Vaka-kuyula 8:1-35
8 Jino malunga vavaEfwalime vambile kuli Ngiteyone ngwavo: “Mwomwo ika unalingila chuma kanechi? Ika wazenekelanga kutusanyika omu wayanga nakulwa jita navaMichane?”+ Ngocho valikokojwesele nenyi.+
2 Ikiye ambile ngwenyi: “Vyuma muka vyavilemu ngunalingi vyakumihambakanenu? Enu vaEfwalime+ munalingi vyuma vyavivulu kuhambakana vize tunalingi etu vaka-Aviyezele.+
3 Kalunga ahanyine vilolo vavaMichane, vaOleve, naZeve+ mumavoko enu. Jino vyuma muka ngunalingi ami vyakumihambakanenu?” Omu vevwile mazu kana, michima yavo yaunjile.
4 Ngiteyone navaze malunga 300 apwile navo, vahetele kukalwiji Yotau, kaha vazaukile. Numba tuhu vazeyele, oloze vahangasanyine lika vaka-kole javo.
5 Omu vahetele kuSukote, Ngiteyone ambile kuli malunga vakuze ngwenyi: “Hanenuko jimbolo malunga ava nguli navo mwomwo vanazeye. Nguli nakuhangasana vamyangana vavaMichane, vaZeva naZalamuna.”
6 Oloze vilolo vakuSukote vambile ngwavo: “Uno unafungulula lyehi Zeva naZalamuna numba tuhane jimbolo kuvatu jove vaka-jita tahi?”
7 Ngocho avambile ngwenyi: “Vandaminenu, omu Yehova mwahana Zeva naZalamuna mumavoko ami, nangukamiveta namingonga navikwata vyamupambo.”+
8 Ngiteyone akatukile kuze, kaha ayile kuPenwele, alombele cheka vyakulya, oloze vatu vakuze vamukumbulwile nge muze vakumbulwile malunga vakuSukote.
9 Kaha ambile nawa kuli malunga vakuPenwele ngwenyi: “Omu nangukakinduluka mukuunda nangukapuzula ou kaposhi kenu.”+
10 Jino Zeva naZalamuna vapwile kuKalakole navatu javo vaka-jita kafwe 15,000. Ava vakiko valitulileho hali vaka-jita vosena vaze vafumine kuMututuko,+ mwomwo vaka-kulipakata jipoko jamikwale 120,000 vafwile.
11 Ngiteyone ayile mujila yavatu vaze vatwaminenga mujimbalaka kumututuko waNova naYongeveha,+ kahomu awanyine vaka-kole jenyi, avalukukile mukukasumuna.
12 Omu vamyangana vavaMichane vavali vaZeva naZalamuna vachinyine, Ngiteyone avahangasanyine nakuvakwata. Ngocho vatu javo vaka-jita vosena valichikiminyine nawoma.
13 Omu Ngiteyone mwanaYowashe apwile nakukinduluka kufuma kujita mujila yakuya kuHelese,
14 awanyine mukweze wakuSukote, kaha amukwachile nakumwihwojola vihula. Uze mukweze asonekelele Ngiteyone majina avilolo navakulwane vakuSukote, vapwile malunga 77.
15 Kaha ayile kuli vaze malunga vakuSukote nakuvamba ngwenyi: “Ngunanehe vaZeva naZalamuna vaze mwangutolekelele ngwenu, ‘Uno unafungulula lyehi Zeva naZalamuna numba tuhane jimbolo vatu jove vaka-jita vaze vanazeye tahi?’”+
16 Ngiteyone akwachile vaze vakulwane vamunganda yaSukote, avavetele mingonga navikwata vyamupambo, kaha azangamishile malunga vosena vakuSukote.+
17 Apuzwile nawa kaposhi kakuPenwele+ nakujiha malunga vamunganda kana.
18 Ngiteyone ehwile Zeva naZalamuna ngwenyi: “Malunga muka mwajihile kuTavole?” Vakiko vambile ngwavo: “Vapwile nge yove, mutu himutu asolokele nge himwanamwangana.”
19 Ikiye avambile ngwenyi: “Vapwile vandumbwami, vana vamama. Omu ayoya Yehova tu, kachi kamwavajihileko, kachi nayami kangweshi kumijihako.”
20 Kaha ambile kuli mwanenyi watwatwa Yetele ngwenyi: “Katuka uvajihe.” Oloze uze mwanenyi kasolomwene poko yenyi yamukwaleko, evwile woma mwomwo apwile kanyike.
21 Kaha Zeva naZalamuna vamwambile ngwavo: “Katuka vene yove utujihe, mwomwo lunga vamumwena kungolo jenyi.”* Ngocho Ngiteyone akatukile nakujiha Zeva naZalamuna,+ kaha ambachile navimbilingwa vyamujingulule vize vyapwile mujishingo javangamela javo.
22 Kutwala muze malunga vavaIsalele vambile kuli Ngiteyone ngwavo: “Tuyulenu, yove namwanove namuzukulyove mwomwo munatuyovola mumavoko avaMichane.”+
23 Oloze Ngiteyone avalwezele ngwenyi: “Ami kangweshi kumiyulako, chipwe mwanami keshi kumiyulako. Yehova ikiye mwamiyula.”+
24 Jino Ngiteyone ambile kuli vakiko ngwenyi: “Manenu ngumilombeko vyuma vimwe: Mutu himutu anguhane kazeya kahamuzulu havyuma vyenyi vyakupukula.” (Vapwile natuzeya twahamizulu twaulu mwomwo vapwile vaIshimele.)+
25 Vakiko vambile ngwavo: “Natukuhanatwo.” Valile chikuto hamavu, kaha mutu himutu ahakileho kazeya kahamuzulu kuvyuma vyenyi vyakupukula.
26 Pezu yatuzeya twaulu twosena tuze alombele yapwile jishekele* 1,700, kufumisako vimbilingwa vyamujingulule, navingelengele, namahina aungonyi aze vavwalilenga vamyangana vavaMichane, namalenge amujishingo javangamela.+
27 Ngocho Ngiteyone aviyengunwine nakuvitenga lipunu,+ kaha alihakile munganda yenyi yaOfwola.+ Kaha vaIsalele vosena valingilenga ujila wakushipilitu nalize lipunu.+ Lize lipunu lyapwile muheto kuli Ngiteyone nakuli vaze vakuzuvo yenyi.+
28 VaIsalele vafungulwile vaMichane,+ ngocho vaMichane kavapwile cheka nangoloko.* Kaha mulifuchi mwapwile kuunda hamyaka 40 hamakumbi aNgiteyone.+
29 Jino Yelumbale+ mwanaYowashe akindulukile kwimbo lyenyi.
30 Ngiteyone apwile navana 70, mwomwo apwile namapwevo vavavulu.
31 Kuli pwevo lyenyi wakanyike wakuShekeme asemeneneko nawa mwana walunga, kaha amulukile ngwenyi, Avimeleke.+
32 Jino Ngiteyone mwanaYowashe afwile wakusuuluka mumyaka yaushinakaji wenyi, kaha vamufunjile muchimbumbe chaise Yowashe kuOfwola yavaka-Aviyezele.+
33 Omu alingile Ngiteyone hanafu lyehi, vaIsalele vaputukile cheka kulinga ujila wakushipilitu navaMbale,+ vatongwele Mbale-mbelite kupwa kalunga kavo.+
34 VaIsalele vavulyamine Yehova Kalunga kavo+ uze avayowele mumavoko avaka-kole javo vosena.+
35 Kaha kavasolwele zangi yakwilila kuli vakuzuvo yaYelumbale, chipwe ngwavo Ngiteyone havyuma vyamwaza vize avalingilileko.+
Kwinyikila Chamwishi
^ Chipwe “mwomwo nganomu apwa lunga mukiko mujapwa ngolo jenyi.”
^ Shekele yimwe yapwile jingalamu 11.4. Tala Chihande B14.
^ Hepe., “kavahashile kwandula mitwe yavoko.”
