Vaka-kuyula 15:1-20
-
Samasone mwalinga vaFwilishite sambanjinga (1-20)
15 Omu mwahichile makumbi amwe, halwola lwakwaha tiliku, Samasone ambachile mwanapembe nakuya nakumeneka pwevo lyenyi. Kuheta kuze ambile ngwenyi: “Nangusaka kuya muzuvo kukapete kakusavala* ngukamone pwevo lyami.” Oloze ise yapwevo ketavilileko.
2 Amwambile ngwenyi: “Ngwashinganyekanga ngwami, ‘Unamuhungu chikupu.’+ Ngocho ngwamuhananga kuli sepa lyove.+ Uno songo yenyi kawahile kuhambakana ikiyeko numba? Mumbate apwenga pwevo lyove.”
3 Oloze Samasone ambile ngwenyi: “VaFwilishite kaveshi kunguhana jino mulonga omu nanguvalinga mwamupiko.”
4 Ngocho Samasone ayile nakukwata vamyumbwe 300. Ambachile jisoka jakumunyikisa, kaha awanyishile mikila yavamyumbwe vavali vavali, nakukashilako soka yimwe yimwe.
5 Kaha aswamikile kakahya kuze kujisoka nakusuula vaze vamyumbwe vayenga mumande avaFwilishite ajimbuto. Ngocho mikuta yajimbuto javo jamanona yize valumbikile mumande yawemene, najimbuto jize japwile kanda vachahe, namande amivinyo namilive.
6 VaFwilishite vehwile ngwavo: “Iya nalingi chuma kanechi?” Vavakumbulwile ngwavo: “Samasone, isewenu yayauze lunga wakuChimina, mwomwo amutambulanga pwevo lyenyi nakumuhana kuli sepa lyenyi.”+ Ngocho vaFwilishite vayile nakwocha uze pwevo naise.+
7 Jino Samasone ambile kuli vakiko ngwenyi: “Muze munalingi ngana jino, ami kangweshi kumyechako, kuvanga ngumilinge sambanjinga.”+
8 Ngocho ajihile vatu vavavulu, kufumaho ayile nakuswama kuwina wakusendeveka wakulilolwa lyaEtame.
9 Kutwala muze vaFwilishite vayile nakutunga chilombo kuYuta, kaha vapwile nakuhitangana muLehi.+
10 Jino malunga vavaYuta vambile kuli vakiko ngwavo: “Vyuma muka munakatukila kuno?” Vakiko vakumbulwile ngwavo: “Tuneza nakukwata* Samasone tumulinge nge muze natulingi nayetu.”
11 Ngocho malunga vavaYuta 3,000 vayile kuze kuwina wakusendeveka wakulilolwa lyaEtame, kaha vambile kuli Samasone ngwavo: “Uno kawatachikijile ngwove vaFwilishite vakiko vali nakutuyulako nyi?+ Mwomwo ika unalingila chuma kanechi kuli etu?” Ikiye ambile ngwenyi: “Ngunavalingi nge muze vangulinganga nayami.”
12 Oloze vakiko vamwambile ngwavo: “Tuneza nakukukwata* mangana tukuhane mumavoko avaFwilishite.” Kaha Samasone avambile ngwenyi: “Lishingenu kuli ami ngwenu kamweshi kungujihako.”
13 Vakiko vamwambile ngwavo: “Nduma, katweshi kukujihako, oloze natukukasa kaha nakukuhana mumavoko avo.”
Ngocho vamukashile mikole yayihya, kaha vamufumishile kuze kulilolwa.
14 Omu ahetele kuLehi, vaFwilishite valikuwile hakumumona. Jino shipilitu yaYehova yamuhanyine ngolo,+ kaha yize mikole vamukashile kumavoko enyi yambitukile kwijiva nge wanda walinyu wakuvatula nakakahya, kaha yaholokele kumavoko enyi.+
15 Samasone amwene chifuwa chalumbangi lwachimbulu chituta, achimbachile, kaha achijihishile malunga 1,000.+
16 Jino ambile ngwenyi:“Ngunalalisa malunga nachifuwa chalumbangi lwachimbulu milumba milumba.Ngunajihi malunga 1,000 nachifuwa chalumbangi lwachimbulu.”+
17 Omu akumishile kuhanjika mazu kana, ambilile chize chifuwa chalumbangi lwachimbulu, kaha alukile chihela chize ngwenyi Lamate-lehi.*+
18 Jino Samasone evwile lipwila, kaha ambile kuli Yehova ngwenyi: “Ove yove unatulwili kuhichila muli ami ngamba yove. Uno ngufwenga lipwila nakuholokela mumavoko avava vilima nyi?”
19 Ngocho Kalunga atuvile kavweluvwelu muchihela chakukunama chize chapwile kuLehi, kaha meya avwelukile.+ Anwine aze meya, kaha ahizumukile nakukwata ngolo. Shikaho alukilile chihela chize ngwenyi Ene-hakole,* kaha noholili kuchili kuLehi.
20 Samasone ayulile vaIsalele myaka 20 hamakumbi avaFwilishite.+
Kwinyikila Chamwishi
^ Chipwe “kukapete kamukachi.”
^ Chipwe “nakukasa.”
^ Chipwe “nakukukasa.”
^ Ulumbunwiso, “Chihela Chakulunduka chaChifuwa chaLumbangi.”
^ Ulumbunwiso, “Kaselwoke kaYou Ali Nakusanyika.”
