Vamyangana 1 20:1-43
20 Jino Mwangana Mbene-hatate+ wakuSulya+ akungulwile lizavu lyenyi lyavaka-kwasa jita navamyangana veka 32, natuvalu twavo hamwe namatemba avo ajita, vayile nakuhaka nganda yaSamaliya+ muchingombela+ mangana valwenga nayo jita.
2 Kaha atumine tunganda kuli Ahave+ Mwangana wavaIsalele kunganda. Ambile kuli ikiye ngwenyi: “Mbene-hatate nambe ngwenyi,
3 ‘Palata naulu wove namapwevo jove vamwaza, navana vove nawa vanapu vami.’”
4 Mwangana wavaIsalele amukumbulwile ngwenyi: “Ove mwata wami mwangana omu unahanjika mukiko vene. Ami ngunapu nguwove, navyuma vyosena nguli navyo.”+
5 Atumine cheka vaze tunganda kuli mwangana wavaIsalele nakwamba kuli ikiye ngwavo: “Mbene-hatate nambe ngwenyi, ‘Ngwakutuminanga mujimbu ou ngwami: “Palata yove, naulu wove, namapwevo jove, navana vove vinapu vyami.”
6 Oloze hamene nachimene halwola nge luno, nangutuma nawa vangamba jami kuli ove, naveza nakuhehwojola muzuvo yove namujizuvo javangamba jove. Vyuma vyosena vyamwaza navakawanamo navakavimbata.’”
7 Jino mwangana wavaIsalele asanyikile vakulwane vamulifuchi lyenyi, ambile kuli vakiko ngwenyi: “Nyingililenu ngwenu ou lunga ali nakusaka vikokojola. Asakanga ngwenyi ngumuhane mapwevo jami, navana vami, napalata yami, naulu wami, kaha ami kangwakanyineko.”
8 Vaze vakulwane vambile ngwavo: “Kanda umwononoka chipwe kumwitavilako.”
9 Ngocho alwezele vaze tunganda twaMbene-hatate ngwenyi: “Kalwezenu mwata wami mwangana ngwenu, ‘Vyuma vyosena vize wangulombanga ami ngamba yove hakavanga nangukuhanavyo, oloze evi unahanjika cheka, kangweshi kuvitavilako.’” Vaze tunganda vakindulukile nakumulweza uze mujimbu.
10 Kaha Mbene-hatate atumine mazu ano kuli mwangana wavaIsalele ngwenyi: “Kachi nge lukungu lwaSamaliya nalutamo kulupangila vatu vosena ava navangukavangiza, kaha tulunga vanguzangamise mwamunene.”
11 Mwangana wavaIsalele amukumbulwile ngwenyi: “Kamulwezenu ngwenu, ‘Kanda namulisasa shimbu kanda muzunge jitako, kalisasenu nge munafumu lyehi kujita.’”+
12 Mbene-hatate vamulwezele mazu kana omu vapwile nakunwa wala navakwavo vamyangana mujimbalaka* javo. Kaha hahaze vene ambile kuli vangamba jenyi ngwenyi: “Lizangenu tuvalukuke.” Ngocho valizangile mangana valukuke yize nganda.
13 Jino kapolofweto apandamine kuli Ahave+ Mwangana wavaIsalele, kaha ambile ngwenyi: “Yehova nambe ngwenyi, ‘Eli lizavu lyalinene ngana unalimono tahi? Nangulihana lelo mumavoko ove mangana utachikize ngwove ami yami Yehova.’”+
14 Jino Ahave ahulishile ngwenyi: “Munguhanavo kuhichila muli iya?” Uze kapolofweto ambile ngwenyi: “Yehova nambe ngwenyi, ‘Nangukuhanavo kuhichila muli vaka-kukafwa vamyata vajingalila.’” Ngocho Ahave ahulishile cheka ngwenyi: “Iya mwaputuka jita?” Ikiye ambile ngwenyi: “Yove vene.”
15 Ahave alavile vaze vaka-kukafwa vamyata vajingalila kaha vahetele ku 232. Alavile cheka malunga vavaIsalele kaha vahetele ku 7,000.
16 Kaha valovokele namusana shimbu Mbene-hatate apwile nakunwa wala mujimbalaka* navakwavo vamyangana 32 vaze asanyikile vamukafwe kulwa jita.
17 Omu vaka-kukafwa vamyata vajingalila valovokele munganda mangana valwenga jita, Mbene-hatate atumine valuwa jenyi vakamone vyuma vili nakulingiwa. Kaha vejile nakumulweza ngwavo: “Malunga vaka-jita vanalovoka lyehi munganda yaSamaliya.”
18 Mbene-hatate ambile ngwenyi: “Vakwatenu vavatonyi, chipwe naveza mukuunda, chipwe naveza nakulwa jita.”
19 Omu vaka-kukafwa vamyata vajingalila valovokele munganda, navaka-kwasa jita javaIsalele vaze vavakavangijile munyima,
20 mutu himutu ajihile muka-kole wenyi uze amusungamine. Ngocho vaSulya vachinyine,+ kaha vavahangasanyine kuli vaIsalele. Oloze Mbene-hatate Mwangana waSulya anyinyine hakavalu nakuchina navatu jenyi vamwe vaka-kutambukila hatuvalu.
21 Kaha mwangana wavaIsalele alovokele nakuya nakujiha vaka-kutambukila hatuvalu navaka-kutambukisa matemba ajita, ngocho ajihile vaSulya vavavulu chikuma.
22 Kufumaho uze kapolofweto+ ejile cheka kuli mwangana wavaIsalele, ambile ngwenyi: “Yako ukazamikise maswalale jove,+ ukawane mwakulingila mwomwo kukuputuka chamwaka nawizaho* mwangana waSulya mwakeza nakulwa nove jita.”+
23 Jino vangamba jamwangana waSulya vambile kuli kaka yavo ngwavo: “Kalunga kavo apwa Kalunga kajipili, shikaho vanatufungulula. Oloze nge natuzunga navo hachihela chakusalama, kaha natuvafungulula.
24 Kaha nawa linga ngana: Fumisa vamyangana vosena+ havihela vyavo, ushishiseho vanguvulu.
25 Kaha kungulula* maswalale, vavule nge vaze vafwile mujita, natuvalu, namatemba ajita. Kufumaho natuya nakuzunga navo hachihela chakusalama, kaha natukavafungulula.” Ngocho mwangana evwililile mazu osena vamulwezele, kaha alingile vene ngocho.
26 Kukuputuka chamwaka wakavangijileho,* Mbene-hatate+ akungulwile vaSulya nakuya navo kuAfweke vakalwe jita navaIsalele.
27 VaIsalele navakiko valikungulwile, vavahanyine vyakulya kaha vayile vakalihumangane navaka-kole javo. Omu vatungile chilombo chavo kwakulitalasana navakiko, vasolokele nge mautanga avali amikoko vakuhokama, oloze vaSulya vavulile chikuma nakuzalisa ngalila vapwile.+
28 Jino mutu waKalunga wamuchano alwezele mwangana wavaIsalele ngwenyi: “Yehova nambe ngwenyi, ‘Hakuwana nge vaSulya vanambe ngwavo: “Yehova napu Kalunga kajipili, keshi Kalunga kavyanako,” ngocho lizavu lyosena eli nangulihana mumavoko ove+ mangana utachikize ngwove ami yami Yehova.’”+
29 VaIsalele vatwamine lika muchilombo chavo kwakulitalasana navaka-kole javo hamakumbi 7, kaha halikumbi lize lyakusokesa 7, jita yepukile. VaIsalele vajihile maswalale vavaSulya vakutambuka hamavu vakuheta ku 100,000 mulikumbi lyangongo.
30 Vaze vasalileho vachinyinyine munganda yaAfweke.+ Oloze kembwe yanganda yashiukilile maswalale vakuheta ku 27,000 hali vaze vachinyinyine kunganda. Mbene-hatate naikiye achinyinyine munganda nakuswama mukapete kazuvo.
31 Jino vangamba jaMbene-hatate vambile kuli ikiye ngwavo: “Tunevu ngwavo vamyangana javaIsalele vapwa vamyangana vakeke.* Shikaho twitavise tuvwale vikeleyi mujimbunda jetu nakukasa mikole kumitwe yetu, mangana tuyenga kuli mwangana wavaIsalele. Pamo mwayovola mwono wove.”+
32 Ngocho vavwalile vikeleyi mujimbunda javo nakukasa mikole kumitwe yavo, kaha vayile kuli mwangana wavaIsalele nakwamba ngwavo: “Ngamba yove Mbene-hatate nambe ngwenyi: ‘Kanda ungujihako.’” Ikiye ambile ngwenyi: “Kumana achili wamutonyi? Napu hindumbwami.”
33 Vaze vangamba jaMbene-hatate vamwene ngwavo mazu nahanjika amuchano, kaha vambile kuli ikiye ngwavo: “Mbene-hatate napu hindumbwove vene.” Ikiye avambile ngwenyi: “Yenu mumunehe.” Ngocho Mbene-hatate ayile kuli mwangana wavaIsalele, kaha amunyinyishile mulitemba.
34 Jino Mbene-hatate ambile kuli mwangana wavaIsalele ngwenyi: “Jinganda jize atambwile tata kuli iso nangujikindulwisa. Kaha unahase kutunga visakano muNdamashiku nge muze alingile tata muSamaliya.”
Kaha Ahave ambile ngwenyi: “Nangukusuula uyenga kweseka nachivwasano* kana echi.”
Ngocho alikashile chivwasano nenyi, kaha amusuwile ayenga.
35 Jino Yehova ahanjikile kuli umwe wavana vavapolofweto*+ ambenga kuli sepa lyenyi ngwenyi: “Ngujihe.” Oloze uze sepa lyenyi akanyine kumujiha.
36 Kaha amwambile ngwenyi: “Hakuwana nge unakane kwivwilila mulizu lyaYehova, omu naukatuka nakuya, ndumba mwakuwana mujila nakukujiha.” Omu akatukile nakuya, ndumba amuhumanganyine nakumujiha.
37 Uze kapolofweto awanyine cheka lunga mukwavo, amwambile ngwenyi: “Ngujihe.” Kaha uze lunga amulukukile nakumuvulumuna.
38 Kaha uze kapolofweto ayile kujila nakuvandamina mwangana wavaIsalele, oku nalijingi lihina kumeso enyi mangana vahone kumutachikiza.
39 Omu mwangana apwile nakuhita mujila, uze kapolofweto ambile kuli mwangana ngwenyi: “Ami ngamba yove ngwayanga kujita, kaha kwapwanga lunga umwe uze angunehelanga mukwavo lunga nakungwamba ngwenyi, ‘Lama ou lunga. Nge mwajimbala, kaha muhichikisamo mwono wove,+ nge pimbi, kaha naufweta talende* yapalata yimwe.’
40 Kahomu ngwalinganga ami ngamba yove ngwami ngukwate aha nahaze, kukasumuka uze lunga nayi.” Jino mwangana wavaIsalele ambile kuli ikiye ngwenyi: “Omu mukiko navakusopesa, unavatula lyehi chihande ove ivene.”
41 Ngocho alifumishile lize lihina alijingile kumeso, kaha mwangana wavaIsalele atachikijile ngwenyi kumana hikapolofweto.+
42 Uze kapolofweto ambile kuli mwangana ngwenyi: “Yehova nambe ngwenyi, ‘Hakuwana nge unasuula+ mutu uze ngwakulwezanga ngwami ukamujihe, ngocho muhichikisamo mwono wove,+ namyono yavatu jove nawa.’”+
43 Kufumaho mwangana wavaIsalele ayile kwimbo lyenyi kuSamaliya+ oku nahombo.
Kwinyikila Chamwishi
^ Chipwe “muvisakila.”
^ Chipwe “muvisakila.”
^ Kulumbununa, kuchivatuko chavula.
^ Hepe., “lava.”
^ Kulumbununa, kuchivatuko chavula.
^ Chipwe “vamyangana vazangi yakwilila.”
^ Chipwe “nalushiko.”
^ Mazu akwamba ngwavo, “vana vavapolofweto” pamo atalikisa kushikola yakulinangula jindongi javapolofweto chipwe kulizavu lyavapolofweto.
^ Talende yimwe yapwile jikilongalamu 34.2. Tala Chihande B14.
