Vaka-kuyula 9:1-57
9 Kutwala muze Avimeleke+ mwanaYelumbale ayile kuShekeme kuli vandumbwanaye, kaha ambile kuli vakiko nakuli vausoko jakaka yenyi walunga,* ngwenyi:
2 “Ihulenu vatwamina* vamuShekeme ngwenu, ‘Uno chamwaza kumiyula kuli vana vaYelumbale 70+ tahi, nyi kumiyula kuli mutu umwe kaha? Oloze anukenu ngwenu aminyi ngwapwa ngukausoko kenu wahalinyinga.’”
3 Vandumbwanaye vamuhanjikilileko Avimeleke kuli vatwamina vakuShekeme mwomwo vasakile apwenga muka-kuvayula. Kaha vambile ngwavo: “Ikiye hindumbwetu.”
4 Avimeleke vamuhanyine jimbongo japalata 70 jakuzuvo* yaMbale-mbelite,+ ngocho ajifwetele vatu vakuzeneka milimo, vamanya, vaze akambile mangana ayenga navo.
5 Avimeleke ayile kuOfwola,+ kuzuvo yaise, kaha ajihile vandumbwenyi+ 70, vana vaYelumbale, avajihilile halilolwa limwe. Oloze Yotame mwanaYelumbale wakanyike asalileho mwomwo aswamine.
6 Jino vatwamina vakuShekeme vosena navatu vakuMbete-milo valikungulwilile kupanda yize yapwile kuShekeme kwakamwihi namutondo waunene, kaha vatongwele Avimeleke kupwa mwangana.+
7 Omu Yotame vamulwezele mujimbu kana, ayile, akanyinyine helu lyaPili yaNgelize+ nakutambakana nalizu lyakukanguka ngwenyi: “Enu malunga vakuShekeme ngwivwililenu, kaha Kalunga nawa mwamivwilila.
8 “Likumbi limwe mitondo yayile nakutongola mwangana wayo. Yambile kumulive ngwayo, ‘Tuyule.’+
9 Oloze uze mulive wambile ngwawo, ‘Uno nguseze maji ami veji kuzachisanga hakutohwesa Kalunga navatu, nguyenga nakutengatenga helu lyamitondo yikwetu nyi?’
10 Yize mitondo yahanjikile nawa kumukuyu ngwayo, ‘Twaya utuyule.’
11 Oloze uze mukuyu wambile ngwawo, ‘Uno nguseze kuyekemena chami namihako yami yamwaza, nguyenga nakutengatenga helu lyamitondo yikwetu nyi?’
12 Yize mitondo yambile nawa kumuvinyo ngwayo, ‘Twaya utuyule.’
13 Oloze uze muvinyo wambile ngwawo, ‘Uno nguseze mihako yami yavinyo yayihya yize yeji kwivwisanga Kalunga navatu kuwaha, nguyenga nakutengatenga helu lyamitondo yikwetu nyi?’
14 Kutwala muze mitondo yosena yambile kuchikwata ngwayo, ‘Twaya utuyule.’+
15 Oloze chize chikwata chambile ngwacho, ‘Kachi nge namusaka kungutongola ngupwenga ngumwangana wenu, kaha twayenu muswame mumuvule wami. Nge pimbi, kaha kakahya kalovoke muchikwata nakwocha mitondo yamishitale yakuLevanone.’
16 “Uno munalingi mwakwoloka, kaha nawa mwakulonga hakutongola Avimeleke apwenga mwangana wenu nyi?+ Kutala munalingi mwamwaza kuli Yelumbale navaze vakuzuvo yenyi tahi? Uno vyuma munalingi kuli ikiye vinamutela nyi?
17 Tata ahakile mwono wenyi muponde omu amilwililile+ mangana amisokole mumavoko avaMichane.+
18 Oloze enu lelo munalukuka vaze vakuzuvo yatata nakujiha vana venyi 70 halilolwa limwe.+ Kaha munatongola Avimeleke mwanandungo yenyi wapwevo+ kupwa mwangana wayenu vaka-Shekeme mwomwo ngwenu hindumbwenu.
19 Kachi nge vyuma munalingi kuli Yelumbale navaze vakuzuvo yenyi vyamwaza, kaha nawa vyakwoloka, kaha wahililenu naAvimeleke, ikiye nawa awahilile nayenu.
20 Nge pimbi, kaha kuli Avimeleke kufume kakahya, kanongese vatwamina vakuShekeme navaze vakuMbete-milo, kaha kuli vatwamina vakuShekeme navaze vakuMbete-milo+ nawa kufume kakahya kanongese Avimeleke.”+
21 Jino Yotame+ achinyine nakuya kuMbele kuze akatwaminenga mwomwo evwile woma ndumbwenyi Avimeleke.
22 Avimeleke apwile mwangana muIsalele hamyaka yitatu.
23 Jino Kalunga alingishile Avimeleke navatwamina vakuShekeme valikwachile koko, ngocho vaze vatwamina vambembejekelenga Avimeleke.
24 Alingile ngocho mangana vana vaYelumbale 70 vaze vafwile avalingileko sambanjinga, mangana manyinga avo apwenga hali Avimeleke uze avajihile,+ nahali vatwamina vakuShekeme vaze vakafwile Avimeleke kujiha vandumbwenyi.
25 Ngocho vatwamina vakuShekeme vatongwele malunga vaswaminyine Avimeleke helu lyajipili, kaha vapupilenga weshowo ahichilenga mujila. Kutwala muze mujimbu kana wahetele kuli Avimeleke.
26 Jino Ngale mwanaEvete navandumbwenyi vayile kuShekeme,+ kaha vatwamina vakuShekeme vamufwelelele.
27 Likumbi limwe vayile kumande avo amivinyo nakwaha mihako yamivinyo, kaha vayikamwine nakulinga chiwanyino. Kufumaho vengilile muzuvo yakalunga kavo,+ valile nakunwa nakwangula Avimeleke.
28 Kaha Ngale mwanaEvete ambile kuli vakiko ngwenyi: “Avimeleke ikiye iyaze? Uno keshi ikiye mwanaYelumbaleko+ numba? Kaha temesa yenyi Zevule wakuShekeme ikiye iyaze? Vakiko veyaze numba tuvazachile? Tuzachilenu vana vaHamole ise yaShekeme. Mwomwo ikaze natuzachila Avimeleke?
29 Kachi nge vatu kana ava vapwanga mumavoko ami, kachi Avimeleke ngunamufumisaho lyehi.” Kaha atolekele Avimeleke ngwenyi: “Vulisa maswalale jove wizenga tulwenga jita.”
30 Zevule chilolo changanda akwachile matoto omu evwile mazu awa ahanjikile Ngale mwanaEvete.
31 Ngocho atumine valuwa kuli Avimeleke mukusweka, ngwenyi: “Tala! Ngale mwanaEvete navandumbwenyi vali muShekeme, kaha vali nakuzondola vatu munganda mangana vakuzungise.
32 Shikaho twaya naufuku navatu jove mangana muvaswaminyine muchipapa.
33 Kaha hamene nachimene, omu nalikatutuka likumbi, ukakatuke nakulukuka nganda. Kahomu Ngale navatu jenyi navakalovoka munganda nakukulukuka, kalihakeho mangana ukavafungulule.”*
34 Ngocho Avimeleke navatu vaze apwile navo, vakatukile naufuku uze, kaha vaswamine kuweluka wanganda yaShekeme mumazavu awana.
35 Omu Ngale mwanaEvete alovokele munganda nakwimana kuchikolo, Avimeleke navatu vaze apwile navo vasolomokele kuze vaswamine.
36 Kahomu Ngale amwene vatu kana, ambile kuli Zevule ngwenyi: “Tala! Vatu vali nakushikumuka kufuma hapili.” Oloze Zevule amukumbulwile ngwenyi: “Keshi vatuko, uli nakumona kaha mivwimbimbi yajipili.”
37 Ngale ambile cheka ngwenyi: “Tala! Vatu vali nakushikumuka kufuma hakachi kachipapa, kaha lizavu limwe nawa lili nakwiza mujila yakufuminyina kumutondo waunene wakuMeyonenyime.”
38 Jino Zevule ambile kuli ikiye ngwenyi: “Hanjika nawa aze mazu ove walitukwojwele ngwove, ‘Avimeleke iyaze numba tumuzachile?’+ Ava keshi vakiko vaze walumbilishileko tahi? Katuka uyenga nakulwa navo jita.”
39 Ngale atetekelele vatwamina vakuShekeme vakalwe jita naAvimeleke.
40 Avimeleke ahangasanyine Ngale, oloze Ngale achinyine. Vatu vaNgale vavavulu vavajihile mbwe nakuchikolo changanda.
41 Avimeleke atwaminenga lika kuAluma, kaha Zevule+ ahangile Ngale navandumbwenyi muShekeme muze vatwaminenga.
42 Likumbi lyakavangijileho, vatu valovokele nakuya kuweluka wanganda. Kaha Avimeleke vamulwezele chuma kana.
43 Jino Avimeleke apangile vatu jenyi vaka-jita mumazavu atatu nakuya nakuswama muchipapa. Kahomu amwene vatu vali nakulovoka munganda, avalukukile nakuvajiha.
44 Avimeleke nalizavu limwe vayile nakwimana muchikolo changanda, kaha aze mazavu avali alukukile vaze vapwile muchipapa nakuvajiha.
45 Jino Avimeleke alwile jita nanganda yize likumbi lyamuundu nakuyitambula. Ajihile vatu vapwilemo kaha apuzwile yize nganda+ nakukuvamo mungwa.
46 Omu vatwamina vakukaposhi kakuShekeme vevwile mujimbu kana, vayile washiwashi nakwingila mukapete* kamuzuvo* yaElembelite.+
47 Jino Avimeleke vamulwezele ngwavo vatwamina vakukaposhi kakuShekeme vanalikungulwila hamwe.
48 Kaha Avimeleke navatu vosena vaze apwile navo vakandukile kuPili yaZalamone. Avimeleke ambachile ngimbu nakuteta mutango, auhakile hachifwiji chenyi. Kaha ambile kuli vatu vaze apwile navo ngwenyi: “Zangulenuko, lingenu nge muze ngunalingi ami.”
49 Ngocho vatu vosena vatetele mitango nakukavangiza Avimeleke. Kaha vayikunjikile kuze kuzuvo nakuyiswamika kakahya. Ngocho vatu vakukaposhi kakuShekeme vosena vafwile, malunga namapwevo vakuheta ku 1,000.
50 Kufumaho Avimeleke ayile nakunyemukila nganda yaTeveze, kaha ayitambwile.
51 Hakachi kayize nganda hapwile kaposhi kakukola, kaha malunga namapwevo vosena navatwamina vamunganda yize vachinyinyinemo. Valisokelelemo nakunyina helu lyayauze kaposhi.
52 Avimeleke ayile nakulukuka uze kaposhi. Apandamine kuchikolo chayauze kaposhi mangana amwoche nakakahya.
53 Jino pwevo umwe andumwinyine Avimeleke lilolwa lyakuchekesa unga mumutwe, kaha achikile chikola chenyi.+
54 Ngocho Avimeleke asanyikile ngamba yenyi uze amumbachililenga vitwa, amwambile ngwenyi: “Somona poko yove yamukwale ungujihe, kuchina vatu navakangwamba ngwavo, ‘Vamujihile kuli pwevo.’” Uze ngamba yenyi asomwene poko yenyi nakumujiha.
55 Omu malunga vavaIsalele vamwene ngwavo Avimeleke nafu, vakindulukile kumembo avo.
56 Ngocho Kalunga amushishishililemo Avimeleke haupi uze alingile kuzuvo yaise wakujiha vandumbwenyi 70.+
57 Kalunga ahilwishilile nawa vatu vakuShekeme upi valingile. Ngocho changu chize Yotame+ mwanaYelumbale+ angwile vatu kana chavawanyine.
Kwinyikila Chamwishi
^ Hepe., “nakuli vaka-tanga yakuzuvo yaise yanaye.”
^ Chipwe pamo, “venyangalila.”
^ Chipwe “jakutembele.”
^ Chipwe “mangana ukavalinge nganomu nawahashila mavoko ove.”
^ Chipwe “muchihela chakukola.”
^ Chipwe “kamutembele.”
