Vamyangana 1 3:1-28
3 Solomone alivwasanyine naFwalo, mwangana waEjipitu mangana ambate mwanenyi.+ Kaha ambachile mwanaFwalo, amunehele muNganda yaNdavichi+ palanga nomu Solomone akumishile kutunga zuvo yenyi,+ nazuvo yaYehova,+ nakembwe yaYelusalema jingulwishi ndo.+
2 Oloze vatu vavatwililenga lika vimuna havihela vyakulunduka,+ mwomwo hamakumbi aze, Zuvo vavulukilile lijina lyaYehova yapwile kanda vachiyitunge.+
3 Solomone azangilenga lika Yehova nakukavangiza jindongi jaise Ndavichi. Kaha avatwililenga lika vimuna havihela vyakulunduka nakulumba mawana.+
4 Jino mwangana Solomone ayile kuNgiveyone nakuvatwilako vimuna, mwomwo kukiko kwapwile chihela chakulunduka chize vatachikijile chikuma.*+ Kaha akalumbile vimuna vakuvatula 1,000 halijiko lyakulumbila.+
5 Yehova alisolwele kuli Solomone kuNgiveyone muchilota naufuku. Kaha Kalunga ambile ngwenyi: “Ngulombe vyeshovyo musaka ngwove ngukuhane.”+
6 Solomone ambile ngwenyi: “Unasolwela ngamba yove tata Ndavichi zangi yakwilila yayinene, mwomwo apwile wakushishika, wakwoloka, wakusungama omu atambukilenga kumeso ove. Unamusolwelanga lika zangi kaneyi yakwilila palanga nakulelo, kaha unamuhane mwana atwame halitanda lyenyi lyawangana.+
7 Kaha jino ove Yehova Kalunga kami unangutongola ami ngamba yove ngupwenga ngumwangana wakuswana tata Ndavichi numba tuhu ngukanyike,* kaha nawa kangweshi nachinyingiko.*+
8 Ami ngamba yove nguli muli vatu jove ava unasakula,+ vatu vavavulu chikuma vaze kaveshi kuhasa kuvalavako.
9 Ngocho nguhane ami ngamba yove muchima wakwononoka mangana nguyule vatu jove,+ nguhandunune kuwaha nakupihya,+ mwomwo iyaze mwahasa kuyula ava vatu jove vavavulu* ngana?”
10 Yehova evwile kuwaha omu Solomone alombele chuma kanechi.+
11 Jino Kalunga ambile kuli ikiye ngwenyi: “Hakuwana nge kawangulombele kuyoya myaka yayivuluko,* chipwe luheto, chipwe kujiha* vaka-kole joveko, oloze unangulombo muchima wakunangakana omu nawivwililanga kumilonga,+
12 nangukuhana vyuma unalombo.+ Nangukuhana muchima wamangana, wakunangakana.+ Ngocho kulutwe kakweshi kukapwa mutu weka nge oveko, numba kunyima nawa kakwapwile mutu weka nge oveko.+
13 Nangukuhana nawa navyuma vize unazeneka kulomba,+ luheto naupahu.+ Kaha mukuyoya* chove chosena kakweshi kukapwa mwangana weka nge oveko.+
14 Kachi nge nautambukanga mwaya jijila jami nakulamanga jindongi, najishimbi jami nge muze alingile iso Ndavichi,+ kaha nangukwitavisa nawa uyoyenga myaka yayivulu.”*+
15 Omu Solomone akasumukile mutulo, amwene ngwenyi apwanga nakulota. Kaha ayile kuYelusalema, akemanyine kuchikasha chalushiko lwaYehova, kaha alumbile vimuna vakuvatula, nakuhana mawana akusolola kuunda,+ kaha alingilile vangamba jenyi vosena chiwanyino chakulya.
16 Jino kuli mwangana kwejile mapwevo vaka-ujila vavali, kaha vemanyine kumeso enyi.
17 Pwevo watete ambile ngwenyi: “Ove mwata wami, ami nayou mukwetu twatwama muzuvo yimwe, kahomu ngwasapulukanga naikiye apwanga muzuvo.
18 Omu mwahitanga makumbi atatu kufuma hakusapuluka chami, nayou mukwetu nawa asapulukanga mwanenyi. Twapwanga kaha tuvavali muzuvo, kakwapwanga mutu wekako.
19 Kaha naufuku, mwana wayou mukwetu afwanga, mwomwo amushitanga.
20 Ngocho ahindukanga mukachi kaufuku, ambatanga mwanami shimbu ngwapwanga ami ngamba yove mutulo nakumusavalika kuli ikiye. Kaha mwanenyi wakufwa amusavalikanga kuli ami.
21 Omu ngwahindukanga nachimene ngwami ngwamwise mwanami, kuwana nafu. Ngocho ngwamukekesanga kanawa, kaha ngwamonanga ngwami keshi mwanamiko.”
22 Uze pwevo mukwavo ambile ngwenyi: “Nduma, ou wamutonyi ikiye mwanami, ou wakufwa ikiye mwanove.” Oloze uze pwevo watete ambile ngwenyi: “Nduma, ou wakufwa ikiye mwanove, ou wamutonyi ikiye mwanami.” Omu mukiko valipulilenga jipami kumeso amwangana.
23 Jino mwangana ambile ngwenyi: “Ou ngwenyi, ‘Ou wamutonyi mwanami, ou wakufwa mwanove.’ Ou nawa ngwenyi, ‘Nduma, ou wakufwa mwanove, ou wamutonyi mwanami.’”
24 Mwangana ambile ngwenyi: “Ngunehelenu poko yamukwale.” Kaha vanehele poko yamukwale kumeso amwangana.
25 Mwangana ambile ngwenyi: “Pulenu mwana wamutonyi mukachi, muvahane ou chihanda chimwe, ou chihanda chimwe.”
26 Jino pwevo uze ukwechi mwanenyi wamutonyi amulembelelele mwangana, mwomwo evwililile mwanenyi keke. Ambile ngwenyi: “Ove mwata wami, ou mwana wamutonyi muhane tuhu kuli mukwetu. Kanda kumujihako.” Oloze uze pwevo mukwavo ambile ngwenyi: “Kanda vamuhana kuli yamiko, chipwe kuli yoveko. Vamupule mukachi.”
27 Ngocho mwangana ambile ngwenyi: “Hanenu ou mwana wamutonyi kuli ou pwevo watete. Kanda kumujihako, mwomwo ou ikiye vene naye.”
28 VaIsalele vosena vevwile omu mwangana avatwile chize chihande. Kaha vamwivwile woma,+ mwomwo vamwene ngwavo Kalunga namuhane mangana akuyulanga mwakwoloka.+
Kwinyikila Chamwishi
^ Hepe., “chize chapwile chachilemu.”
^ Chipwe “ngukanyike walunga.”
^ Hepe., “kangwatachikijile kulovoka chipwe kwingilako.”
^ Chipwe pamo, “vavakalu.” Hepe., “vakulema.”
^ Hepe., “makumbi amavuluko.”
^ Chipwe “myono.”
^ Hepe., “mumakumbi.”
^ Hepe., “kaha nanguvulisa makumbi ove.”
