Vamyangana 1 19:1-21
19 Ahave+ alwezele Yezevele+ vyuma vyosena alingile Elija nomu ajihile vapolofweto vosena napoko yamukwale.+
2 Ngocho Yezevele atumine kanganda kuli Elija ngwenyi: “Kachi nge hamene nalwola nge luno kangweshi kukujiha nge muze unajihi ava vapolofwetoko, kaha tulunga vanguzangamise mwamunene.”
3 Elija evwile woma, kaha akatukile nakuchina mangana ayovole mwono wenyi.+ Achinyinyine kuMbele-sheva+ muYuta,+ kaha oku kukiko asezele ngamba yenyi.
4 Kufuma kuMbele-sheva atambukile ungeji walikumbi lyamuundu mupambo, kahomu ahetele mwishi yamutondo wamumbulume atwamine. Kaha alombele kachi afwenga, ambile ngwenyi: “Kunahu. Ove Yehova ngujihe+ mwomwo ami kangwalemene kuhambakana vakakuluka jamiko.”
5 Elija asavalile tulo muze mwishi yamutondo wamumbulume. Oloze kangelo amukwachile+ nakumwamba ngwenyi: “Hinduka ulyenga.”+
6 Omu ahindukile amwene mbolo yamujingulule hamalolwa akakahya namulondo wameya kumitwe yenyi. Alile nakunwa, kaha asavalile cheka.
7 Uze kangelo kaYehova ejile kamuchivali, amukwachile nakumwamba ngwenyi: “Hinduka ulyenga mwomwo ungeji nautambuka wausuku chikuma.”
8 Ahindukile, alile nakunwa kaha akwachile ngolo, ngocho atambukile makumbi 40 ufuku namusana palanga nomu akahetele kuHoleve, kupili yaKalunga wamuchano.+
9 Kaha engilile kuwina wakusendeveka,+ asavalile kuze. Jino Yehova ambile kuli ikiye ngwenyi: “Ove Elija, uneza nakulinga ika kuno?”
10 Ikiye ambile ngwenyi: “Ove Yehova Kalunga wamayongomena,+ ami ngunakuzachilanga natwima makumbi osena. VaIsalele vanaseze lushiko lwove,+ vanashiula majiko ove akulumbila, kaha vapolofweto jove nawa vanavajihi najipoko jamikwale,+ ami yami kaha ngunasaleho. Oholyapwa vali nakusaka kungujiha nayami.”+
11 Oloze Kalunga amwambile ngwenyi: “Lovoka ukemane hapili, kumeso aYehova.” Kaha Yehova ahichile kumeso enyi.+ Jino peho yangolo, yayinene yahuhwile nakupula jipili nakupazwojola malolwa kumeso aYehova,+ oloze Yehova kapwile muze mupehoko. Omu yatulile peho, kwejile mundenda,+ oloze Yehova kapwile muze mumundendako.
12 Omu wahichile mundenda, kwejile kakahya,+ oloze Yehova kapwile muze mukakahyako. Kaha omu kakumine kakahya, kwevwakanyine lizu lyakuunda, lyalivwovu.+
13 Omu Elija evwile lizu kana, alifwikile chikuto chenyi+ kumeso enyi, alovokele nakwimana kuwingililo wauze wina wakusendeveka. Jino lize lizu lyamwihwile ngwalyo: “Ove Elija, uneza nakulinga ika kuno?”
14 Ikiye ambile ngwenyi: “Ove Yehova Kalunga wamayongomena, ami ngunakuzachilanga natwima makumbi osena. VaIsalele vanaseze lushiko lwove,+ vanashiula majiko ove akulumbila, kaha vapolofweto jove nawa vanavajihi najipoko jamikwale, ami yami kaha ngunasaleho. Oholyapwa vali nakusaka kungujiha nayami.”+
15 Jino Yehova ambile kuli ikiye ngwenyi: “Kinduluka uyenga kupambo yaNdamashiku. Omu naukaheta kuze, ukawavisa Hazayele+ kupwa mwangana waSulya.
16 Ukawavisa nawa Yehu+ muzukulu lyaNyimishi kupwa mwangana wavaIsalele. Kaha ukawavisa nawa Elisha* mwanaShafwate wakuAvele-mehola kupwa kapolofweto uze mwakakuswana yove.+
17 Ou mwakapuluka kupoko yamukwale yaHazayele,+ Yehu mwakamujiha,+ kahou mwakapuluka kupoko yamukwale yaYehu, Elisha mwakamujiha.+
18 Nguchili navatu 7,000 muIsalele+ vaze kavalifukwile kuli Mbaleko,+ kaha nawa kavamusweswenyele natunwa twavoko.”+
19 Omu afumine kuze, ayile, akawanyine Elisha mwanaShafwate navakwavo vali nakulima navangombe vaze vapwile kujitoka 12. Kaha Elisha apwile nakulima navangombe vakutoka yamakumishilo. Ngocho Elija apandamine kuli ikiye, kaha Elija ambilile chikuto chenyi+ hali ikiye.
20 Elisha asezele vaze vangombe, alahilile Elija. Ambile kuli ikiye ngwenyi: “Ngwitavise ngukasweswenye tata namama, kaha nangukukavangiza.” Ikiye amukumbulwile ngwenyi: “Yako, ngukukanyishile ikaze?”
21 Ngocho Elisha akindulukile, ambachile vangombe vakutoka yimwe nakuvajiha. Kaha mitondo yize vatungishile lize litemo lyavangombe, ayitengele jikunyi, atelekeleho nyama nakuyihana kuvatu valyenga. Kufumaho akatukile nakukavangiza Elija, kaha apwile muka-kumuzachila.+
Kwinyikila Chamwishi
^ Ulumbunwiso, “Kalunga Ikiye Ulwilo.”
