Vaka-kuyula 20:1-48
-
Navalwa jita navaMbenjamine (1-48)
20 Jino lizavu lyavaIsalele lyosena lyakungulukilile kuMijipa+ kumeso aYehova, vafumine kuNdane+ mbwe nakuMbele-sheva, veka vafumine kungalila yaNgileyate.+
2 Vamyata javatu, vamyata jamiyachi yavaIsalele vosena vemanyine haliyongomena lyavatu jaKalunga. Kaha hapwile namaswalale 400,000 vakulipakata jipoko jamikwale vaze vatambukilenga hamavu.+
3 VaMbenjamine vevwile ngwavo malunga vavaIsalele vanayi kuMijipa.
Jino malunga vavaIsalele vambile kuli uze kaLevi ngwavo: “Tulweze. Uno chuma kanechi chachipi chasolokele ngachilihi?”+
4 Kaha uze kaLevi,+ lunga lyauze pwevo vajihile akumbulwile ngwenyi: “Ngwayile kuNgiveya,+ kunganda yavaMbenjamine napwevo lyami mangana ngukasavaleko likumbi limwe.
5 Vatu* vakuNgiveya vangukatukilile naufuku nakujingilika zuvo ngwapwile. Vasakile ngwavo vangujihe, oloze vapikililemo pwevo lyami kaha afwile.+
6 Ngocho ngwambachile mujimba wenyi, ngwautetele muvipuka nakuvituma kujingalila javaIsalele josena,+ mwomwo valingile chuma chasonyi chikuma, chakwivwisa unyengwe muIsalele.
7 Shikaho enu vaIsalele muvosena, twamenu punga mutulweze mwakulingila.”+
8 Jino vatu vosena valikashile ngwavo: “Kakweshi mutu mwaya kumbalaka yenyi chipwe kukinduluka kuzuvo yenyiko.
9 Omu mukiko natulinga nganda yaNgiveya: Natusakula malunga kuzachisa tutachikijilo+ tuyenga nakulukuka nganda kana.
10 Natusakula malunga 10 hamalunga 100 vakumiyachi yavaIsalele yosena, namalunga 100 hamalunga 1,000, namalunga 1,000 hamalunga 10,000 vakungulwile vaka-jita vyakulya mangana vakalukuke Ngiveya, nganda yavaMbenjamine hachuma chakwivwisa unyengwe vanalingi muIsalele.”
11 Shikaho malunga vavaIsalele vosena valinungile hamwe mangana vanyemukile nganda kana.
12 Jino miyachi yavaIsalele yatumine malunga kumuyachi waMbenjamine, vavambile ngwavo: “Ika munalingila chuma kanechi chachipi?
13 Shikaho tuhanenu ovo malunga vatuvihu vamuNgiveya+ tuvajihe mangana tufumise upi muIsalele.”+ Oloze vaMbenjamine vakanyine kwivwilila mazu vahanjikile vandumbwavo vaIsalele.
14 Ngocho vaMbenjamine vafumine kujinganda javo, valikungulwilile kuNgiveya mangana valwenga jita namalunga vavaIsalele.
15 Halikumbi lize vaMbenjamine vakungulwile malunga 26,000 vakulipakata jipoko jamikwale kufuma mujinganda javo, namalunga 700 vaze vasakwile muNgiveya.
16 Hali ava vaka-kwasa jita hapwile namalunga 700 vaze vashilenga vikapa namavoko avo avimoswe. Mutu himutu apwilenga natongo yakwasa, kaha kalwezelengako.*
17 Malunga vavaIsalele vakulipakata jipoko jamikwale vosena+ vapwile 400,000 chakuzeneka kulavilako vaMbenjamine. Vosena vapwile vakuluwa mukwasa jita.
18 Kaha vaIsalele vakatukile, vayile kuMbetele mangana vakamwihule Kalunga.+ Vamwihwile ngwavo: “Veya navatutetekela kuya nakulwa jita navaMbenjamine?” Yehova akumbulwile ngwenyi: “VaYuta vakiko navamitetekela.”
19 Kufumaho vaIsalele vakatukile nachimene, vakatungile chilombo chavo mangana valukuke Ngiveya.
20 Vaze malunga vavaIsalele valovokele vakalwe navaMbenjamine. Vatambukile mumazavu akulongesa kanawa nakulukuka vaMbenjamine kuNgiveya.
21 Kaha vaMbenjamine valovokele muNgiveya, vajihile malunga vavaIsalele 22,000 halikumbi lize.
22 Lichako malunga vavaIsalele vomikile mangana vayenga cheka mumazavu avo akulongesa kanawa vakalwe jita kuchihela vene kuze vazungililile hakavanga.
23 VaIsalele vayile cheka kuMbetele, valilile kumeso aYehova palanga nakuchingoloshi, kaha vamwihwile Yehova ngwavo: “Uno tuyenga cheka nakulwa jita navandumbwetu vaMbenjamine tahi?”+ Yehova avambile ngwenyi: “Yenunga mukalwe navo.”
24 Ngocho vaIsalele vapandamine kuli vaMbenjamine halikumbi lyamuchivali.
25 VaMbenjamine valovokele muNgiveya nakulwa jita navaIsalele halikumbi lyamuchivali, kaha vajihile cheka malunga vavaIsalele 18,000,+ vosena vapwile malunga vakulipakata jipoko jamikwale.
26 Jino malunga vavaIsalele vayile nawa kuMbetele, kaha valilile kumeso aYehova.+ Valijilikile kulya+ palanga nakuchingoloshi, kaha vahanyine nawa mawana akulumba+ namawana akusolola kuunda+ kumeso aYehova.
27 Vaze malunga vavaIsalele vahulishile Yehova,+ mwomwo chikasha chalushiko lwaKalunga wamuchano chapwile kuze hamakumbi aze.
28 Jino Fwinehase+ mwanaEleyaza, Eleyaza mwanaAlone ikiye apwile nakuzachila* kuchikasha halwola luze. Kaha vahulishile ngwavo: “Uno tuyenga cheka nakulwa jita navandumbwetu vaMbenjamine tahi, nyi tulitwamine?”+ Yehova avakumbulwile ngwenyi: “Yenunga, mwomwo hamene nanguvahana mumavoko enu.”
29 Jino vaIsalele vasakwile malunga vamwe vaswame+ kunganda yaNgiveya yosena jingulwishi ndo.
30 VaIsalele vakatukilile vaMbenjamine halikumbi lyamuchitatu, vatambukile mumazavu akulongesa kanawa mangana vakalukuke Ngiveya nge muze valingile hakavanga.+
31 VaMbenjamine valovokele mangana valwenga namalunga vavaIsalele, ngocho vaMbenjamine vavasosolwele nakuseza nganda yavo hahasuku.+ Jino nge muze valingilenga makumbi osena, valukukile vaIsalele, kaha vajihile vamwe mujila yakuya kuMbetele nayeyi yakuya kuNgiveya. Vajihile malunga vavaIsalele 30 nakuvaseza muze kuswanga.+
32 Ngocho vaMbenjamine vambile ngwavo: “Vali nakulindumuka kumeso etu nge muze chapwanga hakavanga.”+ Oloze vaIsalele vambile ngwavo: “Tuvachinenu mangana tuvasosolole kwakusuku nanganda yavo nakuvaneha kujijila.”
33 Jino malunga vavaIsalele vosena vafumine kuze vapwile, vayile nakukemana kuMbale-tamale, kaha vaze vaswamine nawa vasolomokele kuvihela vapwile kwakamwihi naNgiveya.
34 Malunga vavaIsalele 10,000 vaze vasakwile valukukile Ngiveya, kaha jita kana yatohwele. Oloze vaMbenjamine kavatachikijile ngwavo vali mupondeko.
35 Yehova afungulwile vaMbenjamine+ kumeso avaIsalele, kaha halikumbi lize vaIsalele vajihile malunga vavaMbenjamine 25,100. Vosena vapwile malunga vakulipakata jipoko jamikwale.+
36 VaMbenjamine vashinganyekele ngwavo malunga vavaIsalele natuvafungulula mwomwo vali nakuchina,+ oloze vaIsalele vachinyine mwomwo vafwelelele vakwavo vaze vaswamine kuNgiveya.+
37 Malunga vaze vaswamine, valovokele washiwashi nakulukuka nganda yaNgiveya. Kaha valimwangile munganda yosena, vajihile vatu najipoko jamikwale.
38 Malunga vavaIsalele valivwasanyine navaze vaswamine kunganda vakafwinjise wishi munganda kupwa chinjikizo.
39 Omu vaIsalele valumukile nakuchina jita, vaMbenjamine vaputukile kuvahangasana, vajihile malunga vavaIsalele kafwe 30,+ mwomwo vambile ngwavo: “Vali nakulindumuka kumeso etu chikupu nge muze chapwanga mujita yakavanga.”+
40 Jino uze wishi wachinjikizo waputukile kufwinda muze munganda nakupwa panda yawishi. Omu malunga vavaMbenjamine vatalile kunyima, vamwene nganda yosena yinakwate kakahya, kaha milangi yinakaheta namwilu.
41 Ngocho malunga vavaIsalele valumukilile vaMbenjamine, kaha vaMbenjamine valizuzukilile mwomwo vamwene ngwavo vali muukalu.
42 VaMbenjamine vachinyine malunga vavaIsalele nakutalisa mupambo, oloze vavahangasanyine. Kaha malunga vaze valukukile nganda valifutwile navaIsalele vakwavo nakujiha vaMbenjamine.
43 Vakuchikile vaMbenjamine nakuvahangasana lika chakuhona kuzeya. Vavalyatangilile swi nakumusamuko waNgiveya.
44 Kaha malunga vavaMbenjamine 18,000 vafwile, vosena vapwile lika vaka-kwasa jita vangolo.+
45 Jino malunga vavaMbenjamine vaze vasalileho valumukile mangana vachinyine mupambo, kulilolwa lyaLimone,+ kaha vaIsalele vajihileho malunga 5,000 mujila. Vavahangasanyine lika nakuNgitome, kaha vajihileho cheka malunga 2,000.
46 Malunga vavaMbenjamine vakulipakata jipoko jamikwale+ vaze vafwile halikumbi lize vapwile 25,000, vosena vapwile lika vaka-kwasa jita vangolo.
47 Kaha veka 600 vaze vasalileho vachinyinyine kulilolwa lyaLimone mupambo, kaha vaswamine kulilolwa lize hatukweji vawana.
48 Jino malunga vavaIsalele vakindulukile, kaha vajihile vaMbenjamine vaze vasalile munganda najipoko jamikwale, kuputukila kuvimuna swi nakuvatu. Kaha vochele nawa jinganda jize vawanyine mujila nakakahya.
Kwinyikila Chamwishi
^ Chipwe pamo, “Venyangalila.”
^ Hepe., “Vosenava vahashile kwasa lukambu namalolwa muvikapa vyakwashisa chakuzeneka kulweza.”
^ Hepe., “nakwimana.”
