Vaka-kuyula 12:1-15
12 Jino malunga vavaEfwalime valikungulwile hamwe, vazaukile kalwiji nakuya kuZafwone,* kaha vambile kuli Yefweta ngwavo: “Ika wahonenene kutusanyika tuyenga nove nakulwa jita navaAmone?+ Natukwochela kumwe nazuvo yove.”
2 Oloze Yefweta avambile ngwenyi: “Ami navatu jami tunapunga nakulizungisa chikuma navaAmone. Ngwamisanyikile ngwami mungukafwe oloze enu mwakanyine kungulwila mumavoko avo.
3 Omu ngwamwene ngwami munakane kungulwila, ngocho ngwahakile mwono wami muponde nakuya nakulwa jita navaAmone.+ Kaha Yehova avahanyine mumavoko ami. Nyi mwomwo ika munejila nakulwa jita nayami likumbi lyalelo?”
4 Yefweta akungulwile malunga vakuNgileyate vosena,+ kaha valwile jita navaEfwalime. Malunga vakuNgileyate vafungulwile vaEfwalime vaze vambile ngwavo: “Enu vaka-Ngileyate munapu muvaka-kukimbakimba vakuli vaEfwalime vakungalila yavaEfwalime navaManase.”
5 Jino malunga vakuNgileyate vayile nakwimana kuuzaukilo wavaEfwalime, kumwava waYotau.+ Omu malunga vavaEfwalime vachinyine mangana vakazauke haze hamwava, mutu himutu alombele ngwenyi: “Ngwitavisenu nguzauke,” oloze vaze malunga vakuNgileyate vamwihwile ngwavo: “Uno ukaEfwalime tahi?” Omu avakumbulwile ngwenyi: “Nduma,”
6 kaha vamwambile ngwavo: “Hanjika ngwove Shivolete.” Oloze ikiye ambile ngwenyi: “Sivolete,” mwomwo ahonene kuvuluka lizu kana mujila yakwoloka. Ngocho vamukwachile nakumujihila kuze kumwava waYotau. Kaha vaEfwalime vakuheta ku 42,000 vafwile halikumbi lize.
7 Yefweta kaNgileyate ayulile vaIsalele myaka 6 kaha afwile, ngocho vamufunjile munganda yenyi yaNgileyate.
8 Kufumaho Ivizane wakuMbetelema aputukile kuyula vaIsalele.+
9 Ivizane apwile navana vamalunga 30, navava vamapwevo nawa 30. Etavishile vana venyi vamapwevo vasomboke kumalunga vakuchisaka cheka, kaha vana venyi vamalunga nawa avambachilile mapwevo 30 vakweka. Ivizane ayulile vaIsalele myaka 7.
10 Ivizane afwile, kaha vamufunjile kuMbetelema.
11 Omu afwile Ivizane, Elone kaZevulune aputukile kuyula vaIsalele, kaha avayulile hamyaka 10.
12 Elone kaZevulune afwile, kaha vamufunjile kuAiyalone, mungalila yavaZevulune.
13 Omu afwile Elone, Avatone mwanaHilele, muka-Pilatone, aputukile kuyula vaIsalele.
14 Avatone apwile navana vamalunga 40, navazukulu 30, kaha vatambukilenga havimbulu 70. Ayulile vaIsalele myaka 8.
15 Avatone mwanaHilele, muka-Pilatone afwile, kaha vamufunjile kuPilatone, mungalila yavaEfwalime, kupili yavaAmaleke.+
Kwinyikila Chamwishi
^ Chipwe pamo, “vazaukile kalwiji nakutalisa kunote.”
