Vamyangana 1 17:1-24
17 Jino Elija*+ wakuChishivi, muNgileyate,+ ambile kuli Ahave ngwenyi: “Omu ayoya Yehova tu, ou Kalunga kaIsalele, ou ngweji kuzachilanga,* kakweshi kupwa lyume chipwe vula mumyaka eyi nayizahoko kuvangomu nangukahanjika.”+
2 Yehova ambile kuli Elija ngwenyi:
3 “Fuma kuno uyenga nakuswama kuChinema chaKelite* kumututuko waYotau.
4 Naukanwanga meya amuze mumwanakalwiji, kaha nangukalweza makololo vakakunehelenga vyakulya kuze.”+
5 Hahaze vene Elija ayile nge muze amulwezele Yehova. Kaha akatwaminenga kuChinema chaKelite,* kumututuko waYotau.
6 Makololo vamunehelelenga mbolo nanyama nachimene nachingoloshi, kaha anwinenga meya amuze mumwanakalwiji.+
7 Oloze omu mwahichile makumbi, uze mwanakalwiji omine chau+ mwomwo mulifuchi kamwapwile vulako.
8 Jino Yehova ambile cheka kuli ikiye ngwenyi:
9 “Katuka uyenga kunganda yaZalefwate kuShitone, ukatwamenga kuze. Nangulweza tuliwe umwe akakuhanenga vyakulya.”+
10 Ngocho Elija akatukile nakuya kuZalefwate. Omu ahetele kwakamwihi nachikolo changanda, awanyine tuliwe umwe ali nakuchava jikunyi. Kaha ambile kuli ikiye ngwenyi: “Nguhaneko tumeya mulupasa mangana ngunwenga.”+
11 Omu tuliwe apwile nakuya nakumbata meya, Elija amutambakanyine ngwenyi: “Unguneheleko nakachihanda kambolo ngulyenga.”
12 Uze tuliwe ambile ngwenyi: “Omu ayoya Yehova Kalunga kove tu, kangweshi namboloko. Nguli kaha naunga waundende mumulondo natumaji nawa twatundende musaji.+ Ngwezanga nakuchava tujikunyi mangana ngukocheho mbolo yamakumishilo yakulya ami namwanami. Kufumaho, natufwa jino mwomwo yazala.”
13 Elija ambile kuli ikiye ngwenyi: “Kanda ulizakaminako. Yako ulinge nge omu unahanjika. Oloze vangila kungwochela kambolo kakandende naunga uli nawo ungunehele. Kufumaho jino numba wochenga mbolo yove namwanove.
14 Mwomwo Yehova Kalunga kaIsalele nambe ngwenyi, ‘Unga uli mumulondo wove kaweshi kukumako, namaji ali musaji yove nawa kaweshi kukumako swi noho Yehova mwakanokesa vula hamavu.’”+
15 Ngocho uze tuliwe alingile nge muze amulwezele Elija, kaha ikiye navaze vakuzuvo yenyi naElija hamwe valilenga vyakulya hamakumbi amavulu.+
16 Unga uze wapwile mumulondo kawakumineko, namaji nawa aze apwile musaji kawakumineko nge muze ahanjikile Yehova kuhichila muli Elija.
17 Omu mwahichile makumbi, mwana wayauze tuliwe avijile, kaha misongo yenyi yatohwele chikuma, ngocho afwile.+
18 Uze tuliwe ambile kuli Elija ngwenyi: “Mulonga muka ngunakuvulumuna ove mutu waKalunga wamuchano? Uno uneza nakungwanukisa shili yami nakujiha mwanami tahi?”+
19 Oloze Elija ambile kuli ikiye ngwenyi: “Ngunehele owo mwanove.” Ngocho amutambwile kumavoko anaye, ayile nenyi kukapete kahelu muze apwilenga nakutwama, kaha amusavalikile hakahela kenyi.+
20 Kaha ambile kuli Yehova ngwenyi: “Ove Yehova Kalunga kami,+ ika unanehela vihuli hali ou tuliwe nguli nakutwama nenyi hakujiha mwanenyi?”
21 Kaha aulumanyine hali uze kanyike mapapa katatu nakwamba kuli Yehova ngwenyi: “Ngunakulembelela ove Yehova Kalunga kami, achitave ou kanyike ayoye cheka.”
22 Yehova evwililile mazu aElija,+ ngocho uze kanyike akasumukile nakuputuka kuhwima cheka.+
23 Kufumaho ambachile uze kanyike muze mukapete nakumutwala kuli naye. Kaha ambile ngwenyi: “Tala! Mwanove nayoyo cheka.”+
24 Ngocho uze pwevo ambile kuli Elija ngwenyi: “Ngunatachikiza jino ngwami chikupu vene umutu waKalunga,+ kaha mazu aYehova aze wahanjikanga amuchano.”
Kwinyikila Chamwishi
^ Ulumbunwiso, “Yehova Ikiye Kalunga Kami.”
^ Hepe., “ou ngweji kwimananga kumeso enyi.”
^ Chipwe “kuMwanakalwiji Kelite.”
^ Chipwe “kuMwanakalwiji Kelite.”
