Vamyangana 1 5:1-18
5 Omu Hilame mwangana waTule+ evwile ngwavo Solomone vanamuwavisa kupwa mwangana wakuswana ise, atumine vangamba jenyi kuli Solomone, mwomwo Hilame apwilenga sepa lyaNdavichi.*+
2 Jino Solomone atumine mazu kuli Hilame+ ngwenyi:
3 “Ove unatachikiza kanawa ngwove tata Ndavichi kahashile kutunga zuvo navavulukila lijina lyaYehova Kalunga kenyiko, mwomwo yajijita jize vamuzungishilenga, palanga nomu Yehova ahakile vaka-kole kwishi yavilyachilo vyenyi.+
4 Oloze jino Yehova Kalunga kami nangulingisa ngutwame mukuunda.+ Naumwe wauchi ali nakungwimanyina nakole, kaha navyuma vyavipi nawa vyauchi.+
5 Shikaho nguli nakusaka kutunga zuvo navavulukilanga lijina lyaYehova Kalunga kami, nge muze Yehova ashikile tata Ndavichi ngwenyi, ‘Mwanove uze nangukahaka halitanda lyove, ikiye mwakangutungila zuvo yize navakavulukila lijina lyami.’+
6 Ngocho lweza vangamba jove vangutetele mitondo yamishitale yakuLevanone.+ Vangamba jami navakazachila hamwe navangamba jove, kaha nangukafweta vangamba jove vakweseka nomu naukangutomena, mwomwo unejiva ngwove etu katwatachikiza kuvuka mitondo ngana mwavaka-Shitoneko.”+
7 Omu Hilame evwile mazu aSolomone, awahililile chikuma nakwamba ngwenyi: “Vamwalise Yehova likumbi lyalelo mwomwo nahane Ndavichi mwana wamangana ayule vatu vavavulu ngana.”+
8 Kaha Hilame atumine mazu kuli Solomone ngwenyi: “Ngunevu mujimbu wangutuminanga. Nangulinga mweshomwo unahanjika, nangukulongesela vitondo vyamishitale navyevi vyaminjunyipe.+
9 Vangamba jami navavifumisanga kuLevanone nakuvitwala kukalungalwiji. Kahami nangukavikasa mikuta nakuhaka hameya viyenga kuchihela mungulweza. Kuze kukiko nangukavikasunwina, ngocho mukavimbata nakuya navyo. Ove nawa munguhananga vyakulya vize nangukulwezanga vyavaze vakuzuvo yami.”+
10 Ngocho Hilame ahanyinenga Solomone vitondo vyamishitale navyevi vyaminjunyipe.
11 Solomone nawa ahanyinenga Hilame tiliku yakuheta muvyesekelo vyakole* 20,000, namaji amwaza ajilive* akuheta muvyesekelo vyakole 20 kupwa vyakulya vyavaze vakuzuvo yenyi. Evi vikiko vyakulya vize Solomone ahanyinenga Hilame mwaka himwaka.+
12 Yehova ahanyine Solomone mangana nge muze amushikile.+ Kaha Hilame naSolomone vatwaminenga mukuunda, kaha valikashile chivwasano.*
13 Mwangana Solomone asanyikile malunga vamwe muli vaIsalele vosena mangana vazatenga milimo yaundungo. Vapwile malunga 30,000.+
14 Kaha kakweji hikakweji atuminenga malunga 10,000 kuLevanone. Vatwaminenga kakweji umwe kuLevanone, kaha tukweji vavali kujizuvo javo. Atonyilame+ ikiye apwilenga kapitau kavaze vazachilenga milimo kaneyi.
15 Solomone apwile navaka-kusonga malolwa+ kujipili+ 80,000, navatu 70,000 vaze vazachilenga milimo yeka,*
16 natupitau vakulitulaho+ 3,300 vaze vatalilenga vaka-kuzata milimo.
17 Vasongele malolwa amanene, andando yayinene,+ mangana chihela chazuvo vachale+ nawaze malolwa akusonga+ nge muze avalwezele mwangana.
18 Ngocho vaka-kutunga vaSolomone navaka-kutunga vaHilame navaNgevale+ vasongele malolwa, kaha valongesele vitondo namalolwa vyakutungisa zuvo.
Kwinyikila Chamwishi
^ Chipwe “azangilenga Ndavichi.”
^ Hepe., “namaji amwaza akutwa.”
^ Kole yimwe yapwile jilita 220. Tala Chihande B14.
^ Chipwe “valishikile lushiko.”
^ Chipwe “vaze vambachilenga viteli.”
