Vamyangana 1 11:1-43
11 Mwangana Solomone azangile mapwevo vakumafuchi eka+ vavavulu, namwanaFwalo hamwe.+ Azangile mapwevo vavaMowave,+ navaAmone,+ navaEtome, navaShitone,+ navaHete.+
2 Mapwevo kana vafumine kumafuchi aze Yehova alwezele vaIsalele ngwenyi: “Kanda namukalikata navo,* kaha vakiko nawa kanda vakalikata nayenuko, kuchina navakalumuna michima yenu nakukava tulunga twavo.”+ Oloze Solomone alikachile navo kaha avazangile chikuma.
3 Ambachile mapwevo vavalemu 700, kaha apwile nawa natulumbu twamasano 300. Ava mapwevo jenyi valumwine muchima wenyi* chikoki chikoki.
4 Omu Solomone ashinakajiwile,+ mapwevo jenyi valumwine muchima wenyi, kaha aputukile kukava tulunga veka.+ Kazachililile Yehova Kalunga kenyi namuchima wenyi wosena nge muze alingile ise Ndavichiko.
5 Ngocho Solomone alemeselenga Ashatolete+ kalunga wapwevo wavaka-Shitone, naMilikome+ kalunga wakwivwisa unyengwe wavaAmone.
6 Solomone alingile vyuma vyavipi kumeso aYehova, kazachilile Yehova namuchima wenyi wosena nge muze alingile ise Ndavichiko.+
7 Halwola kanelu hakiko Solomone atungililile Kemoshe chihela chakulunduka.+ Kemoshe apwile kalunga wakwivwisa unyengwe wavaMowave. Chihela kana achitungilile hapili yize yapwile kulutwe lwaYelusalema. Atungilile nawa Moleke chihela chakulunduka. Moleke+ apwile kalunga wakwivwisa unyengwe wavaAmone.+
8 Omu mukiko alingililile namapwevo jenyi vakumafuchi eka vosena vaze valumbililenga tulunga twavo mawana mangana akakumukenga wishi.
9 Yehova apihililile naSolomone mwomwo muchima wenyi wapyapumukile nakuseza Yehova Kalunga kaIsalele+ uze alisolwele kuli ikiye mapapa kavali,+
10 nakumuhuhumuna ngwenyi kanda akakavangiza tulunga vekako.+ Oloze ikiye kononokele vyuma amulwezele Yehovako.
11 Jino Yehova ambile kuli Solomone ngwenyi: “Hakuwana nge unalingi vyumevi, kaha nawa kawalamine lushiko lwami, najindongi jize ngwakulwezeleko, ngocho wangana nangukutambulawo nakuuhana kuli ngamba yove.+
12 Chipwe ngocho, kangweshi kukutambulawo shimbu uli nakuyoyako mwomwo yaiso Ndavichi. Nangukautambula mulivoko lyamwanove.+
13 Oloze kangweshi kukatambula wangana wosenako.+ Mwanove+ nangukamuhana muyachi umwe mwomwo yangamba yami Ndavichi, kaha nawa mwomwo yanganda yaYelusalema yize ngunasakula.”+
14 Ngocho Yehova akatwile mutu uze emanyinyine Solomone+ nakole. Lijina lyenyi apwile ikiye Hatate, kaEtome uze afumine kutanga yawangana muEtome.+
15 Omu Ndavichi afungulwile nganda yaEtome,+ Yowave kapitau kamaswalale jenyi ayile ngwenyi akafunde vatu vaze vafwile. Oloze kuheta kuze ajihile malunga vosena vamuEtome.
16 (Mwomwo Yowave navaIsalele vosena vatwamine kuze hatukweji 6 palanga nomu akumishile kujiha malunga vosena muEtome.)
17 Oloze Hatate achinyine navaEtome vamwe vaze vapwile vangamba jaise mangana vayenga kuEjipitu. Halwola kanelu Hatate apwile kanyike.
18 Kaha vakatukile kuMichane nakuheta kuPalane.+ Jino muPalane vambachilemo malunga vamwe nakuya navo kuEjipitu kuli Fwalo mwangana waEjipitu. Fwalo ahanyine Hatate zuvo, navyakulya, nangalila yakutwamamo.
19 Hatate vamwivwilile uselewa kuli Fwalo, ngocho amuhanyine nyalyenyi, songo yapwevo lyenyi Tapene kupwa pwevo lyenyi.
20 Kutwala muze, songo yaTapene asemene mwana walunga, kaha amulukile ngwenyi Ngenuvate. Tapene atambwile uze mwana nakumulelela* muzuvo yaFwalo. Ngocho Ngenuvate akolelelele muzuvo yaFwalo navana vaFwalo hamwe.
21 Omu Hatate apwile muEjipitu, evwile ngwavo Ndavichi natoko ngana mwavakakuluka jenyi,+ kaha naYowave kapitau kamaswalale nawa nafu.+ Ngocho Hatate ambile kuli Fwalo ngwenyi: “Ngusuule nguyenga kulifuchi lyami.”
22 Fwalo ambile ngwenyi: “Vyuma muka ngunazeneka kukuhana numba usake kukinduluka kulifuchi lyove?” Ikiye ambile ngwenyi: “Vyauchi, oloze ngusuule kaha nguyenga.”
23 Kalunga akatwile nawa mutu weka uze emanyinyine Solomone nakole.+ Lijina lyenyi ikiye Lezone mwanaEliyata uze achinyine kuli kaka yenyi Hatatezele+ mwangana waZova.
24 Omu Ndavichi afungulwile*+ vatu vakuZova, Lezone alikungulwilile lizavu lyamalunga, kaha ikiye apwile twamina walize lizavu lyamalunga vaka-kunyemukila. Ngocho vayile kuNdamashiku,+ vakatwamine kuze, kaha vaputukile kuyula muNdamashiku.
25 Lezone emanyinyine vaIsalele nakole hamakumbi aSolomone osena. Ngocho awezelele kuukalu uze anehele Hatate. Lezone ahungilenga vaIsalele omu ayulilenga muSulya.
26 Kwapwile nawa ngamba+ yaSolomone Yelovowame+ mwanaNevate, kaEfwalime wakuZeleta. Naye apwile tuliwe, lijina lyenyi ikiye Zeluwa. Yelovowame naikiye alikangile kuli mwangana.+
27 Omu mukiko alikangile kuli mwangana: Solomone alundwile Mulundu*+ nakusoka mulihanya lyakembwe yaNganda yaise Ndavichi.+
28 Yelovowame apwile chingazule chalunga. Kahomu Solomone amwene ngwenyi ou mukweze muka-kuzata nangolo, amutongwele kupwa kalama+ wavaka-kuzata milimo vaze vafumine kuzuvo yaYosefwe.
29 Jino Yelovowame apwile nakufuma kuYelusalema, kaha aliwanyine nakapolofweto Ahiya+ wakuShilo mujila. Ava malunga vavali vapwile uka wavo kuze. Ahiya avwalile chikuto chachihya.
30 Kaha ambachile chize chikuto avwalile nakuchipula muvihanda 12.
31 Ahiya ambile kuli Yelovowame ngwenyi:
“Mbataho vihanda 10 mwomwo Yehova Kalunga kaIsalele nambe ngwenyi, ‘Nangutambula wangana mulivoko lyaSolomone, kaha ove nangukuhana miyachi 10.+
32 Oloze muyachi umwe nausala kuli ikiye+ mwomwo yangamba yami Ndavichi,+ kaha nawa mwomwo yanganda yaYelusalema yize ngunasakula hamiyachi yavaIsalele yosena.+
33 Nangulinga ngocho mwomwo vananguseze,+ kaha vanalifukula kuli Ashatolete kalunga wapwevo wavaka-Shitone, nakuli Kemoshe kalunga kavaMowave, nakuli Milikome kalunga kavaAmone. Kavatambukile mujijila jamiko, kavalingile vyuma vyakwoloka kumeso amiko. Kavononokele jishimbi jami namazu ami akuyula, nge muze ononokele Ndavichi ise yaSolomoneko.
34 Chipwe ngocho, kangweshi kumutambula wangana wosenako. Nangumwitavisa apwenga lika mwata hamakumbi akuyoya chenyi chosena mwomwo yangamba yami Ndavichi ngwasakwile,+ uze ononokele jishimbi jami najindongi jami.
35 Oloze wangana nangukautambula mulivoko lyamwanenyi nakukuhanawo yove. Nangukakuhana miyachi 10.+
36 Mwanenyi nangukamuhana muyachi umwe mangana ngamba yami Ndavichi apwenga lika nalinongo* kumeso ami muYelusalema,+ nganda yize ngunalisakwila kupwa chihela navavulukilanga lijina lyami.
37 Nangukakutongola ukayule lifuchi lyosena, kaha naukapwanga umwangana wavaIsalele.
38 Kachi nge nawononoka mwosena muze nangukulweza, nakutambukanga mujijila jami, nakulinga vyuma vyakwoloka kumeso ami, nakukavangiza jindongi najishimbi jami nge muze alingile ngamba yami Ndavichi,+ kaha ami nangupwanga nayove. Nangukakutungila zuvo yize nayikelilanga, nge muze ngunatungila Ndavichi,+ kaha nangukakuhana vaIsalele.
39 Nangukenyisa vaka-tanga yaNdavichi mwomwo yachuma echi vanalingi.+ Oloze kangweshi kukavenyisa haya myaka yosenako.’”+
40 Jino Solomone asakile kujiha Yelovowame, oloze Yelovowame achinyinyine kuEjipitu kuli Shishake+ mwangana waEjipitu.+ Kaha atwaminenga lika kuze palanga nomu afwile Solomone.
41 Mujimbu wosena waSolomone wakuvuluka mangana enyi, navyuma vyosena alingile, vausoneka mumukanda wamujimbu waSolomone.+
42 Solomone ayulile vaIsalele vosena muYelusalema hamyaka 40.
43 Solomone atokele ngana mwavakakuluka jenyi, kaha vamufunjile muNganda yaise Ndavichi. Ngocho mwanenyi Lehovowame+ aswanyine hawangana.
Kwinyikila Chamwishi
^ Chipwe “Kanda namukalimbachila navo.”
^ Chipwe “mapwevo jenyi vamuhungumwishile.”
^ Chipwe pamo, “nakumusumwina.”
^ Hepe., “ajihile.”
^ Chipwe “Milo.” Milo hilizu lyachiHepeleu lyalumbununa “kuzala.”
^ Linongo hano linemanyinako mwangana wakuzuvo yaNdavichi chipwe chisaka chenyi chawangana.
