Vamyangana 1 4:1-34
4 Solomone ayulile vaIsalele vosena.+
2 Ava vakiko vapwile vilolo jenyi: Azaliya mwanaZatoke+ apwile kapilishitu.
3 Eliholefwe naAhiya vana vaShisha vapwile vaka-kusoneka.+ Yehoshafwate+ mwanaAhilute apwile muka-kusoneka vyuma vyawangana.
4 Mbenaya+ mwanaYehoyata apwile kapitau kamaswalale. Zatoke naAviyatale+ vapwile vapilishitu.
5 Azaliya mwanaNatane+ apwile mukulwane watupitau. Zavute mwanaNatane apwile kapilishitu, kaha nawa sepa lyamwangana.+
6 Ahishale apwile mukulwane kuzuvo yamwangana. Atonyilame+ mwanaAvata apwile mukulwane wavaze vazachile milimo yaundungo.+
7 Solomone apwile natupitau 12 muIsalele mwosena vaze vayilenga nakutondatonda kulya chenyi nakulya chavaze vakuzuvo yenyi. Kapitau hikapitau apwilenga namulimo wakutonda vyakulya mukakweji wamuundu mumwaka.+
8 Ava vakiko vapwile tupitau twenyi: MwanaHule apwile kapitau mungalila yavaEfwalime yajipili.
9 MwanaNdekele apwile kapitau kuMakaze, nakuShalavime,+ nakuMbete-shemeshe, nakuElone-mbete-hanane.
10 MwanaHesete apwile kapitau kuAluvote (kaha atalilenga nganda yaSoko nangalila yaHefwele yosena).
11 MwanaAvinatave apwile kapitau kumingulunga yaNdole (kaha ambachile Tafwate mwanaSolomone kupwa pwevo lyenyi).
12 Mbana mwanaAhilute apwile kapitau kuTanake, naMengito,+ nangalila yaMbete-sheyane yosena+ ize yapwila kuluhachi lwaZaletane, kuYezelele kuputukila kuMbete-sheyane nakuheta kuAvele-mehola swi nakungalila yaYokomeyame.+
13 MwanaNgevele apwile kapitau kuLamote-ngileyate+ (kuhakilako namembo ajimbalaka aYaile+ mwanaManase, aze atwama muNgileyate,+ nangalila yaAlangove+ yize yatwama muMbashane.+ Japwile jinganda jajinene 60 jakujingulwisa jikembwe, natupachiso twaunengu).
14 Ahinatave mwanaIto apwile kapitau kuMahanaime.+
15 Ahimaze apwile kapitau kungalila yavaNafwatale (kaha ambachile Mbasemate mwanaSolomone kupwa pwevo lyenyi).
16 Mbana mwanaHushai apwile kapitau kungalila yavaAshele nakuMbeyalote.
17 Yehoshafwate mwanaPaluwa apwile kapitau kungalila yavaIsakale.
18 Shimei+ mwanaEla apwile kapitau kungalila yavaMbenjamine.+
19 Ngevele mwanaUli apwile kapitau kungalila yaNgileyate,+ ngalila yaShihone+ mwangana wavaAmole, nangalila yaOnge+ mwangana waMbashane. Kaha kwapwile nawa kapitau uze apwile mukulwane watupitau vosena mulifuchi.
20 VaYuta navaIsalele vavulile chikuma kwijiva nge usekeseke wakukalungalwiji.+ Kaha valilenga, vanwinenga, vawahilililenga.+
21 Solomone apwilenga nawata hamawangana osena, kuputukila kuKalwiji*+ nakuheta kulifuchi lyavaFwilishite swi nakungiza yaEjipitu. Solomone vamulambwililenga milambu nakumuzachilanga mukuyoya chenyi chosena.+
22 Vyakulya valilenga kuzuvo yaSolomone hakumbi hakumbi vyapwile vyesekelo vyaunga wakusalulula wakuheta mujikole* 30, nawou wakuzeneka kusalulula wakuheta mujikole 60,
23 navangombe 10 vakulishila mumulaka, navangombe 20 vakulishila kuchipapa, namikoko 100, natupaji, navakai, navachila, natujila vakununa.
24 Kaha Solomone apwilenga nawata havyuma vyosena musali yino yaKalwiji,*+ kuputukila kuChifwisa nakuheta kuNgaza,+ nahali vamyangana vosena musali yino yaKalwiji. Kaha atwaminenga mukuunda namafuchi osena aze amujingilikile.+
25 VaYuta navaIsalele vatwaminenga mukuunda hamakumbi aSolomone osena. Mutu himutu atwaminenga mwishi yamuvinyo wenyi namwishi yamukuyu wenyi, kuputukila kuNdane mbwe nakuMbele-sheva.
26 Solomone apwile najizuvo 4,000* jakulamina tuvalu vakumatemba enyi, apwile nawa natuvalu* 12,000.+
27 Vaze tupitau vahanyinenga vyakulya kuli Mwangana Solomone nakuli vaze valilenga vyakulya kumesa yenyi. Vazachilenga milimo yavo kakweji umwe umwe, kaha mutu himutu amwene ngwenyi vyuma vyosena vinasu.+
28 Vanehelenga nawa mbale namwila watuvalu, natuvalu vaka-kuzata mumazavu, kweseka nomu vavalwezele.
29 Kalunga ahanyine Solomone mangana amavulu nakunangakana chachivulu, nauhashi wakukekesa.+
30 Mangana aSolomone ahambakanyine mangana avatu vosena vakuMututuko, namangana avaka-Ejipitu osena.+
31 Apwile namangana kuhambakana vatu vosena. Apwile namangana kuhambakana Etane+ kaEzela, naHemane,+ naKalakole,+ naNdalata vana vaMahole. Puho yenyi yatanjile nakumafuchi osena aze amujingilikile.+
32 Atele vishimo+ 3,000, kaha myaso+ yenyi yahetele ku 1,005.
33 Ahanjikilenga hamitondo, kuputukila vene kumitondo yamishitale yakuLevanone mbwe nakuhusope*+ yize nayihasa kusoka hambango. Ahanjikilenga nawa hatunyama,+ natujila,*+ navyuma vyakuhalala hamavu,+ nahavaishi.
34 Vatu vakumafuchi osena vejilenga nakwivwilila kumangana aSolomone. Kaha navamyangana vakumavu kwosena vaze vevwilenga mangana aSolomone vejilenga.+
Kwinyikila Chamwishi
^ Ikiye Yufwalate.
^ Kole yimwe yapwile jilita 220. Tala Chihande B14.
^ Kulumbununa, kumulauko waYufwalate.
^ Kuvula kanechi chatwama namujimanyusikilipiti jimwe namumijimbu yikwavo yalifwanako. Jimanyusikilipiti jikwavo jamba ngwajo 40,000.
^ Chipwe “navaka-kutambukila hatuvalu.”
^ Tala Mukana waMazu.
^ Chipwe “navyuma vyakutuka mwilu.”
