Vamyangana 1 14:1-31
14 Halwola luze, Aviya mwanaYelovowame apwile nakuviza.
2 Ngocho Yelovowame ambile kuli pwevo lyenyi ngwenyi: “Katuka uyenga kuShilo. Lyonge nge uweka mangana vakazeneke kukutachikiza ngwavo upwevo lyami. Kapolofweto Ahiya ali vene kuze. Angulwezele ngwenyi nangupwa ngumwangana wavatu ava.+
3 Mbata jimbolo 10, navindanda, nakumbu yauchi uyenga navyo kuli ikiye. Kaha mwakakulweza vyuma navisoloka kuli mwanetu.”
4 Pwevo lyaYelovowame alingile nge muze vamulwezele. Akatukile nakuya kuShilo,+ kaha akahetele kuzuvo yaAhiya. Ahiya atalile kuze apwile nakwijilila, oloze kamumweneko mwomwo yaushinakaji.
5 Oloze Yehova avangile kulweza Ahiya ngwenyi: “Pwevo lyaYelovowame ali nakwiza kuli ove nakwihula hali mwanenyi, mwomwo mwanenyi ali nakuviza. Nangukulweza vyuma muhanjika kuli ikiye.* Omu mweza, mwalyonga nge weka mangana uzeneke kumutachikiza.”
6 Omu Ahiya evwile jishindo jauze pwevo, ambile ngwenyi: “Ingila, ove pwevo lyaYelovowame. Mwomwo ika unalyongela nge umutu weka? Vanangulweze nguhanjike mujimbu waupi kuli ove.
7 Yako ulweze Yelovowame ngwove, ‘Yehova Kalunga kaIsalele nambe ngwenyi: “Ngwakusakwile muli vatu jove mangana upwenga utwamina wavatu jami vaIsalele.+
8 Kaha ngwatambwile wangana kuzuvo yaNdavichi nakuuhana kuli ove.+ Oloze ove kawalingile nge muze alingile ngamba yami Ndavichi uze alaminenga jishimbi jami, uze nawa anguzachilile namuchima wenyi wosena, nakulinga kaha vyuma vyamwaza kumeso ami.+
9 Unalingi vyuma vyavipi kuhambakana vaze vapwilengako shimbu kanda usemuke, unalitengela kalunga kove, namakombelo akuzuzulula mangana ungwivwise kupihya.+ Ami yami unombu nyima.+
10 Ngocho nanguneha vihuli kuli vaze vakuzuvo yaYelovowame, kaha nangunongesa malunga vosena* vakuzuvo yaYelovowame, kuhakilako navaze vazeneka wakuvakafwa, navaze vakuzeya muli vaIsalele. Nangukomba vakuzuvo yaYelovowame+ nge omu mutu mwakomba tuji hachihela nakutomesaho.
11 Mutu wosena wakuzuvo yaYelovowame uze mwafwila munganda, vatuwa navakamulya, kaha weshowo mwafwila muchipapa, tujila vakutuka mwilu navakamulya, mwomwo Yehova nahanjikamo lyehi.”’
12 “Shikaho katuka ukinduluke kuzuvo yove. Omu naulinga hiunahete munganda, mwanove mwafwa.
13 VaIsalele vosena navamulila nakumufunda mwomwo ikiye kaha mutu wamutanga yaYelovowame navafunda muchimbumbe hakuwana nge Yehova Kalunga kaIsalele namonomo chuma chimwe chamwaza muli ikiye.
14 Yehova mwakalitongwela ivene mwangana, chipwe vene oholili, uze mwakayula vaIsalele nakukanongesa vaze vakuzuvo yaYelovowame+ kufuma vene halikumbi lize.
15 Yehova mwakaveta vaIsalele, kaha navakapwa nge lihongo lize lili nakulinyika mumeya. Mwakavunya vaIsalele mulifuchi eli lyamwaza ahanyine kuli vakakuluka javo.+ Kaha mwakavahangila musali yaKalwiji*+ mwomwo vanatenge jipanda jajila jamitondo*+ mangana vamwivwise Yehova kupihya.
16 Kaha mwakaseza vaIsalele mwomwo yashili yize nalingi Yelovowame, yize nalingisa nawa vaIsalele vayilinge.”+
17 Pwevo lyaYelovowame akatukile nakuya kuChiliza. Omu ahetele kwakamwihi nazuvo yenyi, uze mwana afwile.
18 Ngocho vaIsalele vosena vamulilile, kaha vamufunjile nge muze ahanjikile Yehova kuhichila muli ngamba yenyi kapolofweto Ahiya.
19 Mujimbu wosena waYelovowame uze wavuluka vyajita alwile,+ nomu ayulilenga, vausoneka mumukanda wamijimbu yavamyangana javaIsalele.
20 Yelovowame ayulile myaka 22, kufumaho atokele ngana mwavakakuluka jenyi.+ Kaha mwanenyi Natave aswanyine hawangana.+
21 Halwola kanelu, Lehovowame mwanaSolomone apwile mwangana muYuta. Lehovowame apwile namyaka yakusemuka 41 omu aputukile kuyula, kaha ayulile myaka 17 muYelusalema, nganda yize Yehova asakwile+ kumiyachi yavaIsalele yosena mangana vayivulukilenga lijina lyenyi.+ Lijina lyanaye yaLehovowame apwile ikiye Nama, kaAmone.+
22 VaYuta valingilenga vyuma vyavipi kumeso aYehova,+ kaha shili valingilenga yamwivwishilenga chikuma kupihya kuhambakana yize valingilenga vakakuluka javo.+
23 VaYuta navakiko vatungilenga vihela vyakulunduka, najipanda jajila jamalolwa, najipanda jajila jamitondo*+ hajipili josena,+ namwishi yamitondo yakujika mafwo yosena.+
24 Mulifuchi mwapwile nawa malunga vaka-ujila.*+ Valingilenga vyuma vyaunyengwe vyavaka-mafuchi eka aze Yehova ahangile kumeso avaIsalele.
25 Shishake+ mwangana waEjipitu alukukile nganda yaYelusalema+ mumwaka wamuchitanu wachiyulo chaMwangana Lehovowame.
26 Kaha ambachile vikumba vyamuzuvo yaYehova, navize vyamuzuvo* yamwangana.+ Ambachile vyosena, kuhakilako najikepwe jaulu josena jize atengele Solomone.+
27 Jino Mwangana Lehovowame atengele jikepwe jeka jaunengu, kaha ajihanyine mumavoko avakulwane javaka-kulama* vaze valaminenga kuchikolo chazuvo yamwangana.
28 Omu mwangana ejilenga kuzuvo yaYehova, vaze vaka-kulama vajimbachilenga, kaha vajikindulwishilenga cheka kukapete kavaka-kulama.
29 Mujimbu wosena waLehovowame wavyuma alingile, vausoneka mumukanda wamijimbu yavamyangana javaYuta.+
30 Lehovowame naYelovowame valizungishilenga lwola lwosena.+
31 Kutwala muze, Lehovowame atokele ngana mwavakakuluka jenyi, kaha vamufunjile navakakuluka jenyi hamwe muNganda yaNdavichi.+ Naye apwile ikiye Nama, kaAmone.+ Kaha mwanenyi Aviyame*+ aswanyine hawangana.
Kwinyikila Chamwishi
^ Chipwe “Ukahanjika munganji mukananga kuli ikiye.”
^ Hepe., “nangunongesa weshowo eji kusushilanga hambango.” Eyi hihanjikiso yachiHepeleu yakasautu hakuvuluka malunga.
^ Tala Mukana waMazu.
^ Ikiye Yufwalate.
^ Tala Mukana waMazu.
^ Chipwe “malunga vaka-ujila vakutembele.”
^ Chipwe “vyamunganda.”
^ Hepe., “javaka-kulaha.”
^ Vavuluka nawa ngwavo, Aviya.
