Vaka-kuyula 10:1-18
10 Omu afwile Avimeleke, mwashishile Tola, lunga wakaIsakale uze ayowele vaIsalele.+ Tola apwile mwanaPuwa, Puwa mwanaNdoto. Atwaminenga kuShamile, kungalila yajipili yavaEfwalime.
2 Tola ayulile vaIsalele myaka 23. Kaha afwile, ngocho vamufunjile kuShamile.
3 Omu afwile Tola, mwashishile Yaile kaNgileyate, kaha ayulile vaIsalele myaka 22.
4 Yaile apwile navana vamalunga 30, kaha vatambukilenga havimbulu 30. Vapwile nawa najinganda 30 jize vavuluka nakulelo ngwavo Havote-yaile.+ Eji jinganda jatwama mungalila yaNgileyate.
5 Kutwala muze Yaile afwile, kaha vamufunjile kuKamone.
6 Jino vaIsalele vaputukile cheka kulinga vyuma vyavipi kumeso aYehova,+ vazachililenga vaMbale,+ navaAshatolete, natulunga vakuAlame,* navava vakuShitone, navava vakuMowave,+ natulunga vavaAmone,+ navava vavaFwilishite.+ VaIsalele vamusezele Yehova, kavamuzachililengako.
7 Ngocho Yehova akwachilile vaIsalele utenu, kaha avahanyine mumavoko avaFwilishite navaAmone.+
8 Kaha vashinyinyikile vaIsalele nakuvayanjisa mumwaka uze. Vayanjishilenga vaIsalele vosena vaze vapwile kumututuko waYotau mulifuchi lyavaAmole muNgileyate hamyaka 18.
9 VaAmone vazaukilenga Yotau nakuya nakulwa jita navaYuta, navaMbenjamine navaEfwalime, ngocho vaIsalele vavayanjishilenga chikuma.
10 VaIsalele vatwile kawelele kuli Yehova,+ vambile ngwavo: “Tunalingi shili kumeso ove, mwomwo tunakuseze ove Kalunga ketu nakuzachila vaMbale.”+
11 Oloze Yehova ambile kuli vaIsalele ngwenyi: “Uno kangwamilwilile mumavoko avaEjipitu,+ navaAmole,+ navaAmone, navaFwilishite,+
12 navaShitone, navaAmaleke, navaMichane omu vamiyanjishilengako tahi? Omu mwatwile kawelele kuli ami, ngwamilwilile mumavoko avo.
13 Oloze enu mwangusezele nakuzachila tulunga veka.+ Shikaho kangweshi kumilwila chekako.+
14 Yenu mukatwe kawelele kutulunga munazachilanga,+ kaha vamilwile mulwola muli nakumona vihuli.”+
15 Oloze vaIsalele vambile kuli Yehova ngwavo: “Tunalingi shili. Tulinge mweshomwo munawahe kumeso ove. Tulwile likumbi lyalelo.”
16 Vambilile tulunga veka vaze vazachililenga, nakuputuka kuzachila Yehova,+ ngocho Kalunga kechelelele vaIsalele vayande likako.+
17 Kufumaho vaAmone+ valikungulwile hamwe, kaha vakatungile chilombo chavo kuNgileyate. NavaIsalele nawa valikungulwile hamwe nakutunga chilombo chavo kuMijipa.
18 Jino vatu navilolo vakuNgileyate valihanjikishile mwavomwavo ngwavo: “Iya mwatutwaminyina tuyenga nakulwa jita navaAmone?+ Mutu kana mwakapwa mwata wavaka-Ngileyate vosena.”
Kwinyikila Chamwishi
^ Chipwe “vakuSulya.”