Vaka-kuyula 13:1-25
13 VaIsalele vaputukile cheka kulinga vyuma vyavipi kumeso aYehova,+ kaha Yehova avahanyine mumavoko avaFwilishite+ hamyaka 40.
2 Jino kwapwile lunga umwe, lijina lyenyi ikiye Manowa+ wakumuyachi waNdane,+ atwaminenga kuZola.+ Pwevo lyenyi apwile mumba, kasemenengako.+
3 Kaha kangelo kaYehova asolokele kuli uze pwevo, ambile kuli ikiye ngwenyi: “Tala! Ove unapu umumba, kawasemako, oloze nawimita lijimo nakusema mwana walunga.+
4 Shikaho kanda unwa vinyo chipwe wala wekako,+ chipwe kulya chuma chachipiko.+
5 Tala! Nawimita lijimo nakusema mwana walunga. Yembe kanda nayikahita kumutwe wenyiko+ mwomwo mwakapwa Najili kuli Kalunga kufuma vene hakusemuka chenyi.* Ikiye mwakalwila vaIsalele mumavoko avaFwilishite.”+
6 Uze pwevo ayile nakulweza lunga lyenyi ngwenyi: “Kuli ami kwezanga mutu waKalunga wamuchano, asolokanga nge kangelo kaKalunga wamuchano, kaha angwivwisanga woma chikuma. Kangwamuhulisanga okwo afumangako, ikiye nawa kangulwezanga lijina lyenyiko.+
7 Oloze angwambanga ngwenyi: ‘Tala! Nawimita lijimo nakusema mwana walunga. Shikaho kanda naunwa vinyo chipwe wala wekako, chipwe kulya chuma chachipiko, mwomwo mwana kana mwakapwa Najili kuli Kalunga kufuma vene hakusemuka chenyi* palanga nakukufwa chenyi.’”
8 Manowa alembelelele Yehova ngwenyi: “Ove Yehova, mutume cheka uze mutu waKalunga wamuchano ezenga nakutulweza mwakulelela ou mwana mwakasemuka.”
9 Ngocho Kalunga wamuchano evwililile Manowa, kaha uze kangelo kaKalunga wamuchano ejile cheka kuli uze pwevo, amuwanyine natwame muchipapa. Oloze lunga lyenyi Manowa kapwilekoko.
10 Uze pwevo ayile jimbushi kuli lunga lyenyi nakumulweza ngwenyi: “Uze lunga ezanga kuli ami lize likumbi neza cheka.”+
11 Manowa akatukile, ayile napwevo lyenyi kuli uze lunga. Kaha amwambile ngwenyi: “Ove yove lunga uze ahanjikanga kuli pwevo lyami nyi?” Ikiye ambile ngwenyi: “Yami vene.”
12 Manowa ambile ngwenyi: “Mazu ove wahanjikanga atesemo. Uno mwana kana natukamulela ngachilihi, kaha milimo muka mwakazatanga?”+
13 Uze kangelo kaYehova ambile kuli Manowa ngwenyi: “Pwevo lyove alilame kuvyuma vyosena vize ngwamulwezanga.+
14 Kanda alya chuma chimwe chakumuvinyoko, chipwe kunwa vinyo chipwe wala wekako,+ kanda alya chuma chachipiko.+ Vyuma vyosena vize ngunamulweze avilame.”
15 Manowa ambile kuli uze kangelo kaYehova ngwenyi: “Vandamina tukujihile mwanapembe.”+
16 Oloze uze kangelo kaYehova ambile kuli Manowa ngwenyi: “Numba ngutwama tuhu kuno, kangweshi kulya vyakulya vyoveko. Oloze nge nausaka kuhana wana wakulumba kuli Yehova, kaha muhane tuhu.” Manowa katachikijile ngwenyi apwile kangelo kaYehovako.
17 Manowa ehwile uze kangelo kaYehova ngwenyi: “Lijina lyove yove iya+ mangana tukakuvumbike omu nawakatesamo mazu ove?”
18 Oloze kangelo kaYehova amwambile ngwenyi: “Ika uli nakusakila kwijiva lijina lyami? Mwomwo lijina lyami lyapwa lyakukomwesa chikuma.”
19 Kaha Manowa ambachile uze mwanapembe, nawana wamanona, amulumbililevyo Yehova halilolwa. Kalunga alingile chuma chakukomwesa oku Manowa napwevo lyenyi vali nakumona.
20 Halijiko lyakulumbila hepukile milangi yize yayile mwilu, kaha uze kangelo kaYehova ayile muze mumilangi oku Manowa napwevo lyenyi vali nakumona. Kaha vafukamine chameso hamavu.
21 Uze kangelo kaYehova kasolokele cheka kuli Manowa napwevo lyenyiko. Ngocho Manowa atachikijile ngwenyi apwile kangelo kaYehova.+
22 Jino Manowa ambile kuli pwevo lyenyi ngwenyi: “Natufwa chikupu, mwomwo tunamono Kalunga.”+
23 Oloze pwevo lyenyi ambile kuli ikiye ngwenyi: “Kachi nge Yehova asakanga kutujiha, kachi ketavilile wana wetu wakulumba+ nawana wamanona tunamuhaneko, kaha nawa kachi katusolwelele vyuma tunamono, chipwe kutulweza evi vyuma vyosenako.”
24 Kutwala muze uze pwevo asemene mwana walunga, kaha vamulukile ngwavo Samasone.+ Omu apwile nakukola uze kanyike, Yehova amukiswilenga.
25 Jino shipilitu yaYehova yejile hali Samasone+ kuMahane-ndane,+ mukachi kaZola naEshetayole.+
