Vamyangana 1 18:1-46
18 Omu mwahichile makumbi amavulu, Yehova ahanjikile kuli Elija mumwaka wamuchitatu+ ngwenyi: “Yako ukalisolole kuli Ahave, mwomwo nangunokesa vula hamavu.”+
2 Ngocho Elija ayile nakulisolola kuli Ahave. Halwola kanelu, zala yakalombolombo yatohwele chikuma+ muSamaliya.
3 Jino Ahave asanyikile Ovachiya, uze apwile muka-kutala vaze vakuzuvo yenyi. (Ovachiya amwivwilenga Yehova woma.
4 Omu Yezevele+ ajihilenga vapolofweto jaYehova, Ovachiya aswekele vapolofweto 100 muwina wakusendeveka. Avaswekele mumazavu avali, halizavu 50, halizavu 50, kaha avahanyinenga vyakulya nameya.)
5 Jino Ahave ambile kuli Ovachiya ngwenyi: “Tuyenga nakutondatonda tuselwoke vameya navinema* mwahita ngalila yosena, pamo natuwanako mwila wakutamo wakulisa tuvalu twetu navimbulu jetu kuchina vimuna jetu vosena navafwa.”
6 Ngocho valipulilile jingalila jize vatelele kuya nakukekesa. Ahave ayile najila yenyi, kaha Ovachiya nawa ayile najila yenyi.
7 Omu Ovachiya apwile nakuya mujila yenyi, alihumanganyine naElija. Ovachiya atachikijile Elija, kaha afukamine chameso hamavu nakwamba ngwenyi: “Ove yove mwata wami Elija+ nyi?”
8 Ikiye akumbulwile ngwenyi: “Yami vene. Yako ukalweze mwata wove ngwove, ‘Ngunawane Elija.’”
9 Oloze Ovachiya ambile ngwenyi: “Shili muka ngunalingi numba uhane ami ngamba yove mumavoko aAhave mangana angujihe?
10 Omu ayoya Yehova Kalunga kove tu, kakweshi lifuchi chipwe wangana nazeneka mwata wami kutuma vatu vayenga nakukutondako. Omu vambilenga ngwavo, ‘Katwamuwanyineko,’ Ahave alingishile vatu vakuwangana uze, namulifuchi lize valishinge ngwavo kavamuwanyineko.+
11 Jino nawamba ngachilihi ngwove, ‘Yako ukalweze mwata wove ngwove: “Ngunawane Elija”’?
12 Omu nangukuseza kuno, shipilitu yaYehova nayikumbata nakukutwala+ kuchihela ngunazeneka ami kutachikiza. Jino omu nangumulweza Ahave mujimbu kana, kaha himwazeneka kukuwana, mwangujiha chikupu. Ami ngamba yove ngunamwivunga Yehova woma kufuma vene kuunyike wami.
13 Uno ove mwata wami kavakulwezele vyuma ngwalingile omu Yezevele ajihile vapolofweto jaYehova nyi? Ngwaswekele vapolofweto jaYehova 100 muwina wakusendeveka. Ngwavaswekele mumazavu avali, halizavu 50, halizavu 50, kaha ngwavahanyinenga vyakulya nameya.+
14 Jino nawamba ngachilihi ngwove, ‘Yako ukalweze mwata wove ngwove: “Ngunawane Elija.”’ Ahave mwangujiha chikupu.”
15 Oloze Elija ambile ngwenyi: “Omu ayoya Yehova wamayongomena tu, uze ngweji kuzachilanga,* lelo nangulisolola kuli Ahave.”
16 Ngocho Ovachiya ayile nakulweza Ahave, kaha Ahave ayile mangana akaliwane naElija.
17 Omu Ahave amwene Elija, ambile ngwenyi: “Ove yove uli nakuneha ukalu* hali vaIsalele nyi?”
18 Ikiye ambile ngwenyi: “Ami keshi yami nguli nakuneha ukalu hali vaIsaleleko, oloze yove navaze vakuzuvo yove, yenu muli nakuneha ukalu mwomwo munakane jishimbi jaYehova nakuzachila vaMbale.+
19 Shikaho, lweza vaIsalele vosena vezenga kuli ami kuPili yaKalamele,+ hohamwe navapolofweto jaMbale 450, navapolofweto 400 vaka-kuzachila kupanda yajila yamutondo*+ vaze veji kulilanga kumesa yaYezevele.”
20 Ngocho Ahave atumine mazu muli vaIsalele vosena, kaha valikungulwile hamwe navapolofweto kuze kuPili yaKalamele.
21 Jino Elija apandamine kuli vatu vosena nakwamba ngwenyi: “Uno namukakasananga palanga nakumwaka uka?+ Kachi nge Yehova napu Kalunga wamuchano, kaha mukavangizenu,+ oloze nge Mbale nawa napu Kalunga wamuchano, kaha mukavangizenu.” Oloze vatu kavamukumbulwile lizu numba limweko.
22 Elija ambile kuli vatu ngwenyi: “Yami kaha kapolofweto kaYehova ngunasaleho,+ oloze Mbale ali navapolofweto vakuheta ku 450.
23 Vatu vanehe mavuvu javangombe vavali, kaha vapolofweto vasakuleho livuvu umwe, vamuvatule vipuka vipuka nakumuhaka hajikunyi, oloze kanda navahakaho kakahyako. Kaha ami nawa nangujiha livuvu lyangombe mukwavo nakumuhaka hajikunyi, oloze kangweshi kuhakaho kakahyako.
24 Kaha vapolofweto vasanyike halijina lyakalunga kavo,+ ami nawa nangusanyika halijina lyaYehova. Weshowo Kalunga mwakumbulula hakuneha kakahya, ikiye Kalunga wamuchano.”+ Ngocho vatu vosena vamukumbulwile ngwavo: “Vyuma unahanjika vyamwenemwene.”
25 Jino Elija ambile kuli vaze vapolofweto jaMbale ngwenyi: “Livangenu kusakula livuvu lyangombe umwe nakumuwahisa mwomwo enu munapu muvavavulu. Kufumaho musanyike halijina lyakalunga kenu, oloze kanda namuhakaho kakahyako.”
26 Vaze vapolofweto vambachile uze livuvu lyangombe vavahanyine, vamuwahishile, kaha vasanyikilenga halijina lyaMbale kufuma kuchimene swi nomu likumbi lyahetele hamulungu ngwavo: “Ove Mbale, tukumbulule!” Oloze kavevwile lizu lyamutu wakuvakumbululako.+ Kaha vajingwojokele kulijiko lyakulumbila lize vatungile.
27 Omu lyahetele likumbi hamulungu, Elija aputukile kuvahulamisa ngwenyi: “Tambakanenu chikuma. Ngwetu muli nakusanyika kalunga,+ pamo ali nakuhunanana havyuma vimwe, nyi pamo nayi nakulihehwa.* Mokomoko pamo nasavala, kaha ali nakusakiwa kumuhindula.”
28 Shikaho vatambakanyinenga chikuma, valituvile jipoko jamikwale, namakunga kweseka nachisemwa chavo, kaha manyinga ambwambumukile hamijimba yavo.
29 Kaha vatwalileho lika kulinga ngocho* palanga nakulwola luze vahanyinenga mawana amanona achingoloshi. Oloze kavevwile lizu lyamutu wakuvakumbululako, kaha nawa nou avevwililile wauchi.+
30 Kutwala muze, Elija ambile kuli vatu ngwenyi: “Pandamenu kuli ami.” Ngocho vatu vosena vapandamine kuli ikiye. Kaha atungulwile lijiko lyaYehova lyakulumbila lize lyapwile lyakushiuka.+
31 Elija ambachile malolwa 12 nge kutesa nakuvula chamiyachi yavana vaYakova. Yakova vamulwezele kuli Yehova ngwenyi: “Lijina lyove yove Isalele jino.”+
32 Aze malolwa awatungile lijiko lyakulumbila+ lyakulemesa lijina lyaYehova. Kufumaho afulile kapila kulijiko lyakulumbila jingulwishi ndo, kaha muze muchihela vajingulwishile kapila mwapwile mwamunene navahasa kutumba vyesekelo vyamanona vyakuheta mujishiya* jivali.
33 Kaha alileho jikunyi, atetele uze livuvu lyangombe vipuka nakuvihaka haze hajikunyi.+ Alwezele vatu ngwenyi: “Zalisenu milondo yiwana nameya muwahingunwine hawana wakulumba nahajikunyi.”
34 Ambile cheka ngwenyi: “Lingenumo kamuchivali.” Kaha valingile vene ngocho. Ambile cheka nawa ngwenyi: “Lingenumo kamuchitatu.” Ngocho valingilemo.
35 Meya amwangalikilile hamavu kuze kulijiko lyakulumbila. Kaha azalishile nawa kaze kapila nameya.
36 Omu lwahetele lwola lwakuhana mawana achingoloshi, kapolofweto Elija apandamine+ kulijiko lyakulumbila nakwamba ngwenyi: “Ove Yehova, Kalunga kaApalahama,+ naIsaka,+ naIsalele, lelo vatu vatela kutachikiza ngwavo ove yove Kalunga muIsalele, ngwavo ami ngungamba yove, kaha vyuma vyosena evi ngunavilingi nge omu munayi mazu ove.+
37 Achingukumbulule, ove Yehova, achingukumbulule, mangana vatu ava vatachikize ngwavo ove Yehova unapu uKalunga wamuchano kaha nawa nawalumuna michima yavo vakinduluke kuli ove.”+
38 Kaha kakahya kaYehova kafumine mwilu nakwocha aze mawana akulumba,+ najikunyi, namalolwa, namavu, kaha komishile nameya aze apwile mukapila.+
39 Omu vatu vosena vamwene chuma kanechi vafukamine chameso hamavu nakwamba ngwavo: “Yehova napu Kalunga wamuchano! Yehova napu Kalunga wamuchano!”
40 Jino Elija ambile ngwenyi: “Kwatenu vapolofweto jaMbale vosena. Kanda kuchina mutu numba umweko.” Ngocho vavakwachile, kaha Elija avatwalile kumwanakalwiji Kishone+ nakukavajihilako.+
41 Elija ambile kuli Ahave ngwenyi: “Kanduka, ukalye nakunwa, mwomwo kuli nakwivwakana chivumo chavula yayinene.”+
42 Ngocho Ahave ayile nakulya nakunwa. Oloze Elija akandukile helu lyapili yaKalamele, afukamine hamavu nakunongamina hamambuli enyi.+
43 Jino ambile kuli ngamba yenyi ngwenyi: “Kanduka utale kukalungalwiji.” Ngocho akandukile helu, atalile, kaha ejile nakwamba ngwenyi: “Nevi ngunamono vyauchi.” Oloze Elija ambile mapapa 7 ngwenyi: “Yakoko cheka.”
44 Omu ngamba yenyi ayileko tando yakusokesa 7 ambile ngwenyi: “Mukalungalwiji munakufuma kalivwi kakandende kakufwana nge livoko lyamutu.” Jino Elija ambile kuli ikiye ngwenyi: “Yako ukalweze Ahave ngwove, ‘Kasa litemba lyove uyenga washi kuchina vula nayikujikilila.’”
45 Mukapyapya kakandende kaha, kwilu kwalifwikile, peho yahuhwile, kaha vula yayinene yaputukile kunoka.+ Ahave ayile nalitemba lyenyi kuYezelele.+
46 Oloze ngolo jaYehova jejile hali Elija, akashile chikuto chenyi mumbunda, kaha alahile nakulivanga kulutwe lwaAhave swi nomu ahetele kuYezelele.
Kwinyikila Chamwishi
^ Chipwe “navana vatulwiji.”
^ Hepe., “uze ngweji kwimananga kumeso enyi.”
^ Chipwe “vihuli.”
^ Tala Mukana waMazu.
^ Chipwe pamo, “nayi ungeji.”
^ Chipwe “kulinga nge muze veji kulinganga vapolofweto.”
^ Shiya yimwe yapwile jilita 7.33. Tala Chihande B14.
