Vamyangana 1 22:1-53
22 VaSulya navaIsalele vatwamine myaka yitatu chakuzeneka kulwa jita.
2 Jino mumwaka uze wamuchitatu, Yehoshafwate+ Mwangana wavaYuta ayile kuli mwangana wavaIsalele.+
3 Mwangana wavaIsalele ambile kuli vangamba jenyi ngwenyi: “Uno munatachikiza ngwenu nganda yaLamote-ngileyate+ yapwa yetu nyi? Oloze tuli nakukakasana kuyitambula kuli mwangana waSulya.”
4 Mwangana wavaIsalele ahulishile Yehoshafwate ngwenyi: “Uno natuya hamwe nakulukuka nganda yaLamote-ngileyate nyi?” Yehoshafwate akumbulwile mwangana wavaIsalele ngwenyi: “Etu tuvatu vovamwe. Vatu jami vanapu vatu jove. Tuvalu twami nawa vanapu tuvalu twove.”+
5 Yehoshafwate ambile kuli mwangana wavaIsalele ngwenyi: “Achivangile+ kwihula Yehova.”+
6 Ngocho mwangana wavaIsalele akungulwile vapolofweto kafwe 400, avahulishile ngwenyi: “Uno nguyenga nakulukuka nganda yaLamote-ngileyate tahi, nyi chiku?” Vakiko vamukumbulwile ngwavo: “Yako, Yehova mwayihana kuli ove mwangana.”
7 Jino Yehoshafwate ahulishile ngwenyi: “Kuno kakweshi kapolofweto kaYehovako tahi? Naikiye tumwihulenu.”+
8 Mwangana wavaIsalele akumbulwile Yehoshafwate ngwenyi: “Kwali kapolofweto umwe mwahasa kutwihwila kuli Yehova,+ oloze ngwamuhunga+ mwomwo keshi kupolofweta vyuma vyamwaza hali amiko shina vyavipi kaha.+ Lijina lyenyi ikiye Mikaya mwanaImila.” Oloze Yehoshafwate ambile ngwenyi: “Mwangana katela kuhanjika mazu angochoko.”
9 Ngocho mwangana wavaIsalele asanyikile chilolo chenyi, ambile kuli ikiye ngwenyi: “Ngusanyikile Mikaya mwanaImila washiwashi.”+
10 Mwangana wavaIsalele naYehoshafwate mwangana wavaYuta vatwamine hamatanda avo oku vanavwale uvwalo wawangana. Vatwamine kuweluka, kuchikolo changanda yaSamaliya. Kaha vapolofweto vosena vapwile nakupolofweta kumeso avo.+
11 Jino Zetekiya mwanaKenana alitengelele jimbinga jafwelu, kaha ambile ngwenyi: “Yehova nambe ngwenyi, ‘Naukatuva* vaSulya najimbinga kaneji palanga nomu naukavanongesa vosena.’”
12 Vapolofweto vosena vahanjikile mwomumwe ngwavo, “Yako ukalukuke nganda yaLamote-ngileyate, kaha naukayifungulula. Yehova mwakayihana kuli ove mwangana.”
13 Kanganda uze vatumine akasanyike Mikaya ambile kuli ikiye ngwenyi: “Vapolofweto vosena vanahanjika mwomumwe, mazu vanahanjika anawahe kuli mwangana. Nayove hanjika nge omu vanahanjika vakwenu, uhanjike mwamwaza.”+
14 Oloze Mikaya ambile ngwenyi: “Omu ayoya Yehova tu, vyeshovyo mwangulweza Yehova vikiko nanguhanjika.”
15 Mikaya ejile kuli mwangana, kaha mwangana amwihwile ngwenyi: “Ove Mikaya, uno tuyenga nakulukuka nganda yaLamote-ngileyate tahi, nyi chiku?” Ikiye amukumbulwile ngwenyi: “Yenunga, kaha namukayifungulula. Yehova mwakayihana kuli ove mwangana.”
16 Jino mwangana amwihwile ngwenyi: “Nangukushingisa mapapa kangahi ngwami watela kuhanjika kaha muchano mulijina lyaYehova?”
17 Mikaya amukumbulwile ngwenyi: “Ngwamonanga vaIsalele vosena vanalimwange hajipili+ kwijiva nge mikoko vakuzeneka kafunga. Kaha Yehova nambe ngwenyi: ‘Ava kaveshi natwaminako. Mutu himutu akinduluke tuhu kuzuvo yenyi mukuunda.’”
18 Mwangana wavaIsalele ambile kuli Yehoshafwate ngwenyi: “Ngwetu ngwakulwezanga ngwami, ‘Keshi kupolofweta vyuma vyamwaza hali amiko shina vyavipi kaha.’”+
19 Jino Mikaya ambile ngwenyi: “Ivwa vyuma nahanjika Yehova: Ngwamonanga Yehova natwame halitanda lyenyi,+ kaha mayongomena amwilu osena anemana kwakamwihi naikiye, ava kulivoko lyenyi lyachilyo, ava kulivoko lyenyi lyachimoswe.+
20 Yehova avehulanga ngwenyi, ‘Iya mwaya nakwonga Ahave mangana ayenga kuLamote-ngileyate akafwileko?’ Kaha vosena vahanjikanga ou ngwenyi munganji, ou ngwenyi munganji mukananga.
21 Jino kangelo*+ umwe ezanga nakwimana kumeso aYehova nakwamba ngwenyi, ‘Ami nanguya nakumwonga.’ Ngocho Yehova amwihulanga ngwenyi, ‘Naukamwonga ngachilihi?’
22 Ikiye amukumbululanga ngwenyi, ‘Nanguya nakuhaka mazu akwonga mutunwa twavapolofweto jenyi vosena.’+ Kalunga ambanga ngwenyi, ‘Yako ukalinge ngocho. Naukamwonga vene, kaha naukamuhasa.’
23 Shikaho, Yehova nahake mazu akwonga mutunwa twavapolofweto jove vosena ava.+ Ijiva ngwove Yehova nakuvulukila lyehi lupi.”+
24 Zetekiya mwanaKenana apandamine kuli Mikaya, amuvetele halikili nakwamba ngwenyi: “Uno uli nakwamba ngwove shipilitu yaYehova yinangufumu, kaha yili nakuhanjikila muli ove nyi?”+
25 Mikaya amukumbulwile ngwenyi: “Mukatachikiza chuma kana halikumbi lize naukachinyina mukapete kazuvo mangana ukaswamemo.”
26 Jino mwangana wavaIsalele ambile ngwenyi: “Kwatenu Mikaya mumutwale kuli Amone mukulwane wanganda, naYowashe mwanamwangana.
27 Valwezenu ngwenu, ‘Mwangana nambe ngwenyi: “Muhakenu mukamenga,+ mumuhanenga tuvyakulya twatundende, natumeya twatundende palanga nomu nangukakinduluka mukuunda.”’”
28 Oloze Mikaya ambile ngwenyi: “Kachi nge naukakinduluka mukuunda, kahanyi Yehova keshi ikiye nahanjika kuli amiko.”+ Ambile cheka ngwenyi: “Enu vatu muvosena nyingililenu mazu ami.”
29 Ngocho mwangana wavaIsalele naYehoshafwate mwangana wavaYuta vayile mangana vakalukuke Lamote-ngileyate.+
30 Kaha mwangana wavaIsalele ambile kuli Yehoshafwate ngwenyi: “Ami nangulisolola nge ngumutu weka nakulwa navo jita, oloze ove vwala uvwalo wove wawangana.” Ngocho mwangana wavaIsalele alisolwele nge himutu weka+ nakulwa navo jita.
31 Jino mwangana waSulya alwezele tupitau twenyi 32+ vamatemba ajita ngwenyi: “Kanda namuzunga navatu vamokomoko chipwe vavalemuko, shina namwangana wavaIsalele kaha.”
32 Omu tupitau twamatemba ajita vamwene Yehoshafwate, valyambile mwavomwavo ngwavo: “Ou ikiye vene mwangana wavaIsalele.” Ngocho valwile nenyi jita, oloze ikiye atwile kawelele mangana vamukafwe.
33 Omu vamwene ngwavo keshi ikiye mwangana wavaIsaleleko, hahaze vene valitwaminyine kulwa nenyi.
34 Oloze lunga umwe ananyile uta wenyi wamanana nakwasa, kaha mwivwi wakakwachile mumanungililo akahuma kachikungo kaze avwalile mwangana wavaIsalele nakumulemeka. Kaha ambile kuli muka-kutambukisa litemba lyenyi ngwenyi: “Alumuna litemba mangana ungufumise kuno kujita,* mwomwo vanangulemeka chikuma.”+
35 Valwile jita likumbi lyosena, kaha mwangana vamwimikile nakumukwachilila mulitemba lyenyi kwakulitalasana navaSulya. Manyinga enyi ahichilile lika muze mulitemba lyajita, kaha nachingoloshi afwile.+
36 Omu lyalaukile likumbi, vavilikile muchilombo chosena ngwavo: “Mutu himutu akinduluke kunganda yenyi, kulifuchi lyenyi.”+
37 Ngocho mwangana afwile, kaha vamutwalile kuSamaliya kukiko vakamufunjile.
38 Omu vapwile nakukosa lize litemba lyajita kuchijiva chaSamaliya, vatuwa valesele manyinga enyi, kaha vaka-ujila vasanyinyinenga kuze,* nge muze ahanjikile Yehova.+
39 Mujimbu wosena waAhave wavyuma alingile, nazuvo* yamazo avanjamba+ yize atungile, najinganda josena atungile vausoneka mumukanda wamijimbu yavamyangana javaIsalele.
40 Ngocho Ahave atokele ngana mwavakakuluka jenyi,+ kaha mwanenyi Ahajiya+ aswanyine hawangana.
41 Yehoshafwate+ mwanaAsa aputukile kuyula vaYuta mumwaka wamuchiwana wachiyulo chaAhave Mwangana wavaIsalele.
42 Yehoshafwate apwile namyaka yakusemuka 35 omu aputukile kuyula, kaha ayulile myaka 25 muYelusalema. Lijina lyanaye apwile ikiye Azuva mwanaShilihi.
43 Yehoshafwate akavilenga jijila jaise Asa.+ Kapyapumukilemoko, alingilenga vyuma vyakwoloka kumeso aYehova.+ Oloze kafumishile vihela vyakulundukako,+ kaha vatu vachipwile lika nakuhana vimuna vakuvatula havihela kana mangana vakakumuke wishi.
44 Yehoshafwate atwaminenga mukuunda namwangana wavaIsalele.+
45 Mujimbu wosena waYehoshafwate wamilimo yenyi yangolo, nomu alwilenga jita vausoneka mumukanda wamijimbu yavamyangana javaYuta.
46 Yehoshafwate ahangile nawa malunga vaka-ujila*+ vaze asezele ise Asa.+
47 Halwola kana muEtome+ kamwapwile mwanganako, kapitau ikiye apwile nakuyula mwamwangana.+
48 Yehoshafwate apachile nawa mato akuTalashishe* mangana akambate ulu+ kuOfwile, oloze mato kana kawaheteleko mwomwo afwililile kuEjone-ngevele.+
49 Jino Ahajiya mwanaAhave ambile kuli Yehoshafwate ngwenyi: “Itavisa vangamba jami vayenga hamwe navangamba jove mumato,” oloze Yehoshafwate akanyine.
50 Jino Yehoshafwate atokele ngana mwavakakuluka jenyi,+ kaha vamufunjile navakakuluka jenyi hamwe muNganda yakakuluka yenyi Ndavichi. Mwanenyi Yeholame+ amushishile hawangana.
51 Ahajiya+ mwanaAhave aputukile kuyula vaIsalele muSamaliya mumwaka wakusokesa 17 wachiyulo chaYehoshafwate Mwangana wavaYuta, kaha ayulile vaIsalele hamyaka yivali.
52 Ahajiya alingilenga vyuma vyavipi kumeso aYehova, akavilenga jijila jaise+ nanaye,+ najize jaYelovowame mwanaNevate uze ahungumwishile navaIsalele valinge shili.+
53 Ahajiya azachililenga Mbale+ nakulifukula kuli ikiye, ngocho evwishilenga Yehova Kalunga kaIsalele+ kupihya nge muze nawa alingilenga ise.
Kwinyikila Chamwishi
^ Chipwe “Naukashinjejeka.”
^ Chipwe “shipilitu.”
^ Hepe., “kuchilombo.”
^ Chipwe pamo, “vatuwa valesele manyinga enyi kuze vapwilenga nakusanyina vaka-ujila.”
^ Chipwe “nanganda.”
^ Chipwe “malunga vaka-ujila vakutembele.”
^ Tala Mukana waMazu.
