Vaka-kuyula 2:1-23
2 Jino kangelo kaYehova+ afumine kuNgilingale+ nakuya kuMbokime. Ambile kuli vaIsalele ngwenyi: “Ngwamilowele mulifuchi lyaEjipitu nakumineha mulifuchi lino ngwalishingile kuli vakakuluka jenu.+ Ngwambile nawa ngwami, ‘Kangweshi kukahokola lushiko lwami ngunalishiki nayenuko.+
2 Kaha enu nawa kanda namulikasa chivwasano navatu vamulifuchi linoko.+ Mupuzule majiko avo akulumbila.’+ Oloze enu kamwevwililile mulizu lyamiko.+ Mwomwo ika munalingila ngocho?
3 Shikaho ngwambilile ngwami, ‘Kangweshi kukahanga vaka-mafuchi ava kumeso enuko,+ oloze navakamitela miheto,+ kaha tulunga twavo nawa navakamihungumwisa.’”+
4 Omu kangelo kaYehova akumishile kuhanjika mazu osena awa kuli vaIsalele, vatu vaputukile kulila namazu akukanguka.
5 Ngocho valukile chihela chize ngwavo Mbokime,* kaha vamuvatwilile Yehova vimuna kuze.
6 Kufumaho, Yoshuwa asuwile vaIsalele, kaha mutu himutu ayile kuuswana wenyi, kumavu enyi aze ahetele.+
7 VaIsalele vazachililenga Yehova hamakumbi aYoshuwa osena, nahamakumbi avakulwane vaze vatwalilileho kuyoya omu alingile Yoshuwa hanafu lyehi, vaze nawa vamwene vyuma vyosena vize Yehova alingilile vaIsalele.+
8 Kaha ngamba yaYehova, Yoshuwa mwanaNune afwile omu apwile namyaka yakusemuka 110.+
9 Ngocho vamufunjile kungalila yenyi kuChiminate-sela,+ yize yatwama kungalila yaEfwalime yajipili kunote yaPili yaNgashe.+
10 Vaka-chisemunwino chize vosena vatokele ngana mwavatu javo,* kaha kwejile chisemunwino cheka chize kachatachikijile Yehova chipwe kwijiva vyuma alingilile vaIsaleleko.
11 Jino vaIsalele valingilenga vyuma vyavipi kumeso aYehova nakuzachilanga* vaMbale.+
12 Ngocho vasezele Yehova Kalunga kavakakuluka javo uze avalowele mulifuchi lyaEjipitu.+ Vazachililenga tulunga twavatu vaze vavajingilikilenga, valifukwilenga kuli vakiko,+ kaha vamwivwishilenga Yehova+ kupihya.
13 Vasezele Yehova nakuzachila Mbale navaAshatolete.+
14 Ngocho Yehova akwachilile vaIsalele utenu, avahanyine mumavoko avaka-kuvapupa, kaha vapupile luheto lwavo.+ Avalanjishile kuli vaka-kole javo vaze vavajingilikile,+ kaha kavahashile kwimana cheka kumeso avaka-kole javoko.+
15 Kweshokwo vayilenga, Yehova avamweneselenga vihuli+ nge muze avalwezele Yehova, nge muze nawa alishingile Yehova kuli vakiko.+ Ngocho vayanjilenga chikuma.+
16 Kaha Yehova avatongwelelenga vaka-kuyula vaze vavayowelenga mumavoko avaka-kuvapupa.+
17 Oloze vakiko kavevwililile kuli vaka-kuvayulako, valingilenga ujila wakushipilitu natulunga veka nakulifukula kuli vakiko. Vapyapumukile washi mujila yize vatambukilenga vakakuluka javo vaze vononokele jishimbi jaYehova.+ Vakiko vahonene kujononoka.
18 Omu Yehova avatongwelele muka-kuvayula,+ Yehova apwilenga nauze muka-kuvayula. Kaha avayowele mumavoko avaka-kole javo hamakumbi osena amuka-kuvayula. Yehova avatetelelele+ havihuli vyavo vavamwenesele kuli vaze vavashinyinyikile,+ navaze vavayanjishilenga.
19 Oloze nge uze muka-kuvayula nafu, kaha vaputukile cheka kulinga vyuma vyavipi kuhambakana navize valingilenga vakakuluka javo, valemeselenga tulunga veka nakulifukula kuli vakiko.+ Kavechele vilinga vyavo vyavipi, nakulikanga chavoko.
20 Kutwala muze Yehova akwachilile vaIsalele utenu,+ kaha ambile ngwenyi: “Hakuwana nge vatu kana ava vanahokola lushiko lwami+ luze ngwashikile vakakuluka javo nakulikanga kuli ami,+
21 shikaho nayami nawa, kangweshi kuhanga vaka-mafuchi kumeso avo vaze asezele Yoshuwa omu afwileko,+
22 mangana ngweseke vaIsalele ngumone numba nge navatambukanga mujijila jaYehova+ ngana muze valingilenga vakakuluka javo nyi chiku.”
23 Ngocho Yehova etavishile vaka-mafuchi kana vatwame. Kavahangilemo washiko, kaha nawa kavahanyine mumavoko aYoshuwako.
Kwinyikila Chamwishi
^ Ulumbunwiso, “Vaka-kulila.”
^ Eyi hindangwishi yize yalumbununa kufwa.
^ Chipwe “nakulemesanga.”
