Vamyangana 1 10:1-29
10 Jino mwangana wapwevo wakuSheva evwile puho yaSolomone mwomwo yakwalisa lijina lyaYehova.+ Ngocho ayile mangana akamweseke navihula vyakujiminyina.*+
2 Kaha ahetele kuYelusalema nalizavu* lyavatu lyalinene,+ navangamela vaze vambachile maji ambalasamu,+ naulu wauvulu, namalolwa andando yayinene. Apandamine kuli Solomone, kaha ahanjikile nenyi vyuma vyosena vyapwile kumuchima wenyi.
3 Solomone akumbulwile vihula vyenyi vyosena. Kakwapwile chuma numba chimwe chakaluhwilile mwangana kulumbununako.*
4 Omu mwangana wapwevo wakuSheva amwene mangana aSolomone+ osena, nazuvo yize atungile,+
5 navyakulya alilenga, nomu vangamba jenyi vatwaminenga kumesa,+ nomu vangamba jenyi vazachilenga kumesa, nauvwalo vavwalilenga, navaka-kumuhana lupasa, navimuna vakuvatula vaze ahanyinenga hakumbi hakumbi kuzuvo yaYehova, alikomokelele chikuma.*
6 Ngocho ambile kuli mwangana ngwenyi: “Mujimbu ngwevwile mulifuchi lyami wakuvuluka mangana ove navyuma unalingi* unapu wamuchano.
7 Oloze kangwetavilile mujimbu kanako, kuvangomu nguneza nakulimwena nameso ami. Vyuma vangulwezele vyapwile vyavindende kaha. Mangana ove naluheto uli nalwo vinahambakana napuho ngwevwile.
8 Vatu jove vapwenga vakuwahilila, vangamba jove vaze veji kwimananga kumeso ove lwola lwosena nakwivwilila kumangana ove vapwenga vakuwahilila.+
9 Vamwalisenga Yehova Kalunga kove,+ ou nakwivwila kuwaha nakukuhaka halitanda lyawangana waIsalele. Yehova nakutongola kupwa umwangana mangana uyulenga mwaya chiyulo namukwoloka, mwomwo azanga vaIsalele haya myaka yosena.”
10 Mwangana wapwevo wakuSheva ahanyine mwangana jitalende* jaulu 120, namaji ambalasamu amavulu,+ namalolwa andando yayinene.+ Kakwapwile vatu vanehele maji ambalasamu amavulu nge aze anehele mwangana wapwevo wakuSheva kuli Mwangana Solomoneko.
11 Mato aHilame aze anehele ulu kufuma kuOfwile,+ anehele nawa vitondo+ vyamalamunge vyavivulu chikuma, namalolwa andando yayinene.+
12 Kuvitondo evi vyamalamunge, mwangana asongeleko jipanda jakuzuvo yaYehova, nakuzuvo* yamwangana, natulyalya, navisaji vyamikole vyavaka-kwimba.+ Kakwapwile vatu vanehele vitondo vyakufwana nge vizeko, kaha vitondo kana kavyasolokako palanga nakulelo.
13 Mwangana Solomone naikiye ahanyine mwangana wapwevo wakuSheva vyuma vyosena asakile navize alombele, vyakuwezela kuvyuma vize vamuhanyine kuli mwangana mulikoji lyenyi. Kufumaho ou mwangana wapwevo akindulukile kulifuchi lyenyi navangamba jenyi hamwe.+
14 Ulu vanehelele Solomone mumwaka umwe walemene kafwe jitalende 666,+
15 kufumisako uze vanehele vaka-kusekasana, nanganyo vanehele vaka-kusepa, navamyangana vakuAlavya vosena navanguvulu vamulifuchi.
16 Mwangana Solomone atengele jikepwe jajinene jaulu wakutatula 200+ (kepwe hikepwe vayitengele najishekele* jaulu 600).+
17 Atengele nawa mikingo* yaulu wakutatula 300 (mukingo himukingo vautengele najimina* jaulu jitatu). Mwangana avihakile muzuvo vavulukile ngwavo Zuvo yaMusenge waLevanone.+
18 Mwangana atungile nawa litanda lyalinene lyamazo avanjamba,+ kaha alishilile ulu wakutomesa.+
19 Kulitanda kana kwapwile jindondelo jakunyinyina 6, kaha kunyima yalyo lyapwile nasenge yakuya muutengejiva. Litanda lyapwile nawa namavoko akusachila kujihachi josena jivali, kaha kuluhachi hiluhachi kwapwile ndumba.+
20 Kwapwile nawa vandumba 12 vaze vemanyine hajindondelo jize 6, kusongo yandondelo hindondelo kwapwile ndumba. Kakwapwile mwangana weka atungile litanda lyakufwana nge eliko.
21 Jipasa jaMwangana Solomone josena japwile jaulu, kaha vyuma vyosena vyamuzuvo vavulukile ngwavo Zuvo yaMusenge waLevanone+ vyapwile vyaulu wakutomesa. Kakwapwile chuma chapalatako, mwomwo palata vayimwenenga kupwa yamokomoko hamakumbi aSolomone.+
22 Mwangana apwile namato akuTalashishe+ hakalungalwiji. Hamato enyi hapwile namato aHilame. Awa mato akuTalashishe anehelenga ulu, napalata, namazo avanjamba,+ namahundu, navapau kamwe mumyaka yitatu.
23 Ngocho Mwangana Solomone apwile naluheto+ lwaluvulu namangana+ amavulu kuhambakana vamyangana vahamavu vosena.
24 Kaha vatu vosena hamavu vejilenga kuli Solomone mangana vevwenga mangana aze amuhanyine Kalunga.+
25 Vatu vanehelenga milambu yavo yavyuma vyapalata, navyuma vyaulu, nauvwalo, navitwa vyajita, namaji ambalasamu, natuvalu, navimbulu. Omu mukiko valingilenga mwaka himwaka.
26 Solomone alikungulwilile lika matemba natuvalu.* Apwile namatemba 1,400, natuvalu*+ 12,000, kaha avilaminyine mujinganda jamatemba, kwakamwihi namwangana muYelusalema.+
27 Mwangana alikungulwilile palata yayivulu muYelusalema kwijiva nge malolwa, navitondo vyamishitale vyavivulu kwijiva nge misukumole yamuShefwela.+
28 Tuvalu twaSolomone vavalanjilenga kuEjipitu. Vaka-kusekasana jamwangana valanjilenga utanga hiutanga watuvalu* handando yoyimwe kaha.+
29 Litemba limwe lyakuEjipitu valilanjilenga najimbongo japalata 600, kaha kavalu umwe vamulanjilenga najimbongo japalata 150. Kaha vakiko nawa vavilanjishilenga kuli vamyangana javaHete,+ nakuli vamyangana javaSulya.
Kwinyikila Chamwishi
^ Chipwe “natushimutwiji.”
^ Chipwe “nachendo.”
^ Hepe., “chakuswama kuli mwangana chize ahonene kulumbununako.”
^ Hepe., “muli ikiye kamwapwile shipilituko.”
^ Chipwe “namazu ove.”
^ Talende yimwe yapwile jikilongalamu 34.2. Tala Chihande B14.
^ Chipwe “nakunganda.”
^ Shekele yimwe yapwile jingalamu 11.4. Tala Chihande B14.
^ Jikepwe jajindende jize vambachilenga vaka-kwasa mata amanana.
^ MuVisoneka VyachiHepeleu, mina yimwe yapwile jingalamu 570. Tala Chihande B14.
^ Chipwe “navaka-kutambukila hatuvalu.”
^ Chipwe “navaka-kutambukila hatuvalu.”
^ Chipwe pamo, “utanga hiutanga watuvalu kuEjipitu nakuKuwe. Vaka-kusekasana jamwangana valanjilenga ava tuvalu kuKuwe,” pamo kulumbununa kuShilisha.
