Vamyangana 1 1:1-53
1 Jino mwangana Ndavichi apwile hanakulu lyehi,+ apwile kashinakaji. Vamufwikilenga mapayi, oloze kevwilenga yukuko.
2 Ngocho vangamba jenyi vambile kuli ikiye ngwavo: “Ove mwata, mwangana wetu, mana vakutondele mwanapwevo uze kanda alisavaleho lyehi nalunga mangana akuzachilenga nakukulama. Mwasavalanga kutulo yove mangana ove mwata mwangana wetu wivwenganga yuku.”
3 Ngocho vatondele mwanapwevo wamwaza mujingalila javaIsalele josena, vawanyine Avishange+ wakuShuneme,+ kaha vamunehele kuli mwangana.
4 Uze mwanapwevo apwile wamwaza chikuma, kaha alaminenga mwangana nakumuzachilanga, oloze mwangana kalisavalile nenyiko.
5 Jino Atonyiya+ mwanaHangite apwilenga nakulitukwojola ngwenyi: “Ami yami nangupwa mwangana.” Atonyiya apwile nalitemba lyajita, navaka-kutambukila hatuvalu, namalunga 50 vaze valivangilenga kulutwe lwenyi.+
6 Oloze ise kasakile kumwivwisa kupihyako* hakumuhulisa ngwenyi: “Mwomwo ika uli nakusakila kulinga chuma kana?” Atonyiya apwile wamwaza chikuma, naye amusemene omu alingile hanaseme lyehi Avasalome.
7 Atonyiya alivwasanyine naYowave mwanaZeluwiya, nakapilishitu Aviyatale,+ kaha vamukafwile nakumukundwiza.+
8 Oloze kapilishitu Zatoke,+ naMbenaya+ mwanaYehoyata, nakapolofweto Natane,+ naShimei,+ naLei, navaka-jita vangolo vaNdavichi+ kavakundwijile Atonyiyako.
9 Kutwala muze, Atonyiya alingile chiwanyino+ kulilolwa lyaZohelete, lize lili kwakamwihi naEne-longele, ajihile mikoko, navangombe, navimuna vakununa, kaha asanyikile vandumbwenyi vosena, vana vamwangana, namalunga vosena vavaYuta vaze vapwile vangamba jamwangana.
10 Oloze kapolofweto Natane, naMbenaya, navaka-jita vangolo, nandumbwenyi Solomone kavasanyikileko.
11 Jino kapolofweto Natane+ ambile kuli Mbate-sheva+ naye yaSolomone ngwenyi:+ “Uno unatachikiza ngwove Atonyiya+ mwanaHangite napu lyehi mwangana, kaha mwata wetu Ndavichi katachikijile chuma kanako nyi?
12 Shikaho mana ngukweulule mangana uyovole mwono wove, nawou wamwanove Solomone.+
13 Yako kuli mwangana Ndavichi wambenga ngwove, ‘Ove mwata wami mwangana, keshi yove walishingile kuli ami ngamba yove ngwove: “Mwanove Solomone mwakapwa mwangana nge ngunafu, kaha ikiye mwakatwamanga halitanda lyami lyawangana” nyi?+ Nyi mwomwo ika Atonyiya napwila mwangana?’
14 Shimbu naukahanjika mazu kana kuli mwangana, ami nangukeza nakwitavila mazu ove.”
15 Ngocho Mbate-sheva ayile kukapete kamwangana. Mwangana apwile hikashinakaji chikuma, kaha Avishange+ wakuShuneme apwile nakumulama.
16 Jino Mbate-sheva afukamine chameso hamavu nakulifukula kuli mwangana, kaha mwangana amwihwile ngwenyi: “Vyuma muka uli nakusaka?”
17 Ikiye amukumbulwile ngwenyi: “Ove mwata, ove yove walishingile Yehova Kalunga kove kuli ami ngamba yove ngwove, ‘Mwanove Solomone mwakapwa mwangana nge ngunafu, kaha ikiye mwakatwamanga halitanda lyami lyawangana.’+
18 Oloze Atonyiya napu lyehi mwangana, kaha ove mwata wetu mwangana kawatachikijile chuma kanako.+
19 Atonyiya nalingi chiwanyino, najihi vangombe, navimuna vakununa, namikoko vavavulu, kaha nasanyika vana vayove mwangana vosena, nakapilishitu Aviyatale, nakapitau kamaswalale Yowave,+ oloze kasanyikile ngamba yove Solomoneko.+
20 Shikaho ove mwata wami, vaIsalele vosena vanatale kuli ove uvalweze ou atela kutwama halitanda lyayove mwata wami, nge unafu.
21 Mokomoko omu naulinga ove mwata wami hiunafu lyehi ngana mwavakakuluka jove, ami namwanami Solomone navakatumona ngwavo tuvatu vakulikanga.”
22 Shimbu apwile Mbate-sheva nakuhanjika kuli mwangana, kapolofweto Natane ejile.+
23 Kaha mwangana vamulwezele ngwavo: “Kapolofweto Natane neza.” Ngocho Natane apandamine kuli mwangana, afukamine chameso hamavu nakulifukula kuli mwangana.
24 Jino Natane ambile ngwenyi: “Ove mwata wami mwangana, uno wahanjikile ngwove, ‘Atonyiya mwakapwa mwangana nge ngunafu, kaha ikiye mwakatwama halitanda lyami lyawangana’ nyi?+
25 Lelo Atonyiya nalingi chiwanyino,+ najihi vangombe, navimuna vakununa, namikoko vavavulu, kaha nasanyika vana vayove mwangana vosena, natupitau twamaswalale, nakapilishitu Aviyatale.+ Vali nakulya nakunwa nenyi hamwe nakwamba ngwavo, ‘Mwangana Atonyiya ayoyenga lika!’
26 Oloze kasanyikile ami ngamba yoveko, chipwe kapilishitu Zatoke, chipwe Mbenaya+ mwanaYehoyata, chipwe ngamba yove Solomoneko.
27 Ove mwata wami mwangana, uno unetavisa chuma kanechi chakuzeneka kungulweza ami ngamba yove mutu ou mwakatwama halitanda lyove lyawangana nge unafu nyi?”
28 Jino mwangana Ndavichi ambile ngwenyi: “Ngusanyikilenu Mbate-sheva.” Ngocho Mbate-sheva ejile nakwimana kumeso amwangana.
29 Ndavichi alishingile ngwenyi: “Omu ayoya Yehova tu, uze anguyowelenga kuukalu wami wosena,+
30 nge muze nawa ngwalishingile Yehova Kalunga kaIsalele kuli yove ngwami, ‘Mwanove Solomone mwakapwa mwangana nge ngunafu, kaha ikiye mwakatwama halitanda lyami lyawangana,’ mukiko nangulinga likumbi lyalelo.”
31 Jino Mbate-sheva afukamine chameso hamavu nakulifukula kuli mwangana, kaha ambile ngwenyi: “Ove mwata wami, Mwangana Ndavichi, yoyanga haya myaka yosena.”
32 Kaha Mwangana Ndavichi ambile ngwenyi: “Ngusanyikilenu kapilishitu Zatoke, nakapolofweto Natane, naMbenaya+ mwanaYehoyata.”+ Ngocho vejile nakwimana kumeso amwangana.
33 Kaha mwangana ambile kuli vakiko ngwenyi: “Mbatenu vangamba jayami mwata wenu, nyinyisenu mwanami Solomone hachimbulu chami+ mangana muyenga nenyi kuNgihone.+
34 Kaha kapilishitu Zatoke, nakapolofweto Natane vakamuwavise+ kupwa mwangana wavaIsalele kuze. Kaha kembenu luneta nakwamba ngwenu, ‘Mwangana Solomone ayoyenga lika!’+
35 Kakindulukenu nenyi mangana akatwame halitanda lyami. Mwakapwa mwangana wakunguswana, nangukamutongola kupwa twamina waIsalele naYuta.”
36 Jino Mbenaya mwanaYehoyata ambile kuli mwangana ngwenyi: “Amene! Yehova Kalunga kamwata wami mwangana etavile chuma kana.
37 Yehova apwenga naSolomone+ ngana muze apwile nayove mwata wami mwangana. Kaha wangana wenyi autohwese kuhambakana wayove mwata wami Mwangana Ndavichi.”+
38 Ngocho kapilishitu Zatoke, nakapolofweto Natane, naMbenaya+ mwanaYehoyata, navaKelete, navaPelete+ vanyinyishile Solomone hachimbulu chaMwangana Ndavichi,+ kaha vayile nenyi kuNgihone.+
39 Hakuheta kuze kapilishitu Zatoke ambachile lumbinga lwamaji+ mumbalaka+ nakuwavisa Solomone.+ Vembile jineta, kaha vatu vosena vatambakanyine ngwavo: “Mwangana Solomone ayoyenga lika!”
40 Kufumaho vatu vosena vamukavangijile, vembile jipanda nakuwahilila chikuma. Ngocho mavu alinyikile navyema vyavo.+
41 Atonyiya navatu vosena asanyikile vevwile chuma kana omu vakumishile kulya.+ Omu Yowave evwile chivumo chajineta ambile ngwenyi: “Mwomwo ika munganda muli vyema vipwoho?”
42 Shimbu apwile Yowave nakuhanjika, Yonatane+ mwanakapilishitu Aviyatale ejile. Kaha Atonyiya ambile ngwenyi: “Ingila. Ove umutu wamwenemwene,* kaha watela kuneha mujimbu wamwaza.”
43 Oloze Yonatane ambile kuli Atonyiya ngwenyi: “Nduma. Mwata wetu Mwangana Ndavichi natongola Solomone kupwa mwangana.
44 Mwangana Ndavichi atumanga kapilishitu Zatoke, nakapolofweto Natane, naMbenaya mwanaYehoyata, navaKelete, navaPelete mangana vayenga hamwe naSolomone, kaha vamunyinyisanga hachimbulu chamwangana Ndavichi.+
45 Kapilishitu Zatoke nakapolofweto Natane vanawavisa lyehi Solomone kuNgihone kupwa mwangana. Vanakinduluka nakuwahilila, kaha munganda muli vyema. Vyema kana vikiko munevu.
46 Solomone natwame halitanda lyawangana.
47 Kaha nawa vangamba jamwata wetu vaneza nakusakwilila Mwangana Ndavichi nakwamba ngwavo, ‘Kalunga kove afumakanyise lijina lyaSolomone kuhambakana lijina lyove, kaha atohwese wangana wenyi kuhambakana wangana wove.’ Ngocho mwangana afukamanga nakulifukula kumitwe yakahela kenyi.
48 Kaha ambanga ngwenyi, ‘Vamwalisenga Yehova Kalunga kaIsalele ou natongola mwanami likumbi lyalelo atwame halitanda lyami lyawangana nakungwitavisa ngumone chuma kana.’”
49 Jino vatu vosena vaze asanyikile Atonyiya vevwile woma, kaha mutu himutu akatukile nakuliyila kumahyenyi.
50 Atonyiya naikiye evwile Solomone woma, ngocho ayile nakukakwata kujimbinga jakulijiko lyakulumbila.+
51 Kaha Solomone vamulwezele ngwavo: “Atonyiya nevu woma wayove Mwangana Solomone, kaha nayi nakukwata kujimbinga jakulijiko lyakulumbila nakwamba ngwenyi, ‘Mwangana Solomone alishinge chatete kuli ami ngamba yenyi ngwenyi keshi kungujiha napoko yamukwaleko.’”
52 Kaha Solomone ambile ngwenyi: “Kachi nge mwapwa mutu wamwenemwene, kaha keshi kufwako, oloze nge mwakapihisa,+ kaha mwakafwa.”
53 Ngocho Mwangana Solomone atumine vatu vamufumise kuze kulijiko lyakulumbila. Kaha ejile nakufukama chameso hamavu kuli Mwangana Solomone. Kaha Solomone ambile kuli Atonyiya ngwenyi: “Yakonga tuhu kuzuvo yove.”
