Vaka-kuyula 7:1-25
7 Jino Yelumbale chipwe ngwetu Ngiteyone+ navatu vosena vaze apwile navo vahindukile chimenemene, vayile nakutunga chilombo chavo kukaselwoke kaHalote, oku chilombo chavaMichane chili kupili yaMole kuchinema,* kunote yachilombo chavo.
2 Kaha Yehova ambile kuli Ngiteyone ngwenyi: “Vatu uli navo vanavulu chikuma, kangweshi kuhasa kuhana vaMichane mumavoko oveko,+ kuchina vaIsalele navakalisasa nakwamba kuli ami ngwavo, ‘Tunalilwili mungolo jetu.’+
3 Shikaho vilika kuvatu ava ngwove, ‘Weshowo nevu woma nakulizuzukila akinduluke kwimbo.’”+ Ngiteyone avesekele namazu awa. Ngocho vatu 22,000 vakindulukile, halitulile kaha vatu 10,000.
4 Yehova ambile cheka kuli Ngiteyone ngwenyi: “Vatu hanga vanavulila lika. Vashikumwise kulwiji mangana ami ngukakwesekelevo kuze. Omu nangukakulweza ngwami ‘Ou mwaya nayove,’ kaha akaye nayove, oloze omu nangukakulweza ngwami, ‘Ou keshi kuya nayoveko,’ kaha kanda akaya nayoveko.”
5 Ngiteyone ashikumukile navaze vatu kulwiji.
Jino Yehova ambile kuli ikiye ngwenyi: “Vaze navakakapa meya namavoko avo, kavahandule kuli vaze navafukama hamambuli avo nakunongama hakunwa meya.”
6 Malunga vaze vakapile meya namavoko avo kukanwa vapwile 300. Oloze vaze vasalileho vosena, vafukamine hamambuli avo nakunongama hakunwa meya.
7 Yehova ambile jino kuli Ngiteyone ngwenyi: “Nangumiyovola kuzachisa malunga ava 300 vanakape meya, nakuhana vaMichane mumavoko enu.+ Kaha vosena vaze vanasaleho vakinduluke kumahyavo.”
8 Omu valingile hivanatambula lyehi vyakulya najineta kuvatu, Ngiteyone asuwile vaze vasalileho vakinduluke kumahyavo, oloze asalile kaha navaze malunga 300. Kaha chilombo chavaMichane chapwile muchinema,+ ikiye apwile kwakulunduka.
9 Jino naufuku, Yehova ambile kuli Ngiteyone ngwenyi: “Yako ulukuke vaka-kole jove, mwomwo ngunavahane lyehi mumavoko ove.+
10 Oloze nge uli nakwivwa woma kuvalukuka, kaha vangila kuyako nangamba yove Pula.
11 Ukevwilila vyuma navakahanjika, kufumaho naukomika* nakuya nakuvalukuka.” Ngocho Ngiteyone nangamba yenyi Pula vayile kusembwa yachilombo chavaka-kole javo.
12 Jino vaMichane, navaAmaleke, navaka-Mututuko+ vosena valikungulwilile muchinema, vapwile vavavulu chikuma kwijiva nge vambimba makumbi. Kaha vangamela javo nawa vavulile+ kwijiva nge usekeseke wakungenge yakalungalwiji.
13 Omu Ngiteyone ahetele kuze, evwile lunga umwe ali nakulweza mukwavo chilota alotele. Amulwezele ngwenyi: “Echi chikiko chilota ngunaloto. Ngwamonanga mbolo yaunga wambale nayingalumukila muchilombo chavaMichane, swi nomu yalivetanga chikuma kumbalaka, kaha yize mbalaka yashiukanga.+ Yatengumunanga yize mbalaka, kaha yize mbalaka hinayilyala hamavu.”
14 Uze mukwavo ambile ngwenyi: “Ocho kacheshi chuma chekako shina poko yamukwale yaNgiteyone+ mwanaYowashe, lunga wakaIsalele. Kalunga nahane vaMichane nachilombo chavo chosena mumavoko enyi.”+
15 Kahomu Ngiteyone evwile chilota kana namazu akuchilumbununa,+ alifukwile kuli Kalunga. Akindulukile kuchilombo chavaIsalele, kaha ambile kuli vakiko ngwenyi: “Katukenu, tuyenu mwomwo Yehova nahane lyehi chilombo chavaMichane mumavoko etu.”
16 Kaha apangile vaze malunga 300 mumazavu atatu nakuvahana jineta+ namilondo yayinene yamupolongwa, kaha muze mumilondo ahakilemo jisoka jakumunyikisa.
17 Ahanjikile kuli vakiko ngwenyi: “Talenu omu nangulinga ami, mangana nayenu mulingemo. Omu nangukaheta kusembwa yachilombo, mukalinga nganomu nangukalinga ami.
18 Omu nangukemba luneta nalizavu lyami hamwe, nayenu nawa mukemba jineta jenu kuchilombo jingulwishi ndo, nakutambakana ngwenu, ‘Poko yamukwale yaYehova, nayeyi yaNgiteyone!’”
19 Ngiteyone navaze malunga 100 apwile navo, vayile kusembwa yachilombo kumaputukilo achilo chamukachi kaufuku,* oku vaka-kulama vachili mukuputuka kuzata milimo yavo. Kaha vembile jineta+ nakujiha yize milondo yapwile mumavoko avo.+
20 Aze mazavu osena atatu embile jize jineta nakujiha yize milondo. Vakwachile jize jisoka jakumunyikisa kumavoko avo avimoswe, kaha jize jineta vajikwachile namavoko avo avilyo. Vatambakanyine ngwavo: “Poko yamukwale yaYehova nayeyi yaNgiteyone!”
21 Vemanyine mutu himutu muchihela chenyi kuchilombo jingulwishi ndo, kaha vaka-kole javo vaze vapwile muchilombo vachinyine oku vali nakuteta.+
22 Jino vaze malunga 300 vembilenga lika jize jineta, kaha Yehova alingishile mutu himutu muchilombo chosena atuve mukwavo poko yamukwale.+ Kaha vachinyine nakuya kuMbete-shita, nakuZelela, kuheta nakungiza yaAvele-mehola+ kwakamwihi naTavate.
23 Jino malunga vavaIsalele vakungulukile kufuma kuli vaNafwatale, navaAshele, navaManase,+ kaha vahangasanyine vaMichane.
24 Ngiteyone atumine valuwa kungalila yavaEfwalime yajipili vakambulule mujimbu uno ngwavo: “Yenu mukalukuke vaMichane, mukemane kumwava waYotau kuuzaukilo kuheta nakuMbete-mbala.” Ngocho malunga vavaEfwalime vosena vayile nakwimana kumwava waYotau kuuzaukilo mbwe nakuMbete-mbala.
25 Vakwachile navamyangana vavaMichane vavali, vaOleve, naZeve. Oleve vamujihilile kulilolwa vavulukile hausula ngwavo lilolwa lyaOleve.+ Kaha Zeve nawa vamujihilile kuchikamwino chavinyo vavulukile hausula ngwavo chikamwino chaZeve. Vahangasanyine lika vaMichane,+ kaha vanehele mutwe waOleve nawou waZeve kuli Ngiteyone, kungalila yaYotau.
Kwinyikila Chamwishi
^ Chipwe “kuchana.”
^ Hepe., “kufumaho mavoko ove nawakakwata ngolo.”
^ Kafwe kufuma na 22:00 nakuheta kafwe ku 2:00 yaufuku.
