Vaka-kuyula 14:1-20
14 Jino Samasone ayile kuChimina, kaha akamwene mwanapwevo wakaFwilishite.*
2 Omu akindulukile, alwezele ise nanaye ngwenyi: “Ngunawane mwanapwevo wakaFwilishite kuChimina uze ngunazange, ngocho ngumbachilenuyo apwenga pwevo lyami.”
3 Oloze ise nanaye vamwambile ngwavo: “Uno muli vausoko wetu namuli vatu jetu kamweshi pwevo wakumbatako tahi?+ Mwomwo ika naumbachila pwevo muli vaFwilishite vaze vapwa vilima?” Oloze Samasone ambile kuli ise ngwenyi: “Ngumbachilenuyo mwomwo ikiye ngunasake.”*
4 Vaise nanaye kavatachikijile ngwavo Yehova ikiye ajinyine chuma kanako, mwomwo asakile kuwana kanyinyilo kakuzungilamo navaFwilishite hakuwana nge vakiko vayulilenga vaIsalele halwola luze.+
5 Ngocho Samasone ayile hamwe naise nanaye kuChimina. Omu ahetele kumande amivinyo akuChimina, amwene ndumba* ali nakutahwoka nakwiza kuli ikiye.
6 Jino shipilitu yaYehova yamuhanyine ngolo,+ kaha atanyine uze ndumba muvihanda vivali, kwijiva nge mutu uze mwatanya mwanapembe muvihanda vivali namavoko enyi. Oloze chuma alingile kachilwezele ise nanayeko.
7 Samasone ayile nakuhanjika nauze mwanapwevo. Kaha uze mwanapwevo awahile kumeso enyi.+
8 Kutwala muze Samasone akindulukilileko mangana akambate pwevo lyenyi.+ Kahomu apwile nakuya, ahandunukile mujila akatale ndumba uze ajihile. Kuheta kuze, awanyine chinjomoto chavapuka nauchi hamujimba wayauze ndumba wakufwa.
9 Kaha akekwile uze uchi namavoko enyi nakuputuka kulya oku ali nakutambuka. Omu awanyine ise nanaye, avahanyineko uchi umwe valyenga. Oloze kavalwezele nge uze uchi naukekula hamujimba wandumba wakufwako.
10 Jino ise ayile kuli uze mwanapwevo, kaha Samasone alingile chiwanyino chakulya kuze, mwomwo mukiko valingilenga vakweze jamalunga.
11 Omu vatu vamwene Samasone, vamuhanyine malunga 30 mangana vamushinjikize.
12 Jino Samasone ambile kuli vakiko ngwenyi: “Manenu ngumilweze kashimutwiji kamwe. Kachi nge namukalumbununa hachiwanyino chino tuli chamakumbi 7, kaha nangumihana mahina alinyu 30 nauvwalo 30.
13 Oloze nge namuhona kungulumbunwinako, kaha namunguhana mahina alinyu 30 nauvwalo 30.” Vakiko vamwambile ngwavo: “Tulwezele kashimutwiji kove tukevwe.”
14 Ngocho ambile ngwenyi:“Muli muka-kulya mwafumine vyakulya,Kaha muli muka-ngolo mwafumine vyuma viyekemena.”+
Vakiko kavahashile kulumbununa kaze kashimutwiji hamakumbi atatuko.
15 Jino halikumbi lyamuchiwana vambile kuli pwevo lyaSamasone ngwavo: “Muleleveke lunga lyove+ mangana atulweze munalumbunukila kashimutwiji kenyi. Nge pimbi natukwocha, nakwocha nawa zuvo yaiso nakakahya. Uno mwatusanyikanga kuno mangana mututambule vikumba vyetu nyi?”
16 Ngocho pwevo lyaSamasone alilile kumeso alunga lyenyi, kaha amwambile ngwenyi: “Wanguhunga, kawanguzangako.+ Walwezanga vatu jami kashimutwiji, oloze kawangulwezele mukalumbunukilako.” Ikiye ambile ngwenyi: “Mama natata kangwavalwezeleko, kaha ngukulweze yove nyi?”
17 Uze pwevo alilile lika hamakumbi osena 7 achiwanyino. Ngocho Samasone amulwezele mwayile kaze kashimutwiji halikumbi lyakusokesa 7 mwomwo amushinjilile chikuma. Kaha uze pwevo alumbunwinyine vatu jenyi kaze kashimutwiji.+
18 Halikumbi lize lyakusokesa 7 shimbu kanda likumbi lilauke,* vaze malunga vamunganda vambile kuli ikiye ngwavo:“Vyuma mukaze viyekemena kuhambakana uchi,Kaha iyaze ali nangolo kuhambakana ndumba?”+Ikiye ambile kuli vakiko ngwenyi:“Kachi nge chitole chami kamwamulimisanga nalitemo lyakukokako,+Kachi kamwahashile kulumbununa kashimutwiji kamiko.”
19 Jino shipilitu yaYehova yejile hali ikiye,+ kaha ayile kuAshakelone.+ Akajihile malunga 30 kuze, kaha ambachile uvwalo wavo, auhanyine kuli malunga valumbunwine kaze kashimutwiji.+ Kaha akindulukile kuzuvo yaise namatoto.
20 Oloze pwevo lyaSamasone+ vamuhanyine kuli lunga umwe hali vaze malunga vashinjikijile Samasone.+
Kwinyikila Chamwishi
^ Hepe., “akamwene pwevo wakuli vana vavaFwilishite.”
^ Hepe., “ikiye nawahe kumeso ami.”
^ Chipwe “mwevu wandumba.”
^ Chipwe pamo, “shimbu kanda engile mukapete kamukachi.”
