Vamyangana 1 21:1-29
21 Omu vyakumine vyumevi, kwepukile chihande chawande wamivinyo waNavote muka-Yezelele. Wande kana wapwile kuYezelele+ kwakamwihi nanganda yaAhave mwangana waSamaliya.
2 Ahave ambile kuli Navote ngwenyi: “Nguhane wande wove wamivinyo nguutenge kupwa litepa lyami lyavisakwola mwomwo uli kwakamwihi nazuvo yami. Kahami nangukuhana wande weka wamwaza wamivinyo. Nge chiku, kaha ngulanjisewo najimbongo.”
3 Oloze Navote ambile kuli Ahave ngwenyi: “Kacheshi chakutamo kumeso aYehova ami kukuhana uswana wavakakuluka jamiko.”+
4 Ngocho Ahave akindulukile kuzuvo yenyi oku nahombo namazu amukumbulwile Navote wakuYezelele ngwenyi: “Kangweshi kukuhana uswana wavakakuluka jamiko.” Asavalile hakahela kenyi oku natalisa kumbango, kaha akanyine kulya vyakulya.
5 Jino pwevo lyenyi Yezevele+ engilile muzuvo, kaha amwihwile ngwenyi: “Unahombela* ika numba ukane nakulya vyakulya?”
6 Ikiye amukumbulwile ngwenyi: “Ngwahanjikanga naNavote wakuYezelele ngwami, ‘Ngulanjise wande wove wamivinyo. Nge kaute, kaha tutambasane nawande weka wamivinyo.’ Oloze ikiye angwambanga ngwenyi, ‘Kangweshi kukuhana wande wami wamivinyoko.’”
7 Kaha pwevo lyenyi Yezevele ambile kuli ikiye ngwenyi: “Ngwetu ove yove mwangana uli nakuyula muIsalele? Hinduka ulyenga vyakulya, wahilila. Nangukuhana wande wamivinyo waNavote wakuYezelele.”+
8 Ngocho Yezevele asonekele mikanda mulijina lyaAhave, ayilamikile katachikijilo+ kalunga lyenyi, nakuyituma kuli vakulwane+ navilolo vamunganda yize atwaminenga Navote.
9 Asonekele ngwenyi: “Vilikenu lwola lwakulijilika kulya, kaha mukakungulula vatu halikumbi kana nakutumbika Navote kulutwe lwavo.
10 Kaha mukasakule malunga vavali vatuvihu vakatwame nenyi kulutwe. Malunga kana vakahane unjiho wakumupayisa+ ngwavo, ‘Unangula Kalunga namwangana.’+ Kaha kamulovolenu munganda nakumwasa malolwa akafwe.”+
11 Ngocho vaze vakulwane navilolo vamunganda yize atwaminenga Navote valingile nge muze avalwezele Yezevele mumikanda avasonekelele.
12 Vavilikile lwola lwakulijilika kulya, kaha vakungulwile vatu nakutumbika Navote kulutwe lwavo.
13 Vasakwile malunga vavali vatuvihu, kaha vejile nakutwama nenyi kulutwe. Malunga kana vahanyine unjiho wakumupayisa Navote kumeso avatu vosena ngwavo, ‘Unangula Kalunga namwangana.’+ Kufumaho vamulowele kuweluka wanganda, kaha vamwashile malolwa nakumujiha.+
14 Ngocho vatumine mazu kuli Yezevele ngwavo: “Navote vanamwase malolwa, kaha nafu.”+
15 Omu Yezevele evwile ngwavo Navote vanamwase malolwa kaha nafu, ambile kuli lunga lyenyi Ahave ngwenyi: “Yako ukatambule wande wamivinyo waNavote wakuYezelele+ uze akanyine kukulanjisa najimbongo, mwomwo nafu lyehi.”
16 Omu Ahave evwile ngwavo Navote nafu, akatukile nakuya kuwande wamivinyo waNavote wakuYezelele, kaha autambwile nakupwa wenyi.
17 Oloze Yehova ahanjikile kuli Elija+ wakuChishivi ngwenyi:
18 “Katuka uyenga kuSamaliya+ kuli Ahave mwangana wavaIsalele. Ali muwande wamivinyo waNavote mangana autambule.
19 Kamulweze ngwove, ‘Yehova nambe ngwenyi: “Unajihi mutu,+ kaha nawa uli nakusaka utambule nawande* wenyi tahi?”’+ Ukamulweza nawa ngwove, ‘Yehova nambe ngwenyi: “Muchihela muze vanalesela vatuwa manyinga aNavote mukiko navalesela nawa manyinga ove.”’”+
20 Ahave ambile kuli Elija ngwenyi: “Ove muka-kole wami+ unanguwane.” Elija amukumbulwile ngwenyi: “Ngunakuwane vene. ‘Hakuwana nge uli nakufwila* kulinga vyuma vyavipi kumeso aYehova,+
21 nanguneha lupi hali ove, kaha nangukanongesa namalunga vosena* vakuzuvo yove,+ kuhakilako navaze vazeneka wakuvakafwa, navaze vakuzeya muli vaIsalele.+
22 Vaze vakuzuvo yove nangukavalinga nge muze ngwalingile vaze vakuzuvo yaYelovowame+ mwanaNevate. Kaha nangukavalinga nawa nge muze ngwalingile vaze vakuzuvo yaMbasha+ mwanaAhiya, mwomwo unasangumuna matoto ami, kaha nawa unahungumwisa navaIsalele valinge shili.’
23 Yehova nahanjika nawa hali Yezevele ngwenyi, ‘Vatuwa navakalya Yezevele hamusuka wamavu wakuYezelele.+
24 Mutu wosena wakuzuvo yaAhave uze mwafwila munganda, vatuwa navakamulya, kaha weshowo mwafwila muchipapa, tujila vakutuka mwilu navakamulya.+
25 Kanda kuchipweho lyehi mwangana weka wakufwana nge Ahaveko,+ uze aputukile* kulinga vyuma vyavipi kumeso aYehova hakumusowangiza kuli pwevo lyenyi Yezevele.+
26 Ahave alingilenga vyuma vyaunyengwe chikuma, alemeselenga makombelo aunyengwe* ngana muze valingilenga vaAmole vaze ahangile Yehova kumeso avaIsalele.’”+
27 Omu Ahave evwile mazu kana, apulile uvwalo wenyi nakuvwala vikeleyi, kaha alitwaminyine kulya. Asavalilenga navikeleyi, kaha atambukilenga oku nahombo.
28 Jino Yehova ahanjikile kuli Elija wakuChishivi ngwenyi:
29 “Unamono omu Ahave nalinyisa kumeso ami nyi?+ Hakuwana nge nalinyisa kumeso ami, shikaho kangweshi kukaneha lupi shimbu achili wamutonyiko. Nangukaneha lupi kuli vaze vakuzuvo yenyi hamakumbi amwanenyi.”+
Kwinyikila Chamwishi
^ Hepe., “Shipilitu yove yinahombela.”
^ Hepe., “utambule naluheto.”
^ Hepe., “unalilanjisa ove ivene.”
^ Hepe., “naweshowo eji kusushilanga hambango.” Eyi hihanjikiso yachiHepeleu yakasautu hakuvuluka malunga.
^ Hepe., “uze alilanjishile ivene.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
