Vamyangana 1 6:1-38
6 Mumwaka wakusokesa 480 kufuma haze valovokele vaIsalele* mulifuchi lyaEjipitu,+ mumwaka wamuchiwana kufuma haze Solomone apwile mwangana wavaIsalele, mukakweji waJive*+ (ou hikakweji wamuchivali), Solomone aputukile kutunga zuvo yaYehova.*+
2 Zuvo yize Mwangana Solomone atungilile Yehova yapwile jikuvite* 60 muusuku, najikuvite 20 muwihi, najikuvite 30 mukujindama helu.+
3 Senge+ yatembele* yapwile jikuvite 20 muwihi, kaha yatesekele hamwe namuwihi wazuvo.* Pimo yasenge yapwile jikuvite 10.
4 Zuvo kana yapwile najinjanena jakutohwela mukachi.+
5 Kaha kujimbango jazuvo, atungilileko jizuvo jakulilunjika. Eji jizuvo jakulilunjika jajingilikile jimbango jazuvo yosena, jimbango jize jatembele* nakapete kamukachi chikuma.+ Kaha kujihachi jayo avatwileko tupete.+
6 Tupete vazuvo yahamavu mukutohwa vapwile jikuvite jitanu, jikuvite jitanu, kaha tupete vazuvo yahakachi jikuvite 6, jikuvite 6, kaha tupete vazuvo yahelu jikuvite 7, jikuvite 7. Kujihachi jazuvo asezeleko vimango jingulwishi ndo, mangana myalachi yizeneke kukwata hajimbango jazuvo.+
7 Zuvo kana vayitungile namalolwa akwola lyehi,+ ngocho kakwevwakanyine vyema vyajisandu, chipwe jingimbu, chipwe vikungo vyeka omu vapwile nakutunga yize zuvoko.
8 Wingililo wakuluhachi watupete twazuvo yahamavu wapwilile kumutamba wakusulo,*+ kaha jindondelo jalijingile hakukanduka kutupete twazuvo yahakachi, nakutupete twazuvo yahelu.
9 Solomone atungile yize zuvo nakuyikumisa,+ kaha mukachi alilemo myalachi namaliva amishitale.+
10 Kujihachi jazuvo kana atungileko tupete jingulwishi ndo,+ kapete hikapete kapwile jikuvite jitanu mukujindama helu, kaha vatunungile kuzuvo kuzachisa maliva amishitale.
11 Jino Yehova ambile kuli Solomone ngwenyi:
12 “Kachi nge mukavangiza muze ngunakulweze, nakulamanga mazu ami akuyula najishimbi jami,+ kaha nayami nawa nangukatesamo jishiko jami jize ngwalishikile naiso Ndavichi kutalisa kuzuvo eyi uli nakutunga.+
13 Ngocho nangukatwamanga navatu jami vaIsalele,+ kaha kangweshi kukavasezako.”+
14 Solomone atungilenga yize zuvo mangana ayikumise.
15 Kaha hajimbango jamukachi kazuvo alileho maliva amushitale. Ajifwikile namaliva kufumisa hamavu mbwe nakuwalo. Hamavu alileho maliva amunjunyipe.+
16 Kaha mukachi kazuvo kunyima avatwilemo chivatulo chakuheta kujikuvite 20 namaliva amushitale kufumisa hamavu mbwe nakuwalo, kaha muze mukachi kunyima mukiko mwapwile mukapete kamukachi chikuma,+ muze Mwajila Chikuma.+
17 Kaha tembele,*+ chipwe ngwetu kapete kakwavo kayize zuvo kulutwe, kapwile jikuvite 40.
18 Mishitale yize valile mukachi hajimbango jazuvo, vayisonene jitemo jakusamwina+ namaundu akufwana nge malengela.+ Hajimbango hosena valileho mishitale, kaha malolwa kawasolokelengako.
19 Kapete kamukachi chikuma+ kayize zuvo akawahishile mangana ahakemo chikasha chalushiko lwaYehova.+
20 Aka kapete kamukachi kapwile jikuvite 20 muusuku, najikuvite 20 muwihi, najikuvite 20 mukujindama helu,+ kaha ashililemo ulu wamwaza. Lijiko lyakulumbila+ nawa alyalile namishitale.
21 Solomone ashilile ulu wamwaza+ mukachi kayize zuvo yosena, kaha atanjikile malenge kulutwe lwakaze kapete kamukachi chikuma+ vashilile ulu.
22 Zuvo yosena mukachi ayishilile ulu jingulwishi ndo. Kaha lijiko lyakulumbila+ lize lyapwile kwakamwihi nakaze kapete kamukachi alishilile ulu lyosena.
23 Muze mukapete kamukachi chikuma asongelelemo vakeluve+ vamutondo wamupayine vavali, kaha keluve hikeluve asuhwile jikuvite 10.+
24 Livava lyakeluve limwe lyapwile jikuvite jitanu, kaha livava likwavo nawa lyapwile jikuvite jitanu. Kufuma hasongo yalivava limwe nakuya hasongo yalivava likwavo hapwile jikuvite 10.
25 Keluve mukwavo apwile nawa jikuvite 10. Vaze vakeluve vavali vapwile naseteko yoyimwe, kaha vavasongele mujila yoyimwe.
26 Kusuhwa chakeluve umwe chapwile jikuvite 10, kahomu mukiko apwile nakeluve mukwavo nawa.
27 Vaze vakeluve+ avahakile mukapete kamukachi chikuma.* Mavava avaze vakeluve apwile akutanduula, livava lyakeluve umwe lyakwachile mumbango yimwe, kaha livava lyakeluve mukwavo nawa lyakwachile mumbango yikwavo. Mavava avo akwavo atanduukile nakuliwanyina hakachi kazuvo.
28 Kaha vaze vakeluve avashilile ulu.
29 Hajimbango josena jatupete vavali, namukachi nakuweluka, asoneneho vakeluve,+ namikoma,+ najitemo jakusamwina.+
30 Kaha ashilile ulu hamavu muze mutupete vavali.
31 Kuwingililo wakukapete kamukachi chikuma asongeleleleko mapito amilive, najipanda jakujihachi, navipamba, vyapwile chimbwa chambango chakusokesa muvimbwa vitanu.
32 Mapito avali aze asongele apwile amulive, awasonene vakeluve, namikoma, najitemo jakusamwina, kaha awashilile ulu. Ashilile nawa ulu hali vaze vakeluve namikoma.
33 Omu mukiko alingile nakuwingililo watembele,* asongeleleko vipamba vyamilive, vyosena vyatesekele hamwe muvihanda viwana.
34 Kaha asongele mapito avali amunjunyipe. Kaha lipito limwe lyapwile navihanda vivali vize vyalikonekelelenga hamanungililo. Kaha lipito likwavo lyapwile navihanda vivali vize vyalikonekelelenga hamanungililo.+
35 Asoneneho vakeluve, namikoma, najitemo jakusamwina, kaha avishilile ulu.
36 Atungile chipango+ chamukachi chamikana yitatu yakulilunjika yamalolwa akwola, kaha helu alileho myalachi yamishitale.+
37 Chihela chazuvo yaYehova vakumishile kuchala mukakweji waJive* mumwaka wamuchiwana.+
38 Jino mumwaka wakusokesa 11, mukakweji waMbule* (chipwe ngwetu kakweji wakusokesa 8) zuvo yosena vayikumishile kweseka nomu vatelelele kuyitunga.+ Zuvo yosena ayitungile hamyaka 7.
Kwinyikila Chamwishi
^ Tala Chihande B8.
^ Tala Chihande B15.
^ Hepe., “vana vaIsalele.”
^ Kuvite yimwe yapwile jisendimita 44.5. Tala Chihande B14.
^ Hepe., “yatembele yazuvo.”
^ Chipwe “jikuvite 20 kufuma hasongo nahasongo muwihi wazuvo.”
^ Hano tembele yinemanyinako muze Mwajila.
^ Hepe., “wakuchilyo.”
^ Kulumbununa, muze Mwajila, kulutwe lwamuze Mwajila Chikuma.
^ Kulumbununa, muze Mwajila Chikuma.
^ Hano tembele yinemanyinako muze Mwajila.
^ Tala Chihande B15.
^ Tala Chihande B15.
