Vamyangana 1 15:1-34
15 Aviyame aputukile kuyula vaYuta+ mumwaka wakusokesa 18 wachiyulo chaMwangana Yelovowame+ mwanaNevate.
2 Ayulile myaka yitatu muYelusalema. Lijina lyanaye apwile ikiye Maka+ muzukulu lyaAvishalome.
3 Aviyame alingilenga jishili josena jize alingilenga ise, kaha kazachililenga Yehova Kalunga kenyi namuchima wenyi wosenako, nge muze amuzachililenga kakuluka yenyi Ndavichi.
4 Oloze mwomwo yaNdavichi,+ Yehova Kalunga kenyi amuhanyine linongo* muYelusalema+ hakusakula mwanenyi amuswane mangana nganda yaYelusalema yipwengangako lika.
5 Ndavichi alingilenga vyuma vyakwoloka kumeso aYehova, kalitwaminyine kulinga vyuma vize amulwezele Kalunga hamakumbi osena akuyoya chenyiko, shina hachihande chaUliya kaHete+ kaha.
6 Lehovowame alizungishilenga naYelovowame hamakumbi osena amukuyoya chenyi.+
7 Mujimbu wosena waAviyame wavyuma alingile, vausoneka mumukanda wamijimbu yavamyangana javaYuta.+ Aviyame naYelovowame nawa valizungishilenga.+
8 Aviyame atokele ngana mwavakakuluka jenyi, kaha vamufunjile muNganda yaNdavichi. Mwanenyi Asa+ aswanyine hawangana.+
9 Asa aputukile kuyula vaYuta mumwaka wakusokesa 20 wachiyulo chaYelovowame Mwangana wavaIsalele.
10 Asa ayulile myaka 41 muYelusalema. Lijina lyakaka yenyi apwile ikiye Maka+ muzukulu lyaAvishalome.
11 Asa alingilenga vyuma vyakwoloka kumeso aYehova+ nge muze alingilenga kakuluka yenyi Ndavichi.
12 Ahangile malunga vaka-ujila* mulifuchi,+ kaha afumishile makombelo aunyengwe* aze vatengele vakakuluka jenyi.+
13 Afumishile nawa kaka yenyi wapwevo Maka+ hachihela chenyi vamuvulukilenga ngwavo naye yamwangana, mwomwo atengele kaponya waunyengwe wakuzachisa hakulemesa panda yajila yamutondo.* Asa atetele uze kaponya wakaka yenyi,+ kaha amwochelele kuChinema chaKichilone.+
14 Oloze kafumishile vihela vyakulundukako.+ Chipwe ngocho, Asa azachilile Yehova namuchima wenyi wosena hamakumbi akuyoya chenyi osena.
15 Kaha vyuma vize ajilikile ikiye naise vyakufwana nge palata, naulu, navinoma vyakulisezaseza avinehele muzuvo yaYehova.+
16 Asa naMbasha+ mwangana wavaIsalele valizungishilenga lwola lwosena.
17 Ngocho Mwangana wavaIsalele Mbasha anyemukilile vaYuta, kaha aputukile kutunga nganda yaLama+ mangana vatu vazeneke kulovoka chipwe kwingila munganda yaAsa mwangana wavaYuta.+
18 Ngocho Asa ambachile palata, naulu vize vyasalile havikumba vyamuzuvo yaYehova, nahavikumba vyamuzuvo* yamwangana nakuvihana kuli vangamba jenyi. Mwangana Asa atumine vaze vangamba kuli Mbene-hatate mwangana waSulya.+ Mbene-hatate atwaminenga kuNdamashiku, kaha apwile mwanaTavalimone, Tavalimone mwanaHejone. Avatumine ngwenyi:
19 “Ami nayove twalikasa chivwasano* ngana chize alikashile tata naiso. Ngocho ngunakutumina wana wapalata naulu. Yako uhokole chivwasano* chize walikashile naMbasha mwangana wavaIsalele mangana alitwamine kungunyemukila.”
20 Ngocho Mbene-hatate evwililile vyuma ahanjikile Mwangana Asa, kaha atumine tupitau twamaswalale jenyi vakalukuke jinganda javaIsalele. Kaha valukukile Iyone,+ naNdane,+ naAvele-mbete-maka, nangalila yaKinelete yosena, nangalila yaNafwatale yosena.
21 Omu Mbasha evwile mujimbu kana, hahaze vene alitwaminyine kutunga Lama, kaha atwaminenga lika muChiliza.+
22 Jino Mwangana Asa asanyikile vaYuta vosena mangana vayenga nakumbata malolwa navitondo vize Mbasha asakile kutungisa Lama. Kaha Mwangana Asa avitungishile Ngeva+ kungalila yavaMbenjamine, naMijipa.+
23 Mujimbu wosena waAsa wakuvuluka ngolo jenyi, navyuma vyosena alingile, najinganda jize atungile, vausoneka mumukanda wamijimbu yavamyangana javaYuta. Oloze muushinakaji wenyi avijile musongo umwe kumahinji enyi.+
24 Asa atokele ngana mwavakakuluka jenyi, kaha vamufunjile muNganda yakakuluka yenyi Ndavichi. Mwanenyi Yehoshafwate+ aswanyine hawangana.
25 Natave+ mwanaYelovowame aputukile kuyula vaIsalele mumwaka wamuchivali wachiyulo chaAsa Mwangana wavaYuta, kaha ayulile vaIsalele hamyaka yivali.
26 Natave alingilenga vyuma vyavipi kumeso aYehova, akavilenga jijila jaise+ nakulinga shili nge yize alingilenga ise, nakulingisa navaIsalele vayilinge.+
27 Omu Natave navaIsalele vosena vahakile Ngivetone+ nganda yavaFwilishite muchingombela, Mbasha mwanaAhiya wakuzuvo yavaIsakale afumbukilile Natave nakumujihila kuze kunganda yaNgivetone.
28 Mbasha ajihile Natave mumwaka wamuchitatu wachiyulo chaAsa Mwangana wavaYuta, kaha amushishile hawangana.
29 Omu Mbasha ashishile hawangana, ajihile vatu vosena vakuzuvo yaYelovowame. Kasezeleho mutu numba umweko, avanongesele vosena nge muze ahanjikile Yehova kuhichila muli ngamba yenyi Ahiya wakuShilo.+
30 Avajihile mwomwo yashili yize alingile Yelovowame, yize alingishile navaIsalele vayilinge. Kaha nawa mwomwo evwishile Yehova Kalunga kaIsalele kupihya chikuma.
31 Mujimbu wosena waNatave wavyuma vyosena alingile vausoneka mumukanda wamijimbu yavamyangana javaIsalele.
32 Asa naMbasha Mwangana wavaIsalele valizungishilenga lwola lwosena.+
33 Mbasha mwanaAhiya aputukile kuyula vaIsalele vosena kuChiliza mumwaka wamuchitatu wachiyulo chaAsa Mwangana wavaYuta, kaha ayulile myaka 24.+
34 Mbasha alingilenga vyuma vyavipi kumeso aYehova,+ akavilenga jijila jaYelovowame nakulinga shili yize alingilenga, yize nawa alingishile navaIsalele vayilinge.+
Kwinyikila Chamwishi
^ Linongo hano linemanyinako mwangana wakuzuvo yaNdavichi chipwe chisaka chenyi chawangana.
^ Chipwe “malunga vaka-ujila vakutembele.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Tala Mukana waMazu.
^ Chipwe “vyamunganda.”
^ Chipwe “twalishika lushiko.”
^ Chipwe “uhokole lushiko.”
