Vaka-kuyula 21:1-25
-
Navayovola muyachi waMbenjamine (1-25)
21 Jino malunga vavaIsalele valishingile kuMijipa+ ngwavo: “Muli etu kanda mupwa mutu mwakahangisa mwanenyi wapwevo kuli lunga wakumuyachi waMbenjamineko.”+
2 VaIsalele vejile kuMbetele+ kumeso aKalunga wamuchano, kaha vatwamine kuze nakulila jimbimbi palanga nakuchingoloshi.
3 Vambile ngwavo: “Ove Yehova Kalunga kaIsalele, mwomwo ika chuma kanechi chinasolokela muIsalele? Mwomwo ika hamiyachi yavaIsalele nahalihonena muyachi umwe?”
4 Jino lichako, vatu vahindukile chimenemene nakutunga lijiko lyakulumbila kuze, kaha vahanyine mawana akulumba namawana akusolola kuunda.+
5 VaIsalele vambile ngwavo: “Muyachi muka hamiyachi yavaIsalele uze unazeneka kwiza nakwimana kumeso aYehova?” Mwomwo valishingile lushingo ngwavo weshowo mwakahona kwiza nakwimana kumeso aYehova kuMijipa vakamujihe.
6 Ngocho vaIsalele vevwile ushona havyuma vyasolokele kuli vandumbwavo vaMbenjamine. Vambile ngwavo: “Likumbi lyalelo muyachi umwe vanaufumisaho hali vaIsalele.
7 Natulinga ngachilihi mangana vaMbenjamine vaze vanalituluho tuvahane mapwevo, hakuwana nge twalishingile lyehi kuli Yehova+ ngwetu katweshi kukahangisa vana vetu vamapwevo kuli vakikoko?”+
8 Valihulishile ngwavo: “Muyachi muka hamiyachi yavaIsalele uze unazeneka kwiza nakwimana kumeso aYehova kuMijipa?”+ Halwola kanelu, kuYaveshe-ngileyate kakwapwile mutu umwe ejile kuchilombo kuze valikungulwilile vaIsaleleko.
9 Kahomu valavile vatu vosena, vawanyine vene nge kuYaveshe-ngileyate kakwafumine mutu numba umweko.
10 Ngocho vaze vakungulukile kuze vatumine malunga vangolo vaka-kwasa jita 12,000. Vavalwezele ngwavo: “Yenu mukajihe vatu vakuYaveshe-ngileyate najipoko jamikwale, kajihenu mapwevo navanyike.+
11 Kalingenu ngana: Kanongesenu malunga vosena vaze valisavalaho lyehi namapwevo, namapwevo nawa vaze valisavalaho lyehi namalunga.”
12 Havatu vaze vatwaminenga kuYaveshe-ngileyate vakawanyineho vana vamapwevo 400 vaze kanda valisavalengaho lyehi namalunga. Vaze mapwevo vavanehele kuchilombo chize vatungile kuShilo,+ mulifuchi lyaKanane.
13 VaIsalele vaze valikungulwilile hamwe, vatumine mazu kuli vaMbenjamine vaze vaswamine kulilolwa lyaLimone+ vakavalweze ngwavo jita yinakumu.
14 Vaze vaMbenjamine vejile, vavahanyine mapwevo vaze valamine vavatonyi kufuma kuYaveshe-ngileyate.+ Oloze kavavazukileko.
15 VaIsalele vevwile ushona havyuma vyasolokele kuli vaMbenjamine+ mwomwo Yehova avahandwile kumiyachi yikwavo yavaIsalele.
16 Shikaho vakulwane valizavu lyavaIsalele vambile ngwavo: “Natulinga ngachilihi mangana vaMbenjamine vaze vanalituluho tuvahane mapwevo, hakuwana nge mapwevo vavaMbenjamine vosena vanavajihi?”
17 Vakumbulwile ngwavo: “VaMbenjamine vaze vanayovoka vatela kupwa nauswana wavo, kuchina muyachi wavo naunonga muli vaIsalele.
18 Etu katweshi kuhasa kuvahana vana vetu kupwa mapwevo javoko, mwomwo vaIsalele valishingile lyehi ngwavo: ‘Weshowo mwahangisa mwanenyi wapwevo kuli vaMbenjamine apwenga wakwangula.’”+
19 Kaha vambile ngwavo: “Mwaka himwaka kweji kupwanga chiwanyino chaYehova kuShilo+ yize yapwila kunote yaMbetele, kumututuko wajila yize yakanduka kufuma kuMbetele nakuya kuShekeme, nakusulo yaLevona.”
20 Shikaho valwezele malunga vavaMbenjamine ngwavo: “Yenu mukaswame mumande amivinyo.
21 Kahomu namukamona vana vamapwevo vakuShilo navalovoka nakukina oku vali nakujinguluka, mutu himutu akafume kuze aswamanga, akakwateho umwe kupwa pwevo lyenyi. Kufumaho mukakinduluke kungalila yavaMbenjamine.
22 Kachi nge masevo chipwe vandumbwavo navakeza nakutwihula, kaha natukavalweza ngwetu: ‘Twivwilenu uselewa hakukafwa malunga kana, mwomwo mapwevo twakwachile kujita+ vavandende, kaha kavazukile mutu himutuko. Kahenu nawa kamweshi kuhasa kuvahana vana venu vamapwevo chakuzeneka kupwa namulongako.’”+
23 Vaze malunga vavaMbenjamine valingile vene ngocho, mutu himutu ambachile pwevo lyenyi hamapwevo vaze vapwile nakukina. Kufumaho vakindulukile kuuswana wavo, vakatungulwile jinganda+ javo nakutwamangamo.
24 Ngocho vaIsalele vafumine kuze vapwile, mutu himutu ayile kumuyachi wenyi, nakutanga yenyi, nakuuswana wenyi.
25 Hamakumbi aze, muIsalele+ kamwapwile mwanganako. Mutu himutu alingilenga muze amwene* ngwenyi mwakwoloka.
Kwinyikila Chamwishi
^ Chipwe “muze ashinganyekele.”
