Vaka-kuyula 18:1-31
18 Hamakumbi aze, muIsalele kamwapwile mwanganako.+ Kaha muyachi waNdane+ nawa wapwile nakutonda mavu akutwamaho, mwomwo halwola luze vapwile kanda vachitambule uswana wavo muli vaIsalele.+
2 VaNdane vasakwile malunga vatanu mujitanga javo, vingazule vakuZola nakuEshetayole,+ vavatumine vakasondwese lifuchi nakulikekesa. Vavalwezele ngwavo: “Yenunga mukakekese lifuchi.” Omu vahetele mungalila yajipili yavaEfwalime, vasavalile kuzuvo yaMika+ ufuku umwe.
3 Omu vapwile kuzuvo yaMika, vevwile lizu lyamwanalunga umwe wakaLevi. Kaha vamuhulishile ngwavo: “Iya nakunehe kuno? Vyuma muka uli nakulinga kuno? Ika unatwamina kuno?”
4 Ikiye avakumbulwile ngwenyi: “Mika angulingile munganji mukananga, kaha angukambile ngupwenga ngukapilishitu kenyi.”+
5 Vakiko vamwambile ngwavo: “Mwihule Kalunga tutachikize numba nge natufukila muungeji wetu nyi nduma.”
6 Uze kapilishitu ambile kuli vakiko ngwenyi: “Yenunga mukuunda. Yehova ali nayenu muungeji wenu.”
7 Vaze malunga vatanu vayile ungeji wavo, kaha vahetele kuLaishe.+ Vatu vawanyine kuze vapwile vatu vakulimanyina, nge muze vatwaminenga nawa vaka-Shitone. Vatwaminenga mukuunda,+ kavalizakaminyine vyuma vimweko, kaha mulifuchi lyavo kamwapwile muka-ngolo umwe avayanjishilengako. Vapwile kwakusuku nakuze vatwaminenga vaka-Shitone, kaha kavalikwatasanyine navatu vekako.
8 Omu vakindulukile kuli vandumbwavo kuZola nakuEshetayole,+ vandumbwavo vambile kuli vakiko ngwavo: “Mwatambukanga ngachilihi?”
9 Vakiko vakumbulwile ngwavo: “Tuyenu tukavalukuke, mwomwo tunawane nge lifuchi lyavo lyamwaza chikuma. Kanda namukakasanako. Kanda namulangisa kuya nakuheta lifuchi kanako.
10 Omu namukaheta kuze, namukawana vatu vaze kavalizakamina vyuma vimweko,+ kaha lifuchi lyavo nawa lyalinene. Kalunga namihane lifuchi kana, lifuchi lize likwechi vyuma vyosena.”+
11 Jino malunga 600 vakuchisaka chaNdane valipakachile vitwa, kaha vakatukile kuZola nakuEshetayole.+
12 Vayile nakutunga chilombo chavo kuKilyate-yeyalime+ muYuta. Shikaho vavulukila chihela chize chakumulauko waKilyate-yeyalime ngwavo Mahane-ndane*+ nakulelo lino.
13 Omu vafumine kuze, vayile kungalila yajipili yavaEfwalime, kaha vakahetele kuzuvo yaMika.+
14 Jino malunga vatanu vaze vayile nakusondwesa lifuchi lyaLaishe+ vambile kuli vandumbwavo ngwavo: “Uno munatachikiza ngwenu mujizuvo eji muli lipunu, navatelafwime,* nalikombelo lyakusonga, nalikombelo lyakuzuzulula+ nyi? Shikaho shinganyekenu mwakulingila.”
15 Ngocho vayile kuzuvo yayauze mwanalunga wakaLevi,+ kwakamwihi nazuvo yaMika, kaha vamuhulishile chihindu chenyi.
16 Oloze malunga 600 vakumuyachi waNdane+ vaze valipakachile vitwa vemanyine kuchikolo.
17 Kaha malunga vatanu vaze vayile nakusondwesa lifuchi+ vengilile muzuvo, vambachile lize lipunu,+ navatelafwime,*+ nalikombelo lyakusonga, nalikombelo lyakuzuzulula.+ (Uze kapilishitu+ emanyine kuze kuchikolo navaze malunga 600 valipakachile vitwa.)
18 Vaze malunga vengilile muzuvo yaMika, vambachile lize lipunu, navatelafwime,* nalikombelo lyakusonga, nalikombelo lyakuzuzulula. Jino uze kapilishitu ambile kuli vakiko ngwenyi: “Muli nakulinga ika?”
19 Vakiko vambile ngwavo: “Hola kulu. Fwika livoko lyove kukanwa. Tuyenga hamwe ukapwe utata,* ukapilishitu ketu. Uno chinawahe kuli ove kupwa ukapilishitu muzuvo yalunga umwe tahi,+ nyi kupwa ukapilishitu kumuyachi nakuchisaka chavatu muIsalele?”+
20 Uze kapilishitu asuulukile, kaha ambachile lize lipunu, navatelafwime,* nalikombelo lyakusonga,+ ayile navaze vatu.
21 Omu vaputukile ungeji wavo, vatwamikile vanyike vavandende kulutwe lwavo, navimuna, navyuma vyavo vyavilemu.
22 Jino omu valingile hivanatambuka lyehi katunda kufuma kuzuvo yaMika, Mika namalunga vaze vatwaminenga kwakamwihi nazuvo yenyi valikungulwile hamwe, vakavile vaNdane kaha vavawanyine.
23 Vatambakanyine vaNdane, kaha vaNdane valumukile nakuvatala, vambile kuli Mika ngwavo: “Munatukavila ika? Ika munalikungulwila ngana?”
24 Ikiye ambile ngwenyi: “Munambate tulunga twami vaze ngwatengele nakumbata nawa kapilishitu kami. Navimwe munanguselako vyauchi. Nyi namungwihula ngachilihi ngwenu, ‘Munatukavila ika?’”
25 Vakiko vamukumbulwile ngwavo: “Kanda ututenukilako kuchina vatu vamatoto navakulemeka, ngocho mutokesa mwono wove namyono yavava vakuzuvo yove.”
26 VaNdane valiyililile kwavo, kaha Mika amwene ngwenyi vatu kana vapwile nangolo kumuhambakana ikiye, ngocho akindulukile kuzuvo yenyi.
27 Omu valingile hivanambate lyehi vyuma vize atengele Mika, nakumbata nawa kapilishitu kenyi, vayile kuvatu vakuLaishe+ vaze vatwaminenga mukuunda, vaze kavalizakaminyine vyuma vimweko.+ Vavajihile najipoko jamikwale, kaha vochele nganda yavo nakakahya.
28 Kakwapwile mutu avapululwileko, mwomwo nganda yavo yapwile kwakusuku naShitone. Kaha nawa kavalikwatasanyine navatu vekako. Nganda yaLaishe yapwilile muchinema* chakuMbete-lehove.+ Ngocho vaNdane vayitungulwile nakutwamangamo.
29 Yize nganda vayilukile ngwavo Ndane+ mwomwo likiko lyapwile lijina lyakakuluka yavo Ndane, mwanaIsalele.+ Hakavanga lijina lyayize nganda lyapwile Laishe.+
30 Kufumaho, vaNdane valijikile lize likombelo lyakusonga.+ Kaha Yonatane+ mwanaNgeleshome,+ Ngeleshome mwanaMose ikiye apwile kapilishitu kamuyachi waNdane navana venyi hamwe. Vapwilenga lika vapilishitu palanga nomu vatu vayile muufunge.
31 Lize likombelo lyakusonga atengele Mika lyapwilenga lika kuze hamakumbi osena aze yapwilenga zuvo yaKalunga wamuchano kuShilo.+
Kwinyikila Chamwishi
^ Ulumbunwiso, “Chilombo chaNdane.”
^ Chipwe “natulunga vamutanga; natuponya.”
^ Chipwe “natulunga vamutanga; natuponya.”
^ Chipwe “natulunga vamutanga; natuponya.”
^ Chipwe “ukapwe umuka-kutulweza mangana.”
^ Chipwe “natulunga vamutanga; natuponya.”
^ Chipwe “muchana.”
