Vamyangana 1 2:1-46
2 Omu lwola lwakufwa chaNdavichi lwahetele kwakamwihi, ahanyine mwanenyi Solomone jindongi jino ngwenyi:
2 “Ami kalinwomu ngufwenga,* shikaho jikiza,+ umika.+
3 Lamanga vyuma vize nahanjika Yehova Kalunga kove, utambukenga mujijila jenyi, nakulamanga jishimbi jenyi, namazu enyi akuyula, namazu enyi akwanukisa nge muze vavisoneka muJishimbi jaMose.+ Nge mulinga ngocho, kaha mufukilanga* muvyuma vyosena naulinganga nakweshokwo nauyanga.
4 Kaha Yehova mwakatesamo lushiko luze ashikile hali ami ngwenyi: ‘Kachi nge vana vove navalamanga jijila javo, nakutambukanga mukulonga kumeso ami namichima yavo yosena, namyono* yavo yosena,+ kaha halitanda lyawangana waIsalele+ nahakatwamanga lika mutu wamuchisaka chove.’
5 “Ove unatachikiza kanawa vyuma alingile Yowave mwanaZeluwiya kuli ami, ajihile tupitau vavali vamaswalale javaIsalele, vaAvanele+ mwanaNele naAmasa+ mwanaYetele. Avajihile, amwangile manyinga+ avo mulwola lwakuunda, nakushila manyinga avo kumuhya wapwile mumbunda yenyi, nakumendelo apwile kumahinji enyi.
6 Ukamulinga mweshomwo unashinganyeka, kanda akalifwila ivene nakuya muFukako.*+
7 “Oloze vana vaMbalajilai+ wakuNgileyate ukavasolwela zangi yakwilila, kaha vakapwe hali vaze navakalyanga kumesa yove, mwomwo vangulamine+ omu ngwachinyine ndumbwove Avasalome.+
8 “Kuli nawa Shimei mwanaNgela kaMbenjamine wakuMbahulime. Angwangwile mwamupi+ halikumbi lize ngwapwile nakuya kuMahanaime.+ Oloze omu ejile nakunguwana kuYotau, ngwalishingile Yehova kuli ikiye ngwami, ‘Kangweshi kukakujiha napoko yamukwaleko.’+
9 Shikaho ukamuzangamise,+ mwomwo ove unapu umutu wamangana, unatachikiza mwakumulinga. Kanda ukamwecha akalifwile ivene nakuya muFukako.”*+
10 Jino Ndavichi atokele ngana mwavakakuluka jenyi, kaha vamufunjile muNganda yaNdavichi.+
11 Ndavichi ayulile vaIsalele hamyaka 40. Ayulile myaka 7 muHevelone,+ kaha ayulile nawa muYelusalema hamyaka 33.+
12 Solomone atwamine jino halitanda lyawangana waise Ndavichi, kaha kutwala muze wangana wenyi wazamine.+
13 Jino Atonyiya mwanaHangite ayile kuli Mbate-sheva naye yaSolomone. Mbate-sheva ambile kuli Atonyiya ngwenyi: “Kwahola?” Ikiye ambile ngwenyi: “Eyo, kwahola.”
14 Atonyiya ambile ngwenyi: “Nguli nakusaka ngukulwezeko vyuma vimwe.” Ikiye ambile ngwenyi: “Hanjika.”
15 Jino Atonyiya ambile ngwenyi: “Ove unatachikiza kanawa ngwove wangana watelele kupwa wami, kaha vaIsalele vosena vatalijijile ngwavo nangupwa ngumwangana.+ Oloze wangana kavanguhanyinewoko, vanauhane kuli ndumbwami mwomwo Yehova ikiye asakile ngwenyi upwenga wenyi.+
16 Ngocho nguli nakusaka kukulombako chuma chimwe. Kanda ukana vyuma nangukulombako.” Mbate-sheva ambile ngwenyi: “Hanjika.”
17 Atonyiya ambile ngwenyi: “Nguhanjikileko kuli mwangana Solomone anguhane Avishange+ wakuShuneme kupwa pwevo lyami. Ngunejiva ngwami kuli ove keshi kukanako.”
18 Mbate-sheva akumbulwile ngwenyi: “Chamwaza, nangukuhanjikilako kuli mwangana.”
19 Ngocho Mbate-sheva ayile kuli mwangana Solomone mangana akamuhanjikileko Atonyiya. Jino mwangana akatukile nakumusesa, kaha afukamine chameso hamavu kuli naye. Solomone atwamine cheka halitanda lyenyi, kaha atumbikile litanda likwavo kulivoko lyenyi lyachilyo mangana naye atwameho.
20 Jino Mbate-sheva ambile kuli mwangana ngwenyi: “Nguli nakusaka kukulombako kachuma kamwe kakandende. Kanda ukana chuma nangukulombako.” Ngocho mwangana ambile kuli ikiye ngwenyi: “Ngulombe tuhu ove mama. Kangweshi kukanako.”
21 Mbate-sheva ahanjikile ngwenyi: “Itavisa Avishange wakuShuneme asomboke kuli ndumbwove Atonyiya.”
22 Mwangana Solomone akumbulwile naye ngwenyi: “Mwomwo ika unakusakila Avishange wakuShuneme asomboke kuli Atonyiya? Kahanyi mulombele nawangana nawa+ mwomwo ngwetu yayami,+ kaha nawa vali nakumukundwiza kuli kapilishitu Aviyatale, naYowave+ mwanaZeluwiya.”+
23 Kaha mwangana Solomone alishingile Yehova ngwenyi: “Kalunga anguzangamise mwamunene kachi nge Atonyiya keshi kuhichikisamo mwono wenyi hachumechi nangulomboko.
24 Nge omu ayoya Yehova tu, uze anguzamishile+ nakunguhaka halitanda lyatata Ndavichi uze angutungilile zuvo+ nge muze angushikile, Atonyiya mwafwa+ likumbi lyalelo.”
25 Hahaze vene Mwangana Solomone atumine Mbenaya+ mwanaYehoyata akajihe Atonyiya, kaha amujihile.
26 Kaha mwangana ambile kuli kapilishitu Aviyatale+ ngwenyi: “Yako kungalila yove kuAnatote.+ Watelanga kufwa, oloze kangweshi kukujihako mwomwo wambachile Chikasha chaMwata Wakulitulaho Yehova kumeso atata Ndavichi,+ kaha nawa wayanjilenga hamwe natata muvihuli vyenyi vyosena.”+
27 Ngocho Solomone afumishile Aviyatale hamulimo wakuzachila Yehova mwakapilishitu mangana mazu ahanjikile Yehova kuShilo+ hali vaze vakuzuvo yaEli+ atesemo.
28 Omu wahetele mujimbu kana kuli Yowave uze akundwijilenga Atonyiya,+ keshi Avasalomeko,+ Yowave achinyinyine kumbalaka yaYehova+ nakukakwata kujimbinga jakulijiko lyakulumbila.
29 Jino mwangana Solomone vamulwezele ngwavo: “Yowave nachinyina kumbalaka yaYehova, ali kulijiko lyakulumbila.” Kaha Solomone atumine Mbenaya mwanaYehoyata, ngwenyi: “Yako ukamujihe.”
30 Mbenaya ayile kumbalaka yaYehova, kaha ambile kuli Yowave ngwenyi: “Mwangana nambe ngwenyi, ‘Lovokamo.’” Oloze ikiye ambile ngwenyi: “Kangweshi kulovokamoko. Nangufwila vene muno.” Kaha Mbenaya akindulukile kuli mwangana nakumulweza ngwenyi: “Omu mukiko mwanambe Yowave, mukiko nangukumbulula.”
31 Jino mwangana ambile kuli Mbenaya ngwenyi: “Kamulinge nge omu nambe ivene. Kamujihe nakumufunda, mangana mulonga wamanyinga aze amwangile Yowave chawana ungufume, navaze vakuzuvo yatata.+
32 Yehova amuhilwishile mulonga wamanyinga mwomwo ajihile malunga vavali napoko yamukwale chakuzeneka tata Ndavichi kutachikiza. Malunga kana vapwile vakwoloka, vakulonga kuhambakana ikiye. Majina avo vapwile vakiko Avanele+ mwanaNele, kapitau kamaswalale javaIsalele,+ naAmasa+ mwanaYetele, kapitau kamaswalale javaYuta.+
33 Mulonga wamanyinga avava malunga ukeze hamutwe waYowave, nahamutwe wavana venyi haya myaka yosena.+ Oloze kuunda chakufuma kuli Yehova chipwenga hali Ndavichi, navana venyi, navaze vakuzuvo yenyi, nahalitanda lyenyi haya myaka yosena.”
34 Ngocho Mbenaya mwanaYehoyata alukukile Yowave nakumujiha, kaha vamufunjile hazuvo yenyi mupambo.
35 Jino mwangana atongwele Mbenaya+ mwanaYehoyata ashise Yowave kupwa kapitau kamaswalale. Kaha atongwele nawa kapilishitu Zatoke+ ashise Aviyatale.
36 Jino mwangana asanyikile Shimei+ nakwamba kuli ikiye ngwenyi: “Twaya kuno kuYelusalema utunge zuvo yove mangana utwamengamo. Kanda ukafuma muno munganda nakuya kwekako.
37 Likumbi lize naukakatuka nakuzauka muChinema chaKichilone+ mukafwa chikupu. Manyinga ove nawakeza hamutwe wove.”
38 Kaha Shimei ambile kuli mwangana ngwenyi: “Mazu unahanjika amwaza. Ami ngamba yove nangulinga nge omu unahanjika ove mwata wami.” Ngocho Shimei atwaminenga muYelusalema makumbi amavulu.
39 Oloze kusongo yamyaka yitatu, vandungo jaShimei vachinyine nakuya kuli Akishe+ mwanaMaka mwangana waNgata. Shimei vamulwezele ngwavo: “Vandungo jove vali kuNgata.”
40 Kaha hahaze vene Shimei alemene chimbulu chenyi nakuya kuli Akishe kuNgata nakumbata vandungo jenyi. Oloze omu akindulukile navandungo jenyi kufuma kuNgata,
41 Solomone vamulwezele ngwavo: “Shimei afumanga kuno kuYelusalema nakuya kuNgata, kaha nakinduluka.”
42 Jino mwangana asanyikile Shimei, ahanjikile kuli ikiye ngwenyi: “Uno kangwakushingishile Yehovako ngwami: ‘Halikumbi lize mukafuma kuno nakuya kuchihela cheka mukafwa’ nyi? Kaha kawambile kuli ami ngwove: ‘Mazu unahanjika amwaza, nanguwakavangiza’ nyi?+
43 Mwomwo ika unahonena kulama mazu ngwakushingishile Yehova nalushimbi luze ngwakulwezele?”
44 Jino mwangana ambile kuli Shimei ngwenyi: “Unatachikiza kanawa upi wosena walingile kuli tata Ndavichi,+ kaha Yehova mwakuhilwishila upi kana.+
45 Oloze mwangana Solomone navamukisulanga,+ kaha litanda lyawangana waNdavichi nalikazamanga haya myaka yosena kumeso aYehova.”
46 Ngocho mwangana alwezele Mbenaya mwanaYehoyata ajihe Shimei, kaha vamujihile.+
Kaha wangana wazamine mumavoko aSolomone.+
Kwinyikila Chamwishi
^ Hepe., “kalinwomu nguyenga omu veji kuyanga vaka-mavu vosena.”
^ Chipwe “kaha mulinga mwamangana.”
^ Tala Mukana waMazu.
^ Chipwe “muSheyoleko,” kulumbununa fuka yavatu vosena. Tala Mukana waMazu.
^ Chipwe “muSheyoleko,” kulumbununa fuka yavatu vosena. Tala Mukana waMazu.
