Vamyangana 1 16:1-34
16 Jino Yehova alwezele Yehu+ mwanaHananyi+ ahanjike kuli Mbasha ngwenyi:
2 “Ngwakukatwile mulukungu nakukutongola kupwa utwamina wavatu jami vaIsalele,+ oloze unakavenga jijila jaYelovowame, nakulingisa vatu jami vaIsalele valinge shili mangana vangwivwise kupihya.+
3 Ngocho nangunongesa Mbasha navaze vakuzuvo yenyi. Nanguvalinga nge muze ngwalingile vaze vakuzuvo yaYelovowame+ mwanaNevate.
4 Mutu wosena wakuzuvo yaMbasha uze mwakafwila munganda, vatuwa navakamulya, kaha weshowo mwakafwila muchipapa, tujila vakutuka mwilu navakamulya.”
5 Mujimbu wosena waMbasha wavyuma alingile, nangolo jenyi, vausoneka mumukanda wamijimbu yavamyangana javaIsalele.
6 Mbasha atokele ngana mwavakakuluka jenyi, kaha vamufunjile kuChiliza.+ Mwanenyi Ela aswanyine hawangana.
7 Yehova ahanjikile mazu akuneha lupi hali Mbasha navaze vakuzuvo yenyi kuhichila muli kapolofweto Yehu mwanaHananyi, mwomwo Mbasha alingile vyuma vyavipi kumeso aYehova nakumwivwisa kupihya navilinga vyenyi, kaha nawa mwomwo ajihile Natave.*+ Ngocho navakamulinga nge muze valingile vaze vakuzuvo yaYelovowame.
8 Ela mwanaMbasha aputukile kuyula vaIsalele kuChiliza mumwaka wakusokesa 26 wachiyulo chaAsa Mwangana wavaYuta, kaha ayulile myaka yivali.
9 Ngamba yenyi Jimili uze apwile kapitau kachimbwa chavaka-kutambukisa matemba ajita, amufumbukilile omu apwile nakunwa wala kuzuvo yaAlaza muChiliza. Alaza apwile kapitau kuzuvo yamwangana muChiliza.
10 Ngocho Jimili engilile muze muzuvo nakumujiha.+ Amujihile mumwaka wakusokesa 27 wachiyulo chaAsa Mwangana wavaYuta, kaha amushishile hawangana.
11 Omu Jimili alingile hanatwame lyehi halitanda lyawangana, ajihile vaze vakuzuvo yaMbasha vosena. Kasezeleho lunga numba umweko,* kuhakilako vene navausoko wenyi* namasepa jenyi.
12 Ngocho Jimili anongesele vaze vakuzuvo yaMbasha vosena nge muze Yehova ahanjikile kuhichila muli kapolofweto Yehu.+
13 Avajihile mwomwo yashili yize alingile Mbasha namwanenyi Ela, nahakulingisa nawa vaIsalele valinge shili. Kaha vevwishile Yehova Kalunga kaIsalele kupihya namakombelo avo.+
14 Mujimbu wosena waEla wavyuma alingile vausoneka mumukanda wamijimbu yavamyangana javaIsalele.
15 Jimili ayulile makumbi 7 kuChiliza mumwaka wakusokesa 27 wachiyulo chaAsa Mwangana wavaYuta. Halwola kanelu, vaka-kwasa jita javaIsalele vatungile chilombo chavo kunganda yavaFwilishite Ngivetone+ mangana vayilukuke.
16 Jino vaze vaka-jita vevwile mujimbu wakwamba ngwavo: “Jimili nafumbukila mwangana kaha namujihi.” Ngocho vaIsalele vosena vatongwele Omoli,+ kapitau kamaswalale halikumbi lize kupwa mwangana wavaIsalele muze muchilombo.
17 Omoli navaIsalele vaze apwile navo vakatukile kuNgivetone nakuya nakuhaka nganda yaChiliza muchingombela.
18 Omu Jimili amwene ngwenyi eyi nganda vanayitambula, achinyinyine mukaposhi kamuzuvo* yamwangana, alyochelele muze muzuvo kaha afwile.+
19 Afwile mwomwo yavyuma vyavipi vize alingile kumeso aYehova, akavile jijila jaYelovowame, nakulingisa nawa vaIsalele valinge shili.+
20 Mujimbu wosena waJimili wavyuma alingile, nomu afumbukilile mwangana, vausoneka mumukanda wamijimbu yavamyangana javaIsalele.
21 Ngocho vaIsalele valihandunwine mumazavu avali. Lizavu limwe lyakavile Chivinyi mwanaNginate nakusaka ngwavo apwenga mwangana, kaha lizavu likwavo lyakavile Omoli.
22 Oloze vatu vaze vakavile Omoli vafungulwile vatu vaze vakavile Chivinyi mwanaNginate. Ngocho Chivinyi afwile, kaha Omoli ikiye apwile mwangana.
23 Omoli aputukile kuyula vaIsalele mumwaka wakusokesa 31 wachiyulo chaAsa Mwangana wavaYuta, kaha ayulile myaka 12. KuChiliza ayulile myaka 6.
24 Alanjile pili yaSamaliya kuli Shemele najitalende* japalata jivali, kaha haze hapili atungileho nganda. Nganda yize atungile ayilukile ngwenyi Samaliya,*+ lijina lyaShemele mwenyapili.
25 Oloze Omoli alingilenga vyuma vyavipi kumeso aYehova, kaha vilinga vyenyi vyapihile chikuma kuhambakana vyavaze vapwilengako shimbu kanda asemuke.+
26 Akavilenga jijila jaYelovowame mwanaNevate, kaha alingile shili nge ize alingilenga Yelovowame uze ahungumwishile navaIsalele valinge shili kana. Ngocho vevwishile Yehova Kalunga kaIsalele kupihya namakombelo avo.+
27 Mujimbu wosena waOmoli wavyuma alingile, namilimo yenyi yangolo, vausoneka mumukanda wamijimbu yavamyangana javaIsalele.
28 Omoli atokele ngana mwavakakuluka jenyi, kaha vamufunjile muSamaliya. Mwanenyi Ahave+ aswanyine hawangana.
29 Ahave mwanaOmoli aputukile kuyula vaIsalele mumwaka wakusokesa 38 wachiyulo chaAsa Mwangana wavaYuta. Kaha ayulile vaIsalele myaka 22 muSamaliya.+
30 Vilinga vyaAhave mwanaOmoli vyapihile chikuma kumeso aYehova kuhambakana vyavaze vapwilengako shimbu kanda asemuke.+
31 Ahave kalingile kaha shili yize alingile Yelovowame+ mwanaNevateko, oloze ambachile nawa naYezevele+ mwanamwangana wavaka-Shitone+ Etambale. Kaha aputukile kulemesa Mbale+ nakulifukula kuli ikiye.
32 Atungile nawa lijiko lyaMbale lyakulumbila kuzuvo* yaMbale+ yize atungile kuSamaliya.
33 Ahave atengele nawa panda yajila yamutondo,*+ ngocho evwishile Yehova Kalunga kaIsalele kupihya chikuma kuhambakana vamyangana javaIsalele vosena vaze vapwilengako shimbu kanda asemuke.
34 Hamakumbi aAhave, Hiyele wakuMbetele atungulwile Yeliko. Omu alile chihela chayo, mwanenyi watwatwa Avilame afwile, kaha omu emikile nawa mapito anganda kana, mwanenyi wakasulasongo Senguve afwile. Chapwile ngocho mangana mazu aze ahanjikile Yehova kuhichila muli Yoshuwa mwanaNune atesemo.+
Kwinyikila Chamwishi
^ MwanaYelovowame.
^ Hepe., “Kasezeleho vaze veji kusushilanga hambangoko.” Eyi hihanjikiso yachiHepeleu yakasautu hakuvuluka malunga.
^ Chipwe “navaka-kumulingilako sambanjinga.”
^ Chipwe “kamunganda.”
^ Talende yimwe yapwile jikilongalamu 34.2. Tala Chihande B14.
^ Ulumbunwiso, “YakuChisaka chaShemele.”
^ Chipwe “kutembele.”
^ Tala Mukana waMazu.
