Vaka-kuyula 4:1-24
4 Omu alingile Ehute hanafu lyehi, vaIsalele vaputukile cheka kulinga vyuma vyavipi kumeso aYehova.+
2 Ngocho Yehova avahanyine mumavoko aYavine mwangana waKanane+ uze ayulilenga muHazole. Kapitau kamaswalale jenyi apwile ikiye Shisela, uze atwaminenga kuHaloshete+ yavaka-mafuchi.*
3 Jino vaIsalele vatwile kawelele kuli Yehova,+ mwomwo Yavine apwile namatemba ajita 900,+ matemba aze apwile najipoko jamikwale kutufumbo twawo, kaha ayanjishilenga vaIsalele+ hamyaka 20.
4 Kapolofweto+ Ndevola uze apwile pwevo lyaLapitote, ikiye ayulilenga vaIsalele halwola luze.
5 Atwaminenga mwishi yamukoma waNdevola uze wapwilenga mukachi kaLama+ naMbetele,+ kungalila yaEfwalime yajipili. Kaha vaIsalele vayilenga kuli ikiye avayule.
6 Jino Ndevola asanyikile Mbalake+ mwanaAvinowame kufuma kuKeteshe-nafwatale,+ kaha ambile kuli ikiye ngwenyi: “Yehova Kalunga kaIsalele nambe ngwenyi: ‘Yako kuPili yaTavole hamwe namalunga 10,000 vakuli vaNafwatale navaZevulune.
7 Nangukakunehela Shisela kapitau kamaswalale jaYavine, namatemba enyi ajita, namaswalale jenyi kumwanakalwiji Kishone,+ kaha nangukamuhana mumavoko ove.’”+
8 Kaha Mbalake ambile kuli Ndevola ngwenyi: “Kachi nge nawitava kuya nayami hamwe, kaha natuya, oloze nge mukana, kaha nayami kangweshi kuyako.”
9 Ndevola ambile kuli ikiye ngwenyi: “Nanguya nayove hamwe. Oloze jita muya nakulwa kayeshi kukakunehela ulemuko, mwomwo Yehova mwakahana Shisela+ mumavoko apwevo.” Kaha Ndevola ayile naMbalake hamwe kuKeteshe.+
10 Mbalake asanyikile vaNafwatale+ navaZevulune valiwanyine kuKeteshe, kaha malunga 10,000 vamukavile. NaNdevola ayile nenyi hamwe.
11 Jino Hevele kaKene ahandukile kuli vaKene,+ vana vaHovave isewenu yaMose,+ kaha akajikile mbalaka yenyi kwakamwihi namutondo waunene wakuZananyime kuKeteshe.
12 Shisela vamulwezele ngwavo Mbalake mwanaAvinowame nakanduka kuPili yaTavole.+
13 Hahaze vene Shisela akungulwile matemba enyi ajita osena 900, matemba aze apwile najipoko jamikwale kutufumbo twawo, namaswalale vosena vaze apwile navo hamwe. Vafumine kuHaloshete kungalila yavaka-mafuchi nakuya kumwanakalwiji Kishone.+
14 Ndevola ambile kuli Mbalake ngwenyi: “Yako uvalukuke, mwomwo likumbi lyalelo Yehova mwahana Shisela mumavoko ove. Yehova ali kulutwe lwove.” Kaha Mbalake ashikumukile kuPili Tavole navaze malunga vaka-jita 10,000.
15 Jino Yehova aluwanganyishile+ Shisela namatemba enyi ajita osena, namaswalale jenyi vosena kumeso aMbalake mangana avajihe najipoko jamikwale. Kaha Shisela asulukile halitemba lyenyi nakuchina jimbushi.
16 Mbalake ahangasanyine vaka-matemba ajita namaswalale vosena swi nakuHaloshete kungalila yavaka-mafuchi. Ngocho maswalale jaShisela vosena vafwile kujipoko jamikwale. Kaha naumwe wauchi alitulileho.+
17 Oloze Shisela achinyine jimbushi nakuya kumbalaka yaYayele+ pwevo lyaHevele+ kaKene, mwomwo Yavine+ mwangana waHazole atwaminenga mukuunda navaze vakuzuvo yaHevele kaKene.
18 Yayele alovokele haweluka nakukikilila Shisela, kaha amwambile ngwenyi: “Ove mwata wami, twaya wingile mumbalaka yami, kanda nawivwa womako.” Shisela etavile nakwingila mumbalaka yenyi, kaha amufwikile lipayi.
19 Jino Shisela ambile kuli Yayele ngwenyi: “Nguhaneko tumeya ngunwenga ngunafu lipwila.” Ngocho akasunwine kutuku yamavele nakumuhana anwenga,+ kufumaho amufwikile cheka.
20 Shisela amwambile ngwenyi: “Imana kuchikolo chambalaka, kachi nge nakwiza mutu nakukwihula ngwenyi, ‘Unamonoko lunga umwe kuno nyi?’ Mulweze ngwove, ‘Nduma.’”
21 Jino Yayele pwevo lyaHevele ambachile lumbambo lwakumbalaka namalitelo. Kahomu Shisela apwile mutulo mwomwo yakuzeya, ayile kuli ikiye nakulivemba, amupapalilile lumbambo mumbalakavachingule, kaha lwengilile namumavu. Ngocho afwile.+
22 Omu Mbalake apwile nakuhangasana Shisela, Yayele alovokele haweluka nakumukikilila, kaha amwambile ngwenyi: “Twaya ngukulweze okwo kuli lunga ou uli nakutondatonda.” Mbalake engilile muze mumbalaka, kaha awanyine Shisela kuswanga nafu, nalumbambo lwenyi mumbalakavachingule.
23 Ngocho Kalunga afungulwile Yavine mwangana waKanane kumeso avaIsalele halikumbi lize.+
24 VaIsalele vakwachile lika ngolo nakuya nakulwa jita naYavine mwangana waKanane+ palanga nomu vamujihile.
Kwinyikila Chamwishi
^ Chipwe “kuHaloshete-ha-ngoyime.”
