Vaka-kuyula 17:1-13
-
Makombelo aMika nakapilishitu kenyi (1-13)
17 Kungalila yajipili yavaEfwalime+ kwapwile lunga umwe, lijina lyenyi apwile ikiye Mika.
2 Ou lunga ambile kuli naye ngwenyi: “Jize jimbongo japalata 1,100 vakwivile, jize ngwakwivwile uli nakwangwilaho mutu uze ajivile jili kuli ami. Ami yami ngwajimbachile.” Naye ambile ngwenyi: “Yehova akukisule ove mwanami.”
3 Ngocho akindulwishile jize jimbongo japalata 1,100 kuli naye. Oloze naye ambile ngwenyi: “Jimbongo kana nangujihana kuli Yehova mangana ove mwanami ujizachise kukutenga likombelo lyakusonga nalikombelo lyakuzuzulula.+ Shikaho nangujikindulwisa kuli ove.”
4 Omu ahanyine jize jimbongo japalata kuli naye, naye ambachileho jimbongo japalata 200 nakujihana kuli muka-kufula palata. Atengele likombelo lyakusonga nalikombelo lyakuzuzulula. Kaha vavihakile muzuvo yaMika.
5 Mika apwile nazuvo yakulamina tulunga twenyi, kaha atungile lipunu,+ navatelafwime,*+ kaha atongwele* mwanenyi umwe apwenga kapilishitu kenyi.+
6 Hamakumbi aze, muIsalele kamwapwile mwanganako.+ Mutu himutu alingilenga muze amwene* ngwenyi mwakwoloka.+
7 Jino munganda yaMbetelema+ muYuta mwapwile mwanalunga umwe wakutanga yaYuta. Apwile kaLevi,+ kaha atwaminenga kuze.
8 Ou mwanalunga afumine munganda yaMbetelema muYuta nakuya nakutondatonda chihela chakutwama. Kahomu apwile nakuya ungeji wenyi, akahetele kuzuvo yaMika,+ kungalila yajipili yavaEfwalime.
9 Mika ambile kuli ikiye ngwenyi: “Unafumu kulihi?” Ikiye amukumbulwile ngwenyi: “Ngwapwa ngukaLevi, ngunafumu kunganda yaMbetelema muYuta. Nguli nakuya nakutondatonda chihela chakutwama.”
10 Mika amwambile ngwenyi: “Twamanga nayami upwenga utata,* ukapilishitu kami. Nangukuhananga jimbongo japalata 10 hamwaka, navyakuvwala, navyakulya.” Uze kaLevi engilile muzuvo yaMika.
11 Etavilile kutwama nenyi, kaha apwile jino nge mwanaMika.
12 Mika atongwele* uze kaLevi apwenga kapilishitu kenyi,+ kaha atwaminenga muzuvo yenyi.
13 Jino Mika alyambile ngwenyi: “Ngunatachikiza ngwami Yehova mwalinga mwamwaza kuli ami, mwomwo ou kaLevi napu hikapilishitu kami.”
Kwinyikila Chamwishi
^ Chipwe “natulunga vamutanga; natuponya.”
^ Hepe., “azalishile livoko.”
^ Chipwe “muze ashinganyekele.”
^ Chipwe “upwenga umuka-kungulweza mangana.”
^ Hepe., “azalishile livoko.”
