Samwele 2 9:1-13
-
Ndavichi mwasolwela Mefwivoshete zangi yakwilila (1-13)
9 Jino Ndavichi ambile ngwenyi: “Kutala kuli vaze vakuzuvo yaSaulu kunasale mutu umwe mangana ngumusolwele zangi yakwilila mwomwo yaYonatane nyi?”+
2 Kuli vaze vakuzuvo yaSaulu kwapwile ngamba umwe, lijina lyenyi apwile ikiye Jiva.+ Ngocho vamulwezele ayenga kuli Ndavichi, kaha mwangana Ndavichi amwihwile ngwenyi: “Ove yove Jiva tahi?” Ikiye amukumbulwile ngwenyi: “Eyo, yami vene ngamba yove.”
3 Mwangana amwihwile cheka ngwenyi: “Kutala kuli vaze vakuzuvo yaSaulu kunasale mutu umwe mangana ngumusolwele zangi yaKalunga yakwilila nyi?” Jiva amukumbulwile ngwenyi: “Kunasale mwanaYonatane umwe walunga. Mwana kana atenguka mahinji osena avali.”+
4 Mwangana amwihwile ngwenyi: “Ali kulihi?” Jiva amukumbulwile ngwenyi: “Ali kuzuvo yaMakile+ mwanaAmiyele kuLo-ndevale.”
5 Hahaze vene, Mwangana Ndavichi atumine vatu mangana vakasake Mefwivoshete kuzuvo yaMakile mwanaAmiyele kuLo-ndevale.
6 Omu Mefwivoshete mwanaYonatane, Yonatane mwanaSaulu, ahetele kuli Ndavichi, hahaze vene afukamine chameso hamavu nakulifukula. Kaha Ndavichi ambile ngwenyi: “Ove Mefwivoshete!” Ikiye ambile ngwenyi: “Yami uno mwane ami ngamba yove.”
7 Ndavichi ambile kuli ikiye ngwenyi: “Kanda nawivwa womako. Nangukusolwela zangi yakwilila+ mwomwo yaiso Yonatane, kaha nangukukindulwishila mavu akaka yove Saulu osena. Kahove naulilanga vyakulya* kumesa yami lwola lwosena.”+
8 Ngocho Mefwivoshete alifukwile cheka, ambile ngwenyi: “Ami ngamba yove yami iyaze numba unguhake muchima* ngana, ami kawa wakufwa+ lyehi?”
9 Jino mwangana asanyikile Jiva, uze apwile muka-kukafwa Saulu, amwambile ngwenyi: “Vyuma vyamwata wove Saulu vyosena navize vyavaze vakuzuvo yenyi ngunavihane muzukulyenyi.+
10 Ove navana vove, navangamba jove namumuliminanga mavu kana nakumwahila jimbuto mangana vaze vakuzuvo yamuzukulu lyamwata wove valyenganga. Oloze Mefwivoshete, muzukulu lyamwata wove mwalilanga vyakulya kumesa yami lwola lwosena.”+
Jino Jiva apwile navana vamalunga 15, navangamba 20.+
11 Jiva ambile kuli mwangana ngwenyi: “Ami ngamba yove nangulinga vyuma vyosena unangulweze ove mwata wami mwangana.” Ngocho Mefwivoshete alilililenga vyakulya kumesa yaNdavichi kwijiva nge himwanamwangana.
12 Jino Mefwivoshete apwile namwana walunga wamundende, lijina lyenyi apwile Mika.+ Vatu vosena vaze vatwaminenga muzuvo yaJiva vapwile jino vangamba jaMefwivoshete.
13 Mefwivoshete atwaminenga muYelusalema, mwomwo alilililenga vyakulya kumesa yamwangana.+ Mefwivoshete atengukile mahinji osena avali.+
