Vaka-kuyula 3:1-31
3 Ava vakiko vaka-mafuchi vaze Yehova asezele mulifuchi, mangana veseke vaIsalele vosena vaze kanda vazungeho lyehi jijita jakuKanane+
2 (alingile ngocho mangana vaIsalele vamuvisemunwino vyakavangijileho vaze kanda vazungeho lyehi jita valinangule mwakwashila jita):
3 Asezele vamyata vatanu vavaFwilishite,+ navaKanane, navaShitone,+ navaHivi+ vaze vatwaminenga kuPili yaLevanone,+ kufuma kuPili yaMbale-helemone swi nakuLevo-hamate.*+
4 Ava vaka-mafuchi vesekelenga vaIsalele vamone numba nge navononoka jishimbi jaYehova jize alwezele vakakuluka javo kuhichila muli Mose.+
5 Ngocho vaIsalele vatwaminenga muli vaKanane,+ navaHete, navaAmole, navaPeliji, navaHivi, navaYevuse.
6 VaIsalele vambachilenga vana vavaka-mafuchi awa kupwa mapwevo javo, kaha vahangishilenga nawa vana vavo vamapwevo kuli vana vamalunga vavaka-mafuchi awa. Kaha vaputukile kuzachila tulunga twavo.+
7 VaIsalele valingilenga vyuma vyavipi kumeso aYehova, vavulyamine Yehova Kalunga kavo nakulemesa vaMbale+ najipanda jajila jamitondo.*+
8 Ngocho Yehova akwachilile vaIsalele utenu nakuvahana mumavoko aKushane-lishataime mwangana waMesopotamya.* Kaha vaIsalele vazachililenga Kushane-lishataime hamyaka 8.
9 Omu vaIsalele vatwile kawelele kuli Yehova,+ Yehova avatongwelele mulwilo mangana avalwile,+ Otonyele+ mwanaKenaze, songo yaKaleve.
10 Shipilitu yaYehova yejile hali ikiye,+ kaha ayulilenga vaIsalele. Omu ayile nakulwa jita, Yehova ahanyine Kushane-lishataime mwangana waMesopotamya* mumavoko enyi, kaha amufungulwile.
11 Kaha mulifuchi mwapwile kuunda hamyaka 40. Jino Otonyele mwanaKenaze afwile.
12 VaIsalele vaputukile cheka kulinga vyuma vyavipi kumeso aYehova.+ Kaha Yehova etavishile Engelone mwangana waMowave+ afungulule vaIsalele mwomwo valingile vyuma vyavipi kumeso aYehova.
13 Avakatwilile nawa vaAmone+ navaAmaleke+ mangana vavazungise. Kaha vanyemukilile vaIsalele nakuvatambula nganda yavo yamikoma.+
14 VaIsalele vazachililenga Engelone mwangana waMowave hamyaka 18.+
15 Jino vaIsalele vatwile kawelele kuli Yehova,+ kaha Yehova avatongwelele mulwilo,+ Ehute+ mwanaNgela kaMbenjamine,+ lunga uze azachishilenga livoko lyachimoswe.+ Kutwala muze vaIsalele vahanyine milambu Ehute mangana atwale kuli Engelone mwangana waMowave.
16 Jino Ehute afulile poko yenyi yamukwale yauvela kuvali, yapwile kuvite* yimwe muusuku. Kaha ayingishile muuvwalo wenyi kutungi yenyi yachilyo.
17 Omu Ehute ahetele kuli Engelone mwangana waMowave, amuhanyine yize milambu. Engelone apwile mutu wamunene chikuma.
18 Omu Ehute akumishile kumuhana yize milambu, akindulukile navatu vambachile yize milambu.
19 Kahomu vahetele kumakombelo akusonga* kuNgilingale,+ akindulukile kuli mwangana, kaha amulwezele ngwenyi: “Ove mwangana, nguli nakusaka kukulwezako mujimbu wakusweka.” Jino mwangana ambile ngwenyi: “Twehukenu.”* Ngocho vangamba jenyi vosena valovokele.
20 Ehute apandamine kuli ikiye kukapete kenyi kahelu katuta. Amulwezele ngwenyi: “Nguli nakusaka kukulwezako mujimbu wakufuma kuli Kalunga.” Kaha mwangana akatukile muchitwamo chenyi.
21 Ehute asolomwene poko yamukwale nalivoko lyenyi lyachimoswe kutungi yenyi yachilyo nakutuva hajimo lyamwangana.
22 Kaha nachikundo chayo chengilile chosena mujimo, kaha maji afwikile kuze kupoko, mwomwo kayisomwene mujimo lyenyiko. Ngocho natuji twalovokele.
23 Ehute alovokelele musenge,* nakuseza mapito akuze kukapete kahelu akusoka, akupata.
24 Omu alingile hanayi lyehi, vangamba jamwangana vejile, vamwene kuvikolo vyakapete kahelu kwakupata. Kaha vambile ngwavo: “Pamo ali nakulihehwa* kukapete kenyi kamukachi.”
25 Vavandaminyine palanga nomu vazeyele. Kahomu vamwene ngwavo keshi nakusokolola kuvikolo vyakapete kaheluko, vambachile sapi nakusokololako, kaha vawanyine mwata wavo kuswanga hamavu nafu.
26 Ehute achinyine shimbu vapwile nakulangisa vaze vangamba, kaha ahichile kuze kumakombelo akusonga*+ nakuchinyina kuSeila.
27 Omu ahetele kungalila yajipili yaEfwalime,+ embile luneta,+ kaha vaIsalele vafumine kuze kujipili nakuya nenyi hamwe oku ikiye ali kulutwe lwavo.
28 Ambile kuli vakiko ngwenyi: “Ngukavangizenu, mwomwo Yehova nahane vaka-kole jenu, vaMowave mumavoko enu.” Ngocho vamukavangijile, kaha vayile nakwimanyina kuuzaukilo wavaMowave kumwava waYotau. Kaha kavetavishile mutu kuzaukako.
29 Vajihile malunga vangolo vavaMowave kafwe 10,000.+ Kakwapwile lunga umwe ayovokeleko.+
30 Ngocho halikumbi lize vaMowave vavafungulwile kuli vaIsalele, kaha mulifuchi mwapwile kuunda hamyaka 80.+
31 Omu afwile Ehute, mwashishile nawa Shamangale+ mwanaAnate, kaha ajihile vaFwilishite 600+ namumba wakutambukisa vangombe.+ Kaha naikiye alwilile vaIsalele.
Kwinyikila Chamwishi
^ Chipwe “nakuwingililo wakuHamate.”
^ Tala Mukana waMazu.
^ Hepe., “waAlame-nahalaime.”
^ Hepe., “waAlame.”
^ Pamo yapwile kuvite yayihi kafwe jisendimita 38. Tala Chihande B14.
^ Chipwe pamo, “vahetele kuchilolwa.”
^ Hepe., “Holenu kulu.”
^ Chipwe pamo, “alovokelele kuwingililo wapeho.”
^ Hepe., “nakulifwika kumahinji enyi.”
^ Chipwe pamo, “kuze kuchilolwa.”
