Vaka-kuyula 11:1-40
11 Yefweta+ kaNgileyate, apwile muka-kwasa jita wangolo. Naye apwile muka-ujila, kaha ise apwile Ngileyate.
2 Pwevo uze ambachile Ngileyate naikiye asemene vana vamalunga. Omu vakolele ava vana, vahangile Yefweta nakumwamba ngwavo: “Ove kaweshi nauswana muzuvo yatatako, mwomwo unapu umwana wapwevo weka.”
3 Ngocho Yefweta achinyine vandumbwenyi, ayile nakutwama kulifuchi lyaTove. Jino kuli Yefweta kwejilenga malunga vaze vazenekele milimo, kaha ayilenga navo nakulukuka vaka-kole.
4 Kutwala muze vaAmone vaputukile kulwa jita navaIsalele.+
5 Omu vaAmone valwile jita navaIsalele, vakulwane vakuNgileyate vayile washiwashi nakumbata Yefweta kulifuchi lyaTove.
6 Vambile kuli Yefweta ngwavo: “Tuyenga ukapwe ukapitau ketu, mangana tuzungise vaAmone.”
7 Oloze Yefweta ambile kuli vaze vakulwane vakuNgileyate ngwenyi: “Keshi yenu mwanguhungile nakunguhanga muzuvo yatatako numba?+ Uno muneza kuli ami mwomwo yavihuli muli nakumona tahi?”
8 Vaze vakulwane vambile kuli Yefweta ngwavo: “Vikiko tunejila kuli ove. Kachi nge muya nayetu hamwe mangana tukalwe jita navaAmone, kaha mukapwa utwamina yetu navaka-Ngileyate vosena.”+
9 Yefweta ambile kuli vakiko ngwenyi: “Kachi nge namungukindulwisa ngukalwe jita navaAmone, kaha nawa nge Yehova mwakangufungulwilavo, nangukapwa chikupu ngutwamina yenu.”
10 Vaze vakulwane vambile kuli ikiye ngwavo: “Yehova apwenga chinjiho* mukachi ketu nayove nge katweshi kukalinga nganomu unahanjikako.”
11 Ngocho Yefweta ayile navaze vakulwane vakuNgileyate, kaha vatu vamutongwele apwenga twamina yavo, kaha nawa kapitau kavo. Yefweta ahanjikile cheka mazu osena awa kumeso aYehova kuMijipa.+
12 Jino Yefweta atumine valuwa kuli mwangana wavaAmone+ ngwenyi: “Ngunakulingi ika numba wizenga nakunyemukila lifuchi lyami?”
13 Mwangana wavaAmone ambile kuli vaze valuwa jaYefweta ngwenyi: “Mwomwo omu vaIsalele valovokele muEjipitu+ vatambwile lifuchi lyami, kufuma kuAlanone+ nakuheta kuYavoke mbwe nakuYotau.+ Shikaho likindulwise mukuunda.”
14 Kaha Yefweta atumine cheka valuwa kuli mwangana wavaAmone
15 vakahanjike kuli ikiye ngwavo:
“Yefweta nambe ngwenyi, ‘VaIsalele kavatambwile lifuchi lyavaMowave+ nalifuchi lyavaAmoneko.+
16 Mwomwo omu valovokele muEjipitu, vahichile mupambo swi nakuKalungalwiji Uchila,+ kaha vahetele kuKateshe.+
17 Jino vaIsalele vatumine valuwa kuli mwangana waEtome+ ngwavo: “Twitavise tuhite mulifuchi lyove,” oloze mwangana waEtome akanyine. Kaha vatumine nawa mazu kuli mwangana waMowave,+ oloze naikiye akanyine. Ngocho vaIsalele vatwaminenga lika muKateshe.+
18 Omu vahichile mupambo, vakondolokele lifuchi lyaEtome+ nalyeli lyaMowave. Kufumaho vatalikishile kumututuko walifuchi lyaMowave,+ kaha vatungile chilombo chavo mungalila yaAlanone. Oloze kavahetele mulifuchi lyaMowaveko+ mwomwo Alanone yapwile kungiza naMowave.
19 “‘Kufumaho vaIsalele vatumine valuwa kuli Shihone mwangana wavaAmole, mwangana wakuHeshevone, kaha vambile kuli ikiye ngwavo: “Twitavise tuhite mulifuchi lyove tuyenga kulifuchi lyetu.”+
20 Shihone ketavishile vaIsalele vahite mulifuchi lyenyiko. Oloze akungulwile vatu jenyi vosena nakutunga chilombo kuYahaze, kaha valwile jita navaIsalele.+
21 Yehova Kalunga kaIsalele ahanyine Shihone navatu jenyi vosena mumavoko avaIsalele. Ngocho vavafungulwile nakutambula lifuchi lyavaAmole lyosena.+
22 VaIsalele vatambwile ngalila yavaAmole yosena kufuma kuAlanone swi nakuYavoke, nakufuma kupambo swi nakuYotau.+
23 “‘Yehova Kalunga kaIsalele ikiye afungulwile vaAmole kumeso avaIsalele.+ Jino uli nakusaka kuvahangamo tahi?
24 Kachi nge kalunga kenu Kemoshe+ namihane lifuchi, uno kamweshi kulihetako numba? Shikaho nayetu nawa natuheta lyesholyo lifuchi natuhane Yehova Kalunga ketu.+
25 Kutala unahambakana Mbalaka,+ mwanaJipole mwangana waMowave nyi? Uno ahashile kulipika chipwe kulwa jita navaIsalele tahi?
26 Omu vaIsalele vatwaminenga munganda yaHeshevone najimbongi jajingilikileko,+ namuAlowele najimbongi jajingilikileko, namujinganda josena jakuchikulo chaAlanone hamyaka 300, ika wazenekele kujitambula halwola lwosena elu?+
27 Ami kangwalingile shili kuli oveko, oloze ove unaluwisa hakungunyemukila. Shikaho Yehova Muka-kuyula,+ ahakule lelo mukachi kavaIsalele navaAmone.’”
28 Oloze mwangana wavaAmone kevwilile aze mazu aYefwetako.
29 Jino shipilitu yaYehova yejile hali Yefweta,+ kaha ahichile kuNgileyate nakungalila yavaManase nakuya kuMijipe yakuNgileyate,+ kaha kufuma kuze ayile kuli vaAmone.
30 Yefweta ashikile Yehova lushiko+ ngwenyi: “Kachi nge nauhana vaAmone mumavoko ami,
31 kaha weshowo mwakalivanga kulovoka muzuvo yami nakungusesa omu nangukakinduluka mukuunda hakufuma nakulwa jita navaAmone, mwakapwa waYehova,+ kaha nangukamuhana kupwa wana wakulumba.”+
32 Ngocho Yefweta ayile nakulwa jita navaAmone, kaha Yehova avahanyine mumavoko enyi.
33 Ajihile vatu vavavulu chikuma kufuma kuAlowele nakuheta kuMinyite, kafwe jinganda 20, mbwe nakuAvele-kelamime. VaAmone vavafungulwile kuli vaIsalele.
34 Jino Yefweta akindulukile kuzuvo yenyi kuMijipa.+ Kaha mwanenyi wapwevo alovokele nakumusesa oku ali nakwimba kangoma nakukina. Apwile mwanenyi umwe kaha lyamunwe, kapwile namwana wekako.
35 Omu amumwene, apihililile nakupula uvwalo wenyi, kaha ambile ngwenyi: “Mama lelo ove mwanami! Unangwivwisa chinyengo, mwomwo ove yove nanguhana. Ngunamushiki lyehi Yehova nakanwa kami, kaha kangweshi kuhasa kwalumukako.”+
36 Uze mwanenyi ambile ngwenyi: “Ove tata, kachi nge unamushiki lyehi Yehova nakanwa kove, kaha linga nganomu unamushiki+ mwomwo Yehova nalingi sambanjinga kuli vaka-kole jove, vaAmone.”
37 Ambile cheka kuli ise ngwenyi: “Nangukulomba chuma chino: Ngweche hatukweji vavali nguyenga kujipili mangana ngukalilileko ujike wami navakwetu mapwevo hamwe.”*
38 Ise ambile kuli ikiye ngwenyi: “Yako.” Ngocho amusuwile ayenga tukweji vavali. Kaha ayile navakwavo mapwevo nakulila ujike wenyi kujipili.
39 Omu vakumine vaze tukweji vavali, akindulukile kuli ise, kaha ise ateselemo luze lushiko alishikile hali ikiye.+ Ou mwanapwevo apwile kanda alisavaleho lyehi nalunga. Jino vatu muIsalele valingilenga chuma chino:
40 Mwaka himwaka vana vamapwevo muIsalele vayilenga nakusangejeka mwanaYefweta kaNgileyate, makumbi awana mumwaka.
Kwinyikila Chamwishi
^ Hepe., “apwenga muka-kwivwa.”
^ Chipwe “ngukalilileko namasepa jami mwomwo kangweshi kukasombokako.”
