Vaka-kuyula 6:1-40
6 VaIsalele vaputukile cheka kulinga vyuma vyavipi kumeso aYehova,+ kaha Yehova avahanyine mumavoko avaMichane myaka 7.+
2 VaMichane vaputukile kuyanjisa vaIsalele.+ Ngocho vaIsalele valitungilile vihela vyakuswama* kujipili, nakumena akusendeveka, nakuvihela vyavikalu kuhetako.+
3 Omu vaIsalele vakuvilenga jimbuto, vaMichane navaAmaleke,+ navaka-Mututuko+ vejilenga nakuvanyemukila.
4 Vatungilenga vilombo vyavo jingulwishi mangana valukuke vaIsalele nakwenyeka jimbuto javo kuze, kuheta nakuNgaza. Kaha muIsalele kavaselemo vyakulya, chipwe mikoko, chipwe vangombe, chipwe vimbuluko.+
5 Hakwiza nakutunga vilombo vyavo, vejilenga navimuna javo najimbalaka javo. Vavulile chikuma kwijiva nge vambimba makumbi,+ navangamela javo nawa kavahashile kuvalavako.+ Kaha vengililenga mulifuchi mangana valyenyeke.
6 VaIsalele vengilile chikuma muuhutu mwomwo yavaMichane, ngocho vatwile kawelele kuli Yehova.+
7 Omu vaIsalele vatwile kawelele kuli Yehova mwomwo yavaMichane,+
8 Yehova avatuminyine kapolofweto, kaha avalwezele ngwenyi: “Yehova Kalunga kaIsalele nambe ngwenyi, ‘Ngwamilowele muEjipitu, muzuvo yaundungo.+
9 Ngwamiyowele mumavoko avaEjipitu, namumavoko avaka-kole jenu vosena, kaha ngwavahangile kumeso enu nakumihana lifuchi lyavo.+
10 Kaha ngwambile kuli enu ngwami: “Ami yami Yehova Kalunga kenu.+ Kanda namwivwa woma tulunga vavaAmole mulifuchi eli muli nakutwamako.”+ Oloze enu kamwangwononokeleko.’”*+
11 Jino kangelo kaYehova ejile+ nakutwama mwishi yamutondo waunene wakuOfwola, uze wapwile waYowashe muka-Aviyezele.+ Mwanenyi Ngiteyone+ apwile nakuzungula tiliku muchikamwino chavinyo kuchina vaMichane navayimona.
12 Uze kangelo kaYehova asolokele kuli Ngiteyone, amwambile ngwenyi: “Ove muka-kwasa jita wangolo,+ Yehova ali nayove.”
13 Ngiteyone ambile kuli ikiye ngwenyi: “Ove mwata wami, kachi nge Yehova ali nayetu, mwomwo ika vyuma vyosenevi vili nakutusolokela?+ Vilinga vyenyi vyakukomwesa vize vatulwezele vakakuluka jetu+ ngwavo, ‘Yehova atulowele muEjipitu’+ vili kulihize? Yehova natuseze,+ natuhane mumavoko avaMichane.”
14 Kaha Yehova amutalile nakumwamba ngwenyi: “Jikiza uyenga nakulwila vaIsalele mumavoko avaMichane.+ Ami yami ngunakutumu.”
15 Oloze Ngiteyone ambile kuli ikiye ngwenyi: “Ove Yehova, ami nanguvalwila ngachilihi vaIsalele? Tala, chisaka* chami chapwa chakukuminamo muli vaManase, kahami nawa nguwamokomoko chikuma muzuvo yatata.”
16 Oloze Yehova ambile kuli ikiye ngwenyi: “Nangupwa nayove,+ vaMichane nauvajiha kwijiva nge mutu umwe kaha.”
17 Ngiteyone ambile kuli ikiye ngwenyi: “Kachi nge unangwivwila uselewa, kaha nguhane chinjikizo chakusolola nge ove yove uli nakuhanjika nayami.
18 Kanda ufuma hanoko, kuvanga nguneza nawana wami nakuutumbika kumeso ove.”+ Ikiye amwambile ngwenyi: “Nangutwama kuno palanga nomu naukinduluka.”
19 Ngocho Ngiteyone ayile, akatelekele mwanapembe nakwocha mbolo yakuzeneka chimbalwila yaunga wakuta mulifwa* limwe.+ Ahakile nyama mumutonga nakuhaka musoji mundeho, kaha amutwalililevyo muze mwishi yamutondo apwile.
20 Uze kangelo kaKalunga wamuchano ambile kuli ikiye ngwenyi: “Mbata eyi nyama nambolo yakuzeneka chimbalwila uvihake halilolwa lyalinene lili haze, kaha wichileho musoji.” Alingile vene ngocho.
21 Kaha kangelo kaYehova achokele songo yamukombo uze wapwile mulivoko lyenyi hanyama nahambolo yakuzeneka chimbalwila, kaha kakahya kepukile haze halilolwa nakwocha yize nyama nambolo yakuzeneka chimbalwila.+ Uze kangelo kaYehova afumine kumeso enyi.
22 Ngiteyone atachikijile jino ngwenyi apwile kangelo kaYehova.+
Kaha ambile ngwenyi: “Mama lelo ove Mwata Wakulitulaho Yehova, ngunamono kangelo kaYehova meso nameso.”+
23 Oloze Yehova ambile kuli ikiye ngwenyi: “Kuunda chipwenga nayove. Kanda nawivwa womako,+ kaweshi kufwako.”
24 Ngiteyone atungilile Yehova lijiko lyakulumbila kuze, valilukile ngwavo Yehova-shalome.*+ Kaha nakulelo kulichili kuOfwola, kunganda yavaka-Aviyezele.
25 Yehova ambile kuli ikiye naufuku uze ngwenyi: “Mbata mwanangombe wakuji waiso, mwanangombe wamuchivali wamyaka 7, uyenga ukashiule lijiko lyaiso lyakulumbila mawana kuli Mbale, ukatete nawa panda yajila yamutondo* yize yiliko.+
26 Kamutungile Yehova Kalunga kove lijiko lyakulumbila hachihela chino chakukingiwa. Ukalitunge namalolwa akwala kanawa. Kaha ukambate uze mwanangombe wakuji wamuchivali, ukamulumbe kupwa wana wakulumba hajikunyi japanda yajila yamutondo* yize mukateta.”
27 Ngocho Ngiteyone ambachile malunga 10 havangamba jenyi, kaha alingile nge muze amulwezele Yehova. Oloze avilingile naufuku keshi namusanako mwomwo evwile woma vaze vakuzuvo yaise navatu vamunganda kana.
28 Omu malunga vamunganda vahindukile chimenemene, vawanyine lize lijiko lyakulumbila lyaMbale vanalipuzula, napanda yajila yamutondo* yize yapwileko nawa vanayitete, kaha vanalumbu namwanangombe wakuji wamuchivali halijiko lyakulumbila lyalihya lize vatungile.
29 Jino valihulishile ngwavo: “Iya nalingi chuma kanechi?” Omu valingile hivanatondotondo lyehi unjiho, vambile ngwavo: “Ngiteyone mwanaYowashe ikiye nalingi chuma kana.”
30 Vaze malunga vamunganda vambile kuli Yowashe ngwavo: “Tulowele mwanove tumujihe, mwomwo napuzula lijiko lyakulumbila lyaMbale nakuteta panda yajila yamutondo* yize yapwangako.”
31 Kaha Yowashe+ ambile kuli vosena vaze vamukatukilile ngwenyi: “Namumuhakwila ngachilihi Mbale? Namusaka mumulwile nyi? Weshowo mwamuhakwila vamujihe chimene chino.+ Kachi nge hikalunga, kaha alihakwile ivene+ mwomwo vanapuzula lijiko lyenyi lyakulumbila.”
32 Yowashe alukile Ngiteyone lijina halikumbi lize ngwenyi, Yelumbale,* mwomwo ngwenyi: “Mbale alihakwile ivene mwomwo vanapuzula lijiko lyenyi lyakulumbila.”
33 VaMichane,+ navaAmaleke,+ navaka-Mututuko vosena valikungulwile hamwe,+ vayile* nakutunga chilombo chavo muChinema* chaYezelele.
34 Jino shipilitu yaYehova yejile hali* Ngiteyone,+ kaha embile luneta,+ ngocho vaka-Aviyezele+ valikungulwile nakumukafwa.
35 Ngiteyone atumine valuwa kuli vaManase vosena, kaha vejile nakumukafwa. Atumine nawa valuwa kuli vaAshele, nakuli vaZevulune, nakuli vaNafwatale, kaha vejile kuli ikiye.
36 Jino Ngiteyone ambile kuli Kalunga wamuchano ngwenyi: “Kachi nge nauyovola vaIsalele kuhichila muli ami nge muze unangushiki,+
37 kaha mana ngwalenga mangona amikoko kuchizungwilo, jino nge hamangona nahapwa lyume, oloze hamavu hosena nahapwa hachau, kaha nangutachikiza ngwami kumana nauyovola vaIsalele kuhichila muli ami nge muze unangushiki.”
38 Kahomu mukiko chapwile. Omu ahindukile chimenemene, akamwine lyume kuze kumangona amukoko nakuzalisa chiloso chachinene chato nameya.
39 Ngiteyone ambile cheka kuli Kalunga wamuchano ngwenyi: “Mana ngukulombe cheka, kanda ungukwachila utenuko. Ngwitavise ngweseke cheka kamwe kaha nawawa mangona amukoko. Hamangona hapwenga hachau, oloze hamavu hosena hapwenga lyume.”
40 Omu mukiko alingile Kalunga naufuku uze, hamangona hapwile hachau, oloze hamavu hosena hapwile lyume.
Kwinyikila Chamwishi
^ Chipwe pamo, “vihela vyakutulikila vyamumavu.”
^ Hepe., “kamwevwililile mulizu lyamiko.”
^ Hepe., “likombakaji.”
^ Lifwa limwe lyapwile kafwe jilita 22. Tala Chihande B14.
^ Ulumbunwiso, “Yehova Ikiye Kuunda.”
^ Tala Mukana waMazu.
^ Tala Mukana waMazu.
^ Tala Mukana waMazu.
^ Tala Mukana waMazu.
^ Ulumbunwiso, “Mbale Alihakwile.”
^ Chipwe “vazaukile kalwiji.”
^ Chipwe “muChana.”
^ Hepe., “yafwikile.”
