Vaka-kuyula 19:1-30
-
Ujila wavaMbenjamine kuNgiveya (1-30)
19 Hamakumbi aze, muIsalele kamwapwile mwanganako.+ Jino kwapwile kaLevi umwe atwaminenga kusongo yangalila yavaEfwalime+ yajipili. Ou kaLevi ambachile pwevo mukwavo kuMbetelema+ muYuta.
2 Oloze uze pwevo kashishikile kuli ikiyeko, asezele uze lunga lyenyi nakuya kuli ise kuMbetelema muYuta. Akatwamine kuze tukweji vawana.
3 Lunga lyenyi amukavile mangana akahanjike nenyi akinduluke. Ayile nangamba yenyi walunga navimbulu vavali. Hakuheta kuze, uze pwevo amutwalile kuzuvo yaise. Kahomu ise amumwene, awahililile chikuma.
4 Uze ise akunywile uze kaLevi atwame nenyi makumbi atatu. Valilenga nakunwa, kaha asavalilenga vene kuze.
5 Jino halikumbi lyamuchiwana omu vahindukile chimenemene mangana vakinduluke, ise yayauze pwevo ambile kuli isewenu ngwenyi: “Lyenu vyakulya shimbu kanda mukatuke mangana mupwenga nangolo.”*
6 Ngocho vatwamine, valile nakunwa hamwe. Ise yayauze pwevo ambile kuli isewenu ngwenyi: “Savalenu kuno mangana mulivwise kuwaha.”*
7 Uze lunga omu asakile kuya, isewenu amulembelelele, kaha asavalile cheka kuze.
8 Omu ahindukile nachimene halikumbi lyamuchitanu mangana ayenga, ise yayauze pwevo ambile ngwenyi: “Lyenu vyakulya mangana mupwenga nangolo.”* Kaha vosena valile nakunwa, vazezamine palanga nakuchingoloshi.
9 Omu akatukile uze lunga mangana ngwenyi ayenga napwevo lyenyi nangamba yenyi hamwe, isewenu ambile kuli ikiye ngwenyi: “Tala! Kalinwomu kutoke. Savalenu kuno, mwomwo likumbi hinalilauka. Savalenu kuno mangana mulivwise kuwaha. Kaha hamene namukakatuka chimenemene nakuya kwimbo* lyenu.”
10 Uze lunga kasakile kusavala cheka ufuku ukwavoko, ngocho akatukile, ayile swi nakuYevuse chipwe ngwavo Yelusalema.+ Ayile navimbulu vavali, napwevo lyenyi, nangamba yenyi.
11 Omu vapwile kwakamwihi naYevuse, likumbi lyapwile hilinateuluka lyehi. Jino uze ngamba ambile kuli kaka yenyi ngwenyi: “Twingilenu munganda yavaYevuse mangana tusavalemo.”
12 Oloze kaka yenyi amwambile ngwenyi: “Katweshi kuhasa kwingila munganda yavaka-mafuchi eka vaze kavapwa vaIsaleleko. Natuya palanga nakuNgiveya.”+
13 Ambile cheka ngwenyi: “Twesekenu kuya mangana tukasavalile kuNgiveya, chipwe kuLama.”+
14 Ngocho vayile ungeji wavo, kaha likumbi lyaputukile kulauka omu vahetele kwakamwihi naNgiveya, nganda yavaMbenjamine.
15 Kaha vayile munganda yaNgiveya vakasavalemo. Omu vapwile munganda kana, vatwamine kuchihela chasanga, mwomwo kakwapwile mutu avasanyikile vasavale muzuvo yenyiko.+
16 Jino kwejile lunga umwe wakashinakaji uze apwile nakufuma kumande muze wi. Ou kashinakaji apwile wakungalila yavaEfwalime+ yajipili, kaha atwaminenga muNgiveya halwola kanelu. Oloze vatu vamunganda vapwile vaMbenjamine.+
17 Omu andwile meso enyi, amwene vangeji vanatwame kuchihela chasanga. Kaha ahulishile uze lunga wakaLevi ngwenyi: “Munafumu kulihi? Muli nakuya kulihi?”
18 Uze lunga amukumbulwile ngwenyi: “Tuli nakufuma kuMbetelema muYuta, tuli nakuya kusongo yangalila yajipili yavaEfwalime kuze ngwatwama. Ngwayile kuMbetelema muYuta,+ kaha nguli nakukinduluka kuzuvo yaYehova,* oloze naumwe wauchi natusanyika kuzuvo yenyi.
19 Mwila nakulya cheka chavimbulu+ jetu kuchili, kaha mbolo+ navinyo vyetu nayou pwevo lyami, nangamba yetu nawa kuvili. Katweshi nachuma chimwe tunazenekako.”
20 Oloze uze kashinakaji ambile ngwenyi: “Kuunda chipwenga nayenu. Nangumilingila vyeshovyo namusaka. Kanda namusavala kuno kuchihela chasangako.”
21 Ngocho avambachile nakuya navo kuzuvo yenyi, kaha ahanyine vimbulu javo vyakulya. Kufumaho vasanyine kumahinji avo, valile nakunwa.
22 Shimbu vapwile nakulya nakunwa, malunga vatuvihu vamunganda kana vejile nakujingilika yize zuvo nakuveta hachikolo. Vambile kuli uze mwenyazuvo ngwavo: “Lovola uze lunga neza muzuvo yove mangana tulisavale nenyi.”+
23 Uze mwenyazuvo alovokele nakuvamba ngwenyi: “Enu vandumbwami, ngunamisakwililako, kanda namulinga chuma chachipi nganako. Ou mutu hingeji, kaha neza muzuvo yami, ngocho kanda namulinga chuma chasonyi nganako.
24 Nguli namwanami wapwevo uze kanda alisavaleho lyehi nalunga, napwevo lyayou ngeji. Manenu ngumilowelevo haweluka, muvalinge mweshomwo munasake enu vavene.+ Oloze kanda namulinga chuma kanechi chasonyi kuli ou lungako.”
25 Oloze vaze tuvihu vakanyine kumwivwilila. Jino uze lunga wangeji akwachile pwevo lyenyi+ nakuvalowelayo haweluka. Kaha vamupikile nakumuyanjisa ufuku wosena palanga nakulungulungu lyakucha, kaha vamwechele nachimenemene.
26 Uze pwevo ejile nachimene nakuholokela kuchikolo chazuvo yayauze kashinakaji kuze kwapwile lunga lyenyi. Asavalile kuze palanga nomu lyatutukile likumbi.
27 Omu lunga lyenyi ahindukile nachimene nakusokolola kuchikolo mangana ayenga ungeji wenyi, amwene pwevo lyenyi kuswanga hamavu kuchikolo chazuvo oku nakwate mavoko enyi hamukwilichi.
28 Kaha amwambile ngwenyi: “Katuka tuyenga.” Oloze ikiye kamukumbulwileko. Uze lunga amuzundwile, amuhakile hachimbulu nakuya nenyi kwimbo lyenyi.
29 Omu ahetele kuzuvo yenyi, ambachile poko nakuteta uze pwevo lyenyi muvipuka 12, kaha atumine chipuka chimwe chimwe mungalila hingalila yavaIsalele.
30 Vosena vaze vamwene chuma kana vambile ngwavo: “Chuma kanechi kanda chisolokengaho lyehi chipwe kuchimona muIsalele putu vene kulikumbi lize valovokele vaIsalele mulifuchi lyaEjipitu palanga nakulikumbi lyalelo. Hunananenuho,* twamenu punga+ mutulweze mwakulingila.”
Kwinyikila Chamwishi
^ Chipwe “mangana mujikijise michima yenu.”
^ Chipwe “mangana mwivwise michima yenu kuwaha.”
^ Chipwe “mangana mujikijise michima yenu.”
^ Hepe., “kumbalaka.”
^ Chipwe pamo, “kaha ngwazachila kuzuvo yaYehova.”
^ Chipwe “Chihakenu kumuchima.”
