Vamyangana 1 13:1-34
13 KuYuta kwapwile mutu waKalunga+ umwe uze vatumine kuli Yehova ayenga kuMbetele. Hakuheta kuze awanyine Yelovowame nemana kulijiko lyakulumbila+ alumbe mawana mangana akakumuke wishi.
2 Uze mutu waKalunga ahanjikile kulijiko lyakulumbila nge muze vamulwezele kuli Yehova. Ambile ngwenyi: “Ove lijiko lyakulumbila, ove lijiko lyakulumbila! Yehova nambe ngwenyi, ‘Kuzuvo yaNdavichi nakukasemuka mwana walunga, lijina lyenyi ikiye Yoshiya.+ Kaha hali ove mwakalumbaho vapilishitu vakuvihela vyakulunduka, vapilishitu vaze vali nakulumba mawana hali ove, kaha mwakochelaho vifuwa vyavatu.’”+
3 Uze mutu waKalunga ahanyine chinjikizo halikumbi lize, ngwenyi: “Echi chikiko chinjikizo navuluka Yehova ngwenyi, Tala! Eli lijiko lyakulumbila nalipulika hakachi, kaha uto* uze uliho naumwangala.”
4 Omu mwangana Yelovowame evwile mazu ayauze mutu waKalunga wamuchano aze ahanjikile kulijiko lyakulumbila kuMbetele, afumishile livoko lyenyi kuze kulijiko lyakulumbila akwachile nakwinyika uze lunga ngwenyi: “Mukwatenu.”+ Hahaze vene lize livoko enyikile uze lunga lyomine chau,* kahashile cheka kulikonekako.+
5 Lize lijiko lyakulumbila lyapulikile hakachi, kaha uto wapwileho wamwangalile kweseka nachinjikizo chize Yehova alwezele uze mutu waKalunga wamuchano.
6 Jino mwangana ambile kuli uze mutu waKalunga wamuchano ngwenyi: “Mulembelele Yehova Kalunga kove angwivwile uselewa, ngulombeleko mangana livoko lyami lipwenga cheka lyalambwe.”+ Ngocho uze mutu alembelelele Yehova, kaha livoko lyamwangana lyahindukile nakupwa nge muze lyapwile hakavanga.
7 Mwangana ambile kuli uze mutu waKalunga wamuchano ngwenyi: “Tuyenga hamwe kuzuvo yami mangana ukalye vyakulya, kaha nangukakuhana nawana.”
8 Oloze uze mutu waKalunga wamuchano ambile kuli mwangana ngwenyi: “Numba naunguhana chimbwa chavyuma vyamuzuvo yove, kangweshi kuya nove nakulya vyakulya chipwe kunwa meya kunoko.
9 Mwomwo Yehova angulwezanga ngwenyi: ‘Kanda ukalya vyakulya chipwe kunwa meyako, chipwe kukinduluka mujila yize wezangako.’”
10 Ngocho uze mutu waKalunga akindulukile kuzachisa jila yeka, keshi yize ahichile hakwiza kuMbeteleko.
11 Jino kwapwile kapolofweto umwe wakashinakaji uze atwaminenga kuMbetele, kaha vana venyi vayile kuzuvo nakumulweza vyuma vyosena vize alingile uze mutu waKalunga wamuchano kuMbetele halikumbi lize. Vamulwezele namazu ahanjikile kuli mwangana. Omu vakumishile kulweza sevo vyuma kana,
12 sevo avehwile ngwenyi: “Nayi jila muka?” Vana venyi vamulwezele jila ayile uze mutu waKalunga wamuchano wakuYuta.
13 Sevo ambile kuli vakiko ngwenyi: “Ngulemenenu chimbulu.” Vamulemenene chimbulu, kaha anyinyineho.
14 Uze kapolofweto wakashinakaji akavangijile uze mutu waKalunga wamuchano, kaha amuwanyine natwame mwishi yamutondo waunene. Jino amwihwile ngwenyi: “Ove yove mutu waKalunga wamuchano uze afumanga kuYuta nyi?”+ Ikiye amukumbulwile ngwenyi: “Yami vene.”
15 Kaha ambile kuli ikiye ngwenyi: “Tuyenga hamwe kuzuvo yami mangana ukalye vyakulya.”
16 Oloze ikiye ambile ngwenyi: “Kangweshi kuhasa kukinduluka nayoveko chipwe kwitavila mazu ove chipwe kulya nakunwa meya kunoko.
17 Mwomwo Yehova angulwezanga ngwenyi: ‘Kanda ukalya vyakulya chipwe kunwa meyako. Kaha nawa kanda ukakinduluka mujila yize wezangako.’”
18 Uze kapolofweto wakashinakaji ambile kuli ikiye ngwenyi: “Nayami ngukapolofweto ngana mwayove, kaha kangelo angulwezanga mazu aYehova ngwenyi, ‘Mulweze akinduluke nove kuzuvo yove mangana akalye vyakulya nakunwa meya.’” (Oloze amwongele.)
19 Ngocho uze mutu waKalunga akindulukile nauze kapolofweto wakashinakaji mangana akalye vyakulya nakunwa meya kuzuvo yenyi.
20 Omu vatwamine kumesa, mazu aYehova ejile kuli uze kapolofweto wakashinakaji.
21 Kaha ambile kuli uze mutu waKalunga wamuchano wakuYuta ngwenyi: “Yehova nambe ngwenyi, ‘Hakuwana nge unalikange kuli Yehova nakuzeneka kulama lushimbi luze akulwezanga Yehova Kalunga kove,
22 oloze unakinduluka nakulya vyakulya nakunwa meya kuno akwambanga ngwenyi: “Kanda ukalya vyakulya chipwe kunwa meyako,” ngocho mujimba wove kaveshi kukaufunda muchimbumbe chavakakuluka joveko.’”+
23 Omu akumishile kulya nakunwa, uze kapolofweto wakashinakaji alemenene chimbulu uze kapolofweto akindulwishile.
24 Uze mutu waKalunga ayile, oloze ndumba amuwanyine mujila nakumujiha.+ Mujimba wenyi vaumbilile mujila, kaha uze chimbulu emanyine kwakamwihi nauze mujimba. Nandumba nawa emanyine kuze kumujimba.
25 Jino kwapwile malunga vamwe vapwile nakuhita, kaha vamwene uze mujimba mujila nandumba uze emanyine kwakamwihi nawo. Ngocho vejile nakwambulula mujimbu kana munganda muze atwaminenga uze kapolofweto wakashinakaji.
26 Omu kapolofweto wakashinakaji evwile chuma kana, hahaze vene ambile ngwenyi: “Owo himutu waKalunga wamuchano uze alikanganga kuli Yehova,+ ngocho Yehova namuhane kuli ndumba mangana amulemeke nakumujiha nge muze Yehova ahanjikanga kuli ikiye.”+
27 Jino ambile kuli vana venyi ngwenyi: “Ngulemenenu chimbulu.” Ngocho vamulemenene chimbulu.
28 Kaha ayile, akawanyine uze mujimba vanaumbili mujila, oku chimbulu nandumba vanemana kwakamwihi nauze mujimba. Uze ndumba kalile uze mujimba chipwe kulemeka uze chimbuluko.
29 Uze kapolofweto wakashinakaji ambachile uze mujimba wayauze mutu waKalunga wamuchano, auhakile hachimbulu nakuya nawo kunganda yenyi mangana akamulile nakumufunda.
30 Ngocho afunjile uze mujimba muchimbumbe chenyi. Vamulilile nakwamba ngwavo: “Ove ndumbwami, chinapihi chikuma.”
31 Omu alingile hanamufundu lyehi, alwezele vana venyi ngwenyi: “Omu nangukafwa, mukangufunda hafuka yize ngunafundu ou mutu waKalunga wamuchano. Mukafunda vifuwa vyami kwakamwihi navifuwa vyenyi.+
32 Mwomwo mazu aYehova aze ahanjikile mutu waKalunga wamuchano kulijiko lyakulumbila kuMbetele, nakujizuvo jakulemesela jize jili havihela vyakulunduka+ mujinganda jaSamaliya nawakatesamo chikupu.”+
33 Chamokomoko navyuma evi, Yelovowame kasezele vilinga vyenyi vyavipiko, oloze atongwelenga lika vapilishitu havatu vamuchivulu+ mangana vazachilenga kuvihela vyakulunduka. Atongwelenga weshowo azangilenga kuzata mulimo waupilishitu. Ambilenga ngwenyi: “Mwechenu apwenga hali vapilishitu vakuzachila kuvihela vyakulunduka.”+
34 Eyi shili valingilenga vaze vakuzuvo yaYelovowame+ yavatwalile kukunonga, kaha vanongele hamavu hosena.+
Kwinyikila Chamwishi
^ Chipwe “uto wamaji,” kulumbununa uto uze wazovele namaji avimuna vakuvatula.
^ Chipwe “lyalehukile.”
