka wangana wenyi kuKalwiji Yufwalate.+
4 Ndavichi amutambwile vaka-kutambukila hatuvalu 1,700, namaswalale vakutambuka hamavu 20,000. Kufumaho atengwile tuvalu vakumatemba vosena, oloze asezeleho kaha tuvalu 100.+
5 Omu vaSulya vakuNdamashiku+ vejile nakukafwa Hatatezele mwangana waZova, Ndavichi ajihile vaSulya 22,000.+
6 Kufumaho, Ndavichi ahakile maswalale jenyi muNdamashiku, muSulya. Ngocho vaSulya vapwile jino vangamba jaNdavichi, kaha vamunehelelenga milambu. Yehova akafwilenga Ndavichi afungululenga kweshokwo ayilenga.+
7 Ndavichi atambwile nawa jikepwe jamujingulule jaulu kuvangamba jaHatatezele, kaha ayile najo kuYelusalema.+
8 Mwangana Ndavichi atambwile nawa unengu wauvulu chikuma munganda yaMbeta naMbelotai, jize japwile jinganda jaHatatezele.
9 Jino Toi mwangana waHamate+ evwile ngwavo Ndavichi nafungulula maswalale jaHatatezele+ vosena.
10 Ngocho Toi atumine mwanenyi Yolame ayenga kuli Mwangana Ndavichi mangana akamumeneke nakumusakwilila hakulwa jita naHatatezele nakumufungulula. (Mwomwo Hatatezele alwilenga chikuma jita naToi). Amutwalilile vyuma vyapalata, navyevi vyaulu, navyevi vyaunengu.
11 Mwangana Ndavichi ajilikile vyuma vyosenevi kupwa vyaYehova, nge omu ajilikile palata naulu atambwile kuli vaka-mafuchi eka vosena vaze afungulwile,+
12 kuli vaSulya, navaMowave,+ navaAmone, navaFwilishite,+ navaAmaleke,+ nakuvyuma vize apupile kuli Hatatezele+ mwanaLehove mwangana waZova.
13 Ndavichi ayile chikuma puho omu akindulukile kufuma kuChinema chaMungwa+ kuze akajihile vaEtome 18,000.
14 Ahakile maswalale muEtome. Mulifuchi mwosena mwapwile maswalale jenyi. Kaha vaEtome vosena vapwile jino vangamba jaNdavichi.+ Yehova akafwilenga Ndavichi afungululenga kweshokwo ayilenga.+
15 Ndavichi ayulilenga vaIsalele vosena.+ Ayulilenga vatu vosena+ mwachiyulo, mwakwoloka.+
16 Yowave+ mwanaZeluwiya ikiye apwile kapitau kamaswalale. Yehoshafwate+ mwanaAhilute ikiye apwile muka-kulama mijimbu yawangana.
17 Zatoke+ mwanaAhituve naAhimeleke mwanaAviyatale vakiko vapwile vapilishitu, kaha Selaya ikiye apwile muka-kusoneka.
18 Mbenaya+ mwanaYehoyata ikiye apwile mwata wavaKelete navaPelete.+ Kaha vana vaNdavichi vamalunga vakiko vapwile vangambela.*
Kwinyikila Chamwishi
^ Hepe., “vapilishitu.”