Vamyangana 1 12:1-33
12 Jino Lehovowame ayile kuShekeme, mwomwo vaIsalele vosena vayile kuze+ mangana vakamutongole kupwa mwangana.+
2 Omu Yelovowame mwanaNevate evwile chuma kana (Yelovowame apwile muEjipitu mwomwo achinyine mwangana Solomone),+
3 vatumine vatu vakamusanyike. Omu ejile Yelovowame, ayile nalizavu lyavaIsalele lyosena kuli Lehovowame, kaha vambile kuli ikiye ngwavo:
4 “Iso atuyanjishilenga.+ Oloze nge ove kaweshi kutuyanjisako, kaha nawa kaweshi kutuzachisa nge muze atuzachishilenga isoko, kaha natukuzachilanga.”
5 Jino Lehovowame ambile kuli vakiko ngwenyi: “Yenunga mukavandame makumbi atatu, kaha mukakinduluke kuli ami.” Ngocho vatu vayile.+
6 Kaha Mwangana Lehovowame ehwile vakulwane vaze vazachililenga ise Solomone omu apwile wamutonyi. Avambile ngwenyi: “Ngulwezenuko mwakulingila. Ava vatu nanguvakumbulula ngachilihi?”
7 Vakiko vamwambile ngwavo: “Kachi nge lelo mulilingisa kupwa ungamba yavo, nakwitavila vyuma vanahanjika, nakulinga nge omu vanakulweze, kaha navapwanga vangamba jove.”
8 Oloze kalingile nge muze vamulwezele vaze vakulwaneko. Ayile nakwihula vakwavo vakweze muvakolelelenga, vaze jino vapwile vaka-kumuzachila.+
9 Avambile ngwenyi: “Ngulwezenuko mwakulingila. Uno vatu vaze vezanga kuli ami nakwamba ngwavo, ‘Kanda nautuyanjisa nge muze atuyanjishilenga isoko,’ nanguvakumbulula ngachilihi?”
10 Vaze vakwavo vakweze vambile kuli ikiye ngwavo: “Vatu vaze vezanga kuli ove nakwamba ngwavo, ‘Iso atuyanjishilenga, oloze ove kanda nautuyanjisako,’ uvalweza ngwove, ‘Munwe wami wasongo naulema kuhambakana jitungi jatata.
11 Tata amiyanjishilenga, oloze aminyi nangumimwenesa makava. Tata amizangamishilenga namingweji, oloze aminyi nangumizangamisanga namingonga.’”
12 Jino Yelovowame navatu vosena vaze apwile navo vejile kuli Lehovowame halikumbi lyamuchitatu nge muze avalwezele ngwenyi: “Kakindulukenu kuli ami halikumbi lyamuchitatu.”+
13 Mwangana Lehovowame avakumbulwile nautenu, kakavangijile mazu aze vamulwezele vakulwaneko.
14 Ahanjikile kuli vakiko nge muze vamulwezele vakwavo vakweze. Ambile ngwenyi: “Tata amiyanjishilenga, oloze ami nangumimwenesa makava. Tata amizangamishilenga namingweji, oloze ami nangumizangamisanga namingonga.”
15 Ngocho mwangana kevwililile kuli vaze vatuko. Yehova ikiye alingishile vyuma kana visoloke+ mangana mazu aze ahanjikile Yehova kuli Yelovowame mwanaNevate kuhichila muli Ahiya+ wakuShilo atesemo.
16 Omu vaIsalele vosena vamwene ngwavo mwangana nakane kuvevwilila, vambile kuli mwangana ngwavo: “Chazano mukaze tuli nacho kuli Ndavichi? Etu katweshi nauswana kuli mwanaYeseko. Enu vaIsalele, kindulukenu kuli tulunga twenu. Kaha ove Ndavichi, zakamanga vaze vakuzuvo yove.” Ngocho vaIsalele vosena vayile kujizuvo* javo.+
17 Oloze Lehovowame ayulilenga lika vaIsalele vaze vatwaminenga mujinganda jaYuta.+
18 Mwangana Lehovowame atumine Atolame+ uze apwile kapitau kavaze vazachilenga milimo yaundungo ayenga kuli vaIsalele, oloze vakiko vamwashile malolwa nakumujiha. Jino Mwangana Lehovowame anyinyine mulitemba lyenyi nakuchinyina kuYelusalema.+
19 VaIsalele vanalikangenga+ kuli vaze vakuzuvo yaNdavichi palanga nakulikumbi lyalelo.
20 Omu vaIsalele vosena vevwile ngwavo Yelovowame nakinduluka, vamusanyikile mangana ezenga kuli vakiko, kaha vamutongwele kupwa mwangana wavo.+ Kakwapwile vatu veka vakavangijile vakuzuvo yaNdavichiko, kuvanga vaze vakumuyachi waYuta kaha.+
21 Omu Lehovowame ahetele kuYelusalema, akungulwile vaka-jita vakuheta ku 180,000 vaze vanangula* vakuzuvo yaYuta nakumuyachi waMbenjamine valwenga jita navaIsalele vosena mangana wangana ukinduluke kuli ikiye hakupwa mwanaSolomone.+
22 Jino Kalunga wamuchano ahanjikile kuli kapolofweto kenyi* Shemaya+ ngwenyi:
23 “Hanjika kuli Lehovowame mwanaSolomone mwangana wavaYuta, nakuli vaze vakuzuvo yaYuta, navaze vakuzuvo yaMbenjamine, nakuvatu vosena ngwove,
24 ‘Yehova nambe ngwenyi: “Kanda namuya nakuzungisa vandumbwenu vaIsaleleko. Mutu himutu akinduluke kuzuvo yenyi mwomwo ami yami ngunalingisa chuma kana chisoloke.”’”+ Ngocho vosena vononokele mazu aYehova, kaha vakindulukile kumembo avo nge muze avalwezele Yehova.
25 Yelovowame atungile nganda yaShekeme+ mungalila yajipili yavaEfwalime, kaha atwaminengamo. Kufumaho ayile nakutunga nganda yaPenwele.+
26 Yelovowame alyambile mumuchima wenyi ngwenyi: “Wangana naukinduluka jino kuli vaze vakuzuvo yaNdavichi.+
27 Kachi nge vatu navayanga lika kuzuvo yaYehova kuYelusalema+ nakuhana vimuna vakuvatula, michima yavo nayikalumuka nakukinduluka kuli mwata wavo Lehovowame Mwangana wavaYuta. Kaha navakangujiha nakukinduluka kuli Lehovowame Mwangana wavaYuta.”
28 Omu alingile hanatwame lyehi punga navaka-kumulweza mangana, atengele vana vavangombe vaulu vavali+ nakwamba kuli vatu ngwenyi: “Chili nakumikaluhwila chikuma kuyanga kuYelusalema. Enu vaIsalele, ou ikiye Kalunga kenu uze amilowele mulifuchi lyaEjipitu.”+
29 Ahakile mwanangombe umwe muMbetele,+ kaha mukwavo muNdane.+
30 Echi chalingishile vatu valinge shili,+ kaha vayilenga mbwe nakuNdane nakulemesa uze mwanangombe.
31 Yelovowame atungile najizuvo jakulemeselamo havihela vyakulunduka, kaha atongwele vapilishitu kufuma kuvatu vaze kavapwile vaLeviko.+
32 Yelovowame alongesele nawa chiwanyino mukakweji wakusokesa 8 halikumbi lyakusokesa 15. Chiwanyino+ kana chalifwanyine nachize chamuYuta. Vaze vana vavangombe atengele, avalumbililenga vimuna vakuvatula halijiko lyakulumbila lize atungile kuMbetele.+ Asakwile nawa vapilishitu kuMbetele vazachililenga kuvihela vyakulunduka vize alongesele.
33 Kaha aputukile kulumba mawana halijiko lyakulumbila lyakuMbetele halikumbi lyakusokesa 15 mukakweji wakusokesa 8 uze asakwile ivene. Alongeselele vaIsalele chiwanyino, kaha alumbile mawana halijiko lyakulumbila mangana akakumuke wishi.
Kwinyikila Chamwishi
^ Hepe., “kujimbalaka.”
^ Hepe., “vasakula.”
^ Hepe., “kuli mutu waKalunga wamuchano.”
