Vaka-kuyula 16:1-31
16 Jino Samasone ayile kuNgaza, akamwene pwevo muka-ujila kuze, kaha engilile muzuvo yenyi.
2 Kaha vaka-Ngaza vavalwezele ngwavo: “Samasone neza kuno.” Ngocho vahakile nganda yize muchingombela nakumuswaminyina kuchikolo ufuku wosena. Vamuvandaminyine ufuku wosena nakwamba ngwavo: “Omu nakucha, natumujiha.”
3 Oloze Samasone asavalile palanga namukachi kaufuku. Kahomu ahindukile mukachi kaufuku, akwachile mapito akuchikolo changanda navipamba vyacho vivali, kaha avizulile namwalachi hamwe. Alitwikilevyo havifwiji vyenyi, akandukile navyo kupili yize yalitalasana naHevelone.
4 Jino Samasone azangile pwevo umwe wakuChinema* chaSoleke, lijina lyenyi apwile ikiye Ndelila.+
5 Kaha vamyata javaFwilishite vayile kuli uze pwevo, vamwambile ngwavo: “Muleleveke*+ mangana uwane oho hafuma ngolo jenyi jajinene, nomu tunahase kumwononona mangana tumukase. Kaha natukuhana mutu himutu jimbongo japalata 1,100.”
6 Ndelila ambile kuli Samasone ngwenyi: “Ngulweze oho hafuma ngolo jove jajinene, novyo vatela kukukashisa numba vakwononone.”
7 Ikiye ambile ngwenyi: “Kachi nge navangukasa najikusa jajihya 7 jize jichili kanda jichume, kaha nanguzeya nakupwa ngana mwavatu vosena.”
8 Vaze vamyata javaFwilishite vanehelele uze pwevo jikusa jajihya 7 jize jichili kanda jichume. Kaha pwevo lyenyi amukashile.
9 Vamyata vamuswaminyinyine mukapete kamwe kamuzuvo, kaha pwevo lyenyi atambakanyine ngwenyi: “Samasone! VaFwilishite vaneza nakukulukuka!” Samasone ambitwile jize jikusa kwijiva nge wanda walinyu uze unavatuka nakakahya.+ Oloze kavatachikijile oho hafuma ngolo jenyiko.
10 Kaha Ndelila ambile kuli Samasone ngwenyi: “Tala! Unanguhulamisa, unangwongo. Shikaho ngulweze vyuma vatela kukukashisa.”
11 Ikiye ambile ngwenyi: “Kachi nge navangukasa namikole yayihya yize kanda vazachiseho lyehi, kaha nanguzeya nakupwa ngana mwavatu vosena.”
12 Ngocho Ndelila ambachile mikole yayihya nakumukasa, kaha atambakanyine ngwenyi: “Samasone! VaFwilishite vaneza nakukulukuka!” (Vakiko vamuswaminyinyine mukapete kamwe kamuzuvo.) Kaha ambitwile yize mikole kumavoko enyi kwijiva nge wanda.+
13 Jino Ndelila ambile kuli Samasone ngwenyi: “Noholyapwa hanga chiunguhulamisa nakungwonga.+ Ngulweze jino vyuma vatela kukukashisa.” Ikiye amwambile ngwenyi: “Kachi nge nauvunga mambongi 7 akumutwe wami nawanda, nanguzeya nakupwa ngana mwavatu vosena.”
14 Ngocho Ndelila awavungile nakuwakolesa mbe nalumbambo, kaha atambakanyine ngwenyi: “Samasone! VaFwilishite vaneza nakukulukuka!” Samasone ahindukile mutulo, kaha asomwene luze lumbambo nauze wanda.
15 Jino Ndelila ambile kuli Samasone ngwenyi: “Ika weji kungwambilanga ngwove, ‘Ngwakuzanga,’+ okunyi muchima wove kaweshi nayamiko? Unanguhulamisa mapapa katatu, kaha kawangulwezele oho hafuma ngolo jove jajineneko.”+
16 Hakuwana nge amwivwishilenga chipekete nakumushinjila hakumbi hakumbi, ngocho evwile kwijiva nge mwafwa.+
17 Samasone amulwezele vyuma vyosena, ngwenyi: “Yembe kanda yihite lyehi kumutwe wami, mwomwo ngwapwa nguNajili kuli Kalunga kufuma vene hakusemuka chami.*+ Kachi nge jikambu jami navajiteula, kaha ngolo jami najingukuma, nanguzeya nakupwa ngana mwavatu vosena.”
18 Omu Ndelila amwene ngwenyi Samasone namulweze vyuma vyosena, hahaze vene asanyikile vamyata javaFwilishite+ ngwenyi: “Twayenu jino, mwomwo nangulweze vyuma vyosena.” Ngocho vamyata javaFwilishite vejile kuli Ndelila, vamunehelele mutu himutu jimbongo.
19 Ndelila asavalikile Samasone tulo hamahinji enyi, kaha asanyikile lunga umwe ateule mambongi 7 akumutwe wenyi. Ngocho amwononwene jino, mwomwo ngolo jenyi jamukumine.
20 Kaha atambakanyine ngwenyi: “Samasone! VaFwilishite vaneza nakukulukuka!” Samasone ahindukile mutulo, ambile ngwenyi: “Nangulovoka ngana mwamakumbi osena+ nakulilwila.” Oloze kejivile ngwenyi Yehova amusezeleko.
21 Ngocho vaFwilishite vamukwachile nakumutuva meso. Kufumaho vamutwalile kuNgaza, vamukashile malenge aunengu avali, kaha apwile jino muka-kucheka manona muzuvo yaufunge.
22 Kutwala muze jikambu jenyi jize vamutewile japutukile kusoka cheka.+
23 Jino vamyata javaFwilishite valikungulwile hamwe mangana vavatwile kalunga kavo Ndangone+ vimuna vakuvatula, nakulinga chiwanyino chakuwahilila, mwomwo vambile ngwavo: “Kalunga ketu natuhane muka-kole wetu Samasone.”
24 Omu vatu vamwene Samasone, valishile kalunga kavo nakwamba ngwavo: “Kalunga ketu natuhane muka-kole wetu uze enyekelenga lifuchi lyetu+ nakujiha vatu jetu vavavulu.”+
25 Hakuwana nge vawahililile chikuma, vambile ngwavo: “Tusanyikenu Samasone mukamenga mangana ezenga nakutusehesa.” Ngocho vamusanyikile mangana avasehese. Kaha vamwimikile mukachi kajipanda jazuvo.
26 Jino Samasone ambile kuli kanyike uze amukwachile kulivoko ngwenyi: “Ngweche ngukwate hajipanda hazaminyina yino zuvo mangana ngushindamineho.”
27 (Muze muzuvo mwazalile vatu, malunga namapwevo. Mwapwile navamyata javaFwilishite vosena. Kaha hamulungu wazuvo hapwile vatu 3,000, malunga namapwevo vaze vapwile nakutala Samasone omu apwile nakusehesa vatu.)
28 Jino Samasone+ alombele kuli Yehova ngwenyi: “Ove Mwata Wakulitulaho Yehova, ngwanuke, ngujikijise+ kamakumishilo. Ove Kalunga kami, mana ngulinge vaFwilishite sambanjinga numba vene haliso lyami limwe.”+
29 Ngocho Samasone ashindaminyine haze hajipanda jahakachi jivali hazaminyine yize zuvo. Akwachile panda yimwe nalivoko lyenyi lyachilyo, kaha panda yikwavo nalivoko lyenyi lyachimoswe.
30 Atambakanyine ngwenyi: “Mana ngufwenga navaFwilishite hamwe.” Ashinjikile jize jipanda nangolo jenyi josena, kaha yize zuvo yashiukilile vaze vamyata navatu vosena vapwile muze muzuvo.+ Ngocho ajihile vatu vavavulu hakufwa chenyi kuhambakana vaze ajihile omu apwile wamutonyi.+
31 Vandumbwenyi navatanga jaise vosena vejile nakumumbata. Vamutwalile kwimbo lyavo kaha vamufunjile muchimbumbe chaise Manowa+ hakachi kaZola+ naEshetayole. Samasone ayulile vaIsalele myaka 20.+
Kwinyikila Chamwishi
^ Chipwe “wakuMwanakalwiji.”
^ Chipwe “Mukanjikize.”
^ Hepe., “kufuma mujimo lyamama.”
