Vaka-kuyula 1:1-36
1 Omu alingile Yoshuwa+ hanafu lyehi, vaIsalele* vahulishile Yehova+ ngwavo: “Veya hali etu navalivanga kuya nakulwa jita navaKanane?”
2 Yehova akumbulwile ngwenyi: “VaYuta vakiko navalivanga.+ Nanguvahana* lifuchi mumavoko avo.”
3 Jino vaYuta vambile kuli vandumbwavo vaShimeyone ngwavo: “Twayenu kuno kungalila yetu+ mangana tuyenga hamwe nakulwa jita navaKanane, kahetu nawa natukaya hamwe nayenu kungalila yenu nakumikafwako.” Ngocho vaShimeyone vayile hamwe navandumbwavo.
4 VaYuta vayile kujita, kaha Yehova ahanyine vaKanane navaPeliji mumavoko avo.+ Vafungulwile malunga 10,000 kuMbezeke.
5 Kahomu vawanyine Atonyi-mbezeke kuMbezeke, valwile nenyi jita nakufungulula vaKanane+ navaPeliji.+
6 Atonyi-mbezeke achinyine, oloze vamuhangasanyine nakumukwata, kaha vamuvatwile minwe yashina yakumavoko nayeyi yakumahinji.
7 Jino Atonyi-mbezeke ambile ngwenyi: “Ngunatetenga minwe yashina yakumavoko nayeyi yakumahinji yavamyangana 70 vaze vali nakunonojola vyakulya mwishi yamesa yami. Ngocho Kalunga nangushishishilamo vyuma evi ngunalinginga.” Atonyi-mbezeke vamutwalile kuYelusalema+ kukiko akafwililile.
8 Jino malunga vavaYuta valukukile Yelusalema,+ kaha vayitambwile. Vajihile vatu najipoko jamikwale, kaha vochele nganda yavo nakakahya.
9 Kufumaho malunga vavaYuta vayile nakulwa jita navaKanane vaze vatwaminenga kungalila yajipili, nakuNengeve, nakuShefwela.+
10 VaYuta vanyemukilile vaKanane vaze vatwaminenga kuHevelone (hakavanga Hevelone vayivulukilenga ngwavo Kilyate-alava), kaha vajihile Sheshai, naAhimane, naTalamai.+
11 Kufumaho valwile jita navatu vakuNdevile.+ (Hakavanga Ndevile vayivulukilenga ngwavo Kilyate-sefwele.)+
12 Jino Kaleve+ ambile ngwenyi: “Weshowo mwalukuka Kilyate-sefwele nakuyitambula, nangumuhana mwanami Akasa kupwa pwevo lyenyi.”+
13 Ngocho Otonyele+ mwanaKenaze,+ songo yaKaleve walunga ayilukukile nakuyitambula. Kaha Kaleve amuhanyine mwanenyi Akasa kupwa pwevo lyenyi.
14 Omu Akasa apwile nakuya kuzuvo yalunga lyenyi, alwezele lunga lyenyi alombe mavu kuli isewenu. Akasa asulukile hachimbulu chenyi,* kaha ise Kaleve ahulishile mwanenyi ngwenyi: “Uli nakusaka ika?”
15 Ikiye ambile ngwenyi: “Ngukisule, nguhane naNgolate-mayime* nawa, mwomwo unanguhane musuka wamavu kusulo.”* Ngocho Kaleve amuhanyine Ngolate yaKutunda, naNgolate yaKuchikulo.
16 Jino vana vayauze kaKene,+ isewenu yaMose,+ vafumine kunganda yamikoma+ navaYuta hamwe, vayile mupambo yaYuta yize yapwila kusulo yaAlate.+ Kaha vakatwaminenga kuze navatu vamungalila kana.+
17 VaYuta navandumbwavo vaShimeyone vayile nakulwa jita navaKanane vaze vatwaminenga kuZefwate, vanongesele nganda yavo ndolokoto.+ Kaha vayilukile ngwavo Holoma.*+
18 Jino vaYuta vatambwile Ngaza+ nangalila yayo, naAshakelone+ nangalila yayo, naEkelone+ nangalila yayo.
19 Yehova apwilenga lika navaYuta, kaha vahetele ngalila yajipili, oloze kavahashile kuhanga vatu vaze vatwaminenga kuchanako, mwomwo vapwilenga namatemba ajita aze akwechi jipoko jamikwale kutufumbo twawo.*+
20 Kaleve vamuhanyine Hevelone ngana muze ashikile Mose,+ kaha ahangile vana vaAnake+ vatatu kuze.
21 Oloze vaMbenjamine kavahashile kuhanga vaYevuse vaze vatwaminenga muYelusalemako. Ngocho vaYevuse vanatwamenga navaMbenjamine muYelusalema palanga nakulelo.+
22 Jino vaze vakuzuvo yaYosefwe+ navakiko vayile vakalukuke Mbetele, kaha Yehova apwile navo.+
23 Ngocho vatumine vandoji vayenga nakusondwesa Mbetele (hakavanga Mbetele vayivulukilenga ngwavo Luze).+
24 Vaze vandoji vawanyine lunga umwe ali nakufuma munganda kana. Kaha vambile kuli ikiye ngwavo: “Tulweze jila yakwingila munganda, kaha natukakusolwela likoji.”
25 Uze lunga avalwezele jila yakwingila munganda, kaha vayilukukile nakujiha vatu vosena najipoko jamikwale. Oloze uze lunga navaka-tanga yenyi vosena vavechele vayenga.+
26 Uze lunga ayile kulifuchi lyavaHete, kaha akatungile nganda nakuyiluka ngwenyi Luze. Eli likiko lijina lyayo nakulelo lino.
27 VaManase kavatambwile Mbete-sheyane najimbongi jajingilikileko, naTanake+ najimbongi jajingilikileko, naNdole najimbongi jajingilikileko, naIviliyame najimbongi jajingilikileko, naMengito najimbongi jajingilikileko.+ VaKanane vakakachilile kutwama mulifuchi lize.
28 Omu vaIsalele vakwachile ngolo, kavahangile vaKanane vosenako,+ oloze vavazachishilenga milimo yaundungo.+
29 VaEfwalime navakiko kavahangile vaKanane vaze vatwaminenga muNgezeleko. VaKanane vatwaminenga lika navo muNgezele.+
30 VaZevulune kavahangile vaKanane vaze vatwaminenga kuKichilone nakuNahaloleko.+ VaKanane vatwaminenga hamwe navo, kaha vavazachishilenga milimo yaundungo.+
31 VaAshele kavahangile vaKanane vaze vatwaminenga kuAkoko, nakuShitone,+ nakuAhalave, nakuAkajive,+ nakuHeleva, nakuAfwike,+ nakuLehoveko.+
32 Ngocho vaAshele vatwaminenga lika navaKanane hamwe, mwomwo kavavahangilemoko.
33 VaNafwatale kavahangile vaKanane vaze vatwaminenga kuMbete-shemeshe, nakuMbete-anateko,+ oloze vatwaminenga lika navo hamwe.+ Vatu vakuMbete-shemeshe nakuMbete-anate vavazachishilenga milimo yaundungo.
34 VaAmole vahangilile vana vaNdane kungalila yajipili, kaha kavavetavishile kuya kuchanako.+
35 VaAmole vatwaminenga lika kuPili yaHelese, nakuAiyalone,+ nakuShalavime.+ Oloze vaze vakuzuvo yaYosefwe omu vakwachile ngolo, vazachishilenga vaAmole milimo yaundungo.
36 Ngiza yangalila yavaAmole yaputukilile kumukandu waAkalavime,+ kaha yaputukilile nawa kuSela nakukanduka kumilundu.
Kwinyikila Chamwishi
^ Hepe., “vana vaIsalele.”
^ Chipwe “Ngunavahane.”
^ Chipwe pamo, “alingile mumavoko enyi pu oku ali hachimbulu chenyi.”
^ Ulumbunwiso, “Vijiva vyaMeya.”
^ Chipwe “kuNengeve.”
^ Ulumbunwiso, “Chuma Chakutela Kunonga.”
^ Hepe., “vapwilenga namatemba afwelu.”
