Vamyangana 1 7:1-51
7 Solomone ambachile myaka 13 numbanyi akumise+ kutunga zuvo* yenyi.+
2 Atungile zuvo vavulukile ngwavo Zuvo yaMusenge waLevanone.+ Mukusuhwa yapwile jikuvite* 100, muwihi yapwile jikuvite 50, kaha mukuzandama yapwile jikuvite 30. Ayitungilile hamikana yiwana yajipanda jamishitale, kaha helu lyajipanda kana valileho myalachi yamishitale.+
3 Hamyalachi kana, valileho walo wamishitale. Jipanda* josena japwile 45, kaha hamukana himukana hapwile 15.
4 Zuvo kana yapwile namikana yajinjanena yitatu, jinjanena japwile jakulitalasana mumikana yitatu.
5 Vikolo vyosena navipamba vyapwile vyajimbango jiwana jiwana, nge muze japwile jinjanena jize jalitalasanyine mumikana yitatu.
6 Atungile nawa Kapete* kaJipanda. Mukusuhwa yapwile jikuvite 50, mukutohwa yapwile jikuvite 30. Kulutwe lwayo vatungilileko kapete kauhichilo nasenge yako.
7 Atungile nawa Zuvo* yaLitanda+ lyaKusopela,+ muze asopelelenga vihande. Zuvo kana ayalile mishitale kufuma hamavu mbwe nakuwalo.
8 Zuvo* yenyi yakutwama yize yapwile muchipango+ chakunyima chaZuvo yakusopela, vayitungile mujila yoyimwe. Solomone atungile nawa zuvo yamwanaFwalo, uze ambachile kupwa pwevo lyenyi.+ Zuvo kana yalifwanyine nazuvo yakusopela.
9 Jizuvo josena eji vajitungile namalolwa andando yayinene,+ akusonga kweseka nomu vawapimine. Vawasongele najisaha kusali nasali, kufuma hamavu nakuheta kufulumba, nahaweluka swi nakuchipango chachinene.+
10 Chihela vachalile namalolwa amanene chikuma, andando yayinene. Malolwa amwe apwile jikuvite 10, eka jikuvite 8.
11 Helu lyamalolwa kana, valileho malolwa eka andando yayinene akwola kweseka nomu vawapimine, valileho nawa namishitale.
12 Chipango chachinene vachitungile namalolwa akwola akulunjika mumikana yitatu, kaha helu valileho myalachi yamishitale, ngana muze chapwile chipango+ chazuvo yaYehova chamukachi nasenge yacho.+
13 Mwangana Solomone atumine vatu kuTule vakasanyike Hilame.+
14 Hilame apwile mwanatuliwe wapwevo wakumuyachi waNafwatale, kaha ise apwile wakuTule, muka-kufula unengu.+ Apwile wauhashi chikuma, wakunangakana, wachinyingi mukufula vyuma vyaunengu vyosena.+ Ngocho ejile kuli Mwangana Solomone nakumuzachila milimo yenyi yosena.
15 Atengele jipanda jaunengu jivali.+ Panda hipanda yasuhwile jikuvite 18, kaha kutohwa chapanda hipanda nawa chapwile jikuvite 12.+
16 Atengele mitwe yaunengu yivali nakuyihaka helu lyajize jipanda. Mutwe umwe wazandamine jikuvite jitanu, kaha mutwe ukwavo nawa jikuvite jitanu.
17 Mitwe yize yapwile helu lyajipanda, yapwile nawanda wakuselula namalenge amalengeso.+ Hamutwe umwe hapwile 7, kaha hamutwe ukwavo nawa hapwile 7.
18 Hamitwe yize vahakile helu lyajize jipanda, ahakileho mikana yivali yajiloma* jakuselasana nauze wanda. Omu mukiko alingile hamitwe yosena yivali.
19 Mitwe yivali yize yapwile helu lyajipanda kuze kusenge, vayitengele yakufwana nge jitemo, kaha yasuhwile jikuvite jiwana.
20 Yize mitwe vayitumbikile helu lyajize jipanda jivali haze hapwile hakusalama, kaha mutwe himutwe wapwile namikana yajiloma 200.+
21 Jize jipanda ajimikile kusenge yatembele.*+ Panda yize emikile kulivoko lyachilyo,* ayilukile ngwenyi Yakine.* Kaha yize emikile kulivoko lyachimoswe* ayilukile ngwenyi Mbowaze.*+
22 Helu lyajize jipanda vahakileho yize mitwe yakufwana nge jitemo. Ngocho mulimo wakutenga jize jipanda wosena wakumine.
23 Jino atengele Limbashiya* lyakuzuzulula.+ Lyapwile lyamujingulule, kaha kutohwa chalyo kukanwa lyapwile jikuvite 10, kuzandama chalyo lyapwile jikuvite jitanu. Kaha muutengejiva walyo lyapwile jikuvite 30.+
24 Mwishi yamuvumbo walyo mwapwile vimbilingwa vyamaundu+ jingulwishi ndo, kuvite hikuvite yapwile namaundu 10. Aze maundu amumikana yivali, valingile akuzuzulwilaho.
25 Lize Limbashiya lyatwamine havangombe 12,+ vatatu vatalile kunote, vatatu vatalile kumulauko, vatatu vatalile kusulo, vatatu vatalile kumututuko. Limbashiya kana valitumbikile hajinyima javo, kaha vatalishile chamatako mukachi.
26 Pimo yalyo yapwile nge chikapa chalivoko.* Kaha mivumbo yalyo yapwile nge mivumbo yalupasa, yakufwana nge lutemo. MuLimbashiya kana mwengililenga jimbate* 2,000 jameya.
27 Atengele matemba*+ aunengu 10. Litemba hilitemba lyasuhwile jikuvite jiwana, lyatohwele jikuvite jiwana, kaha lyazandamine jikuvite jitatu.
28 Awa matemba vawatungile ngana: Apwile navihanda vyaunengu mujihachi, evi vihanda valingile vyakuselemeka mumyalachi.
29 Haze havihanda vasoneneho vandumba,+ navangombe, navakeluve.+ Omu mukiko vasonene nahamikusa. Helu namwishi yavaze vandumba navangombe vasoneneho jitemo jakuzezalala.
30 Litemba hilitemba lyapwile natufumbo vaunengu vawana, namingochi yaunengu. Mujimbango jalyo jiwana, vatengelelemo lihinji limwe limwe lize lyakundwijile litemba. Awa mahinji akandukile nakuheta kumatako ambashiya, kaha vawasonene najitemo kujisali josena.
31 Kanwa kayo kapwile kuvite yimwe kufuma mukachi nakuya helu. Kanwa kana kapwile kamujingulule, kaha kazandamine kuvite yimwe nachimbwa. Kuze kukanwa vasoneneko. Vihanda vyalitemba vyapwile vyajimbango, keshi vyamujingululeko.
32 Vaze tufumbo vawana, vapwile mwishi yavize vihanda vyakujihachi, kaha mahinji alitemba akwachile hamingochi. Kuzandama chakafumbo hikafumbo chapwile kuvite yimwe nachimbwa.
33 Tufumbo kana vafwanyine nge vaze vakulitemba lyatuvalu. Mahinji alyo, navingelengele vyalyo, navichanganyika vyalyo, namachimbi alyo vyapwile vyavikungo.
34 Mujimbango jiwana jalitemba hilitemba vatengelelemo lihinji limwe limwe lize lyakundwijile litemba.
35 Helu lyalitemba hapwile chitumbikilo chamujingulule chize chasuhwile chimbwa chakuvite kuya helu. Myalachi yalyo yahelu navihanda vyakujihachi vavitengele vyakuzuzulwila kumwe nalitemba.
36 Helu lyamyalachi yalyo nahavihanda vyakujihachi asoneneho vakeluve, navandumba, namitondo yamikoma kweseka nakutohwa chachihanda hichihanda, kaha asoneneho nawa jitemo jingulwishi ndo.+
37 Omu mukiko alingile namatemba osena 10.+ Awazuzulwile mujila yoyimwe,+ kaha atesekele hohamwe, nakusoloka nawa mujila yoyimwe.
38 Atengele nawa jimbashiya 10 jaunengu.+ Mumbashiya himbashiya mwengilile jimbate 40 jameya. Kaha mbashiya himbashiya yatohwele jikuvite jiwana. Litemba hilitemba lyapwile nambashiya yalyo.
39 Matemba atanu awahakile kuluhachi lwazuvo kuchilyo, kaha matemba akwavo atanu awahakile kuluhachi lwazuvo kuchimoswe. Kaha lize Limbashiya alihakile kuluhachi lwazuvo kuchilyo, kumututuko, chakutala kusulo.+
40 Hilame+ atengele nawa jimbashiya, najifwosholo,+ naviloso.+ Ngocho akumishile milimo yosena azachililile Mwangana Solomone kuzuvo yaYehova.+
41 Akumishile kutenga jipanda jivali,+ namitwe yivali yize ahakile helu lyajize jipanda, nawanda wakuselasana+ uze ahakile kuze kumitwe,
42 najiloma+ 400 jamumikana yivali yivali yize aselasanyine hawanda wakuhaka kuze kumitwe yize yapwile hajipanda,
43 namatemba 10,+ najimbashiya 10+ jize vahakile helu lyamatemba,
44 naLimbashiya,+ navangombe 12 vaze vapwile mwishi yalize Limbashiya,
45 navifwoyo, najifwosholo, naviloso navyuma vyosena vyakuzuvo yaYehova vyaunengu wakutomesa vize Hilame atungilile Mwangana Solomone.
46 Mwangana avitungililile mungalila yaYotau muvikombola vyauma vize vyatwama mukachi kaSukote naZaletane.
47 Solomone kapezalishile vyuma kaneviko mwomwo vyavulile chikuma. Kaha kulema chaunengu wavyo kavachitachikijileko.+
48 Solomone atungile vyuma vyosena vyamuzuvo yaYehova, lijiko lyakulumbila lyaulu,+ namesa yaulu+ haze vahakilenga jimbolo jakuhana Kalunga,
49 navitumbikilo vyamanongo+ aulu, vitanu kuchilyo vitanu kuchimoswe kwakamwihi nakapete kamukachi chikuma, najitemo,+ namanongo, najimanya, vyosena vyapwile vyaulu wamwaza.+
50 Atungile najimbashiya, natuzola twamanongo,+ naviloso, najipasa,+ natumalonga twakukwachila kakahya,+ namanevo amapito akapete kamukachi+ mukiko muze Mwajila Chikuma, namanevo amapito akuzuvo yatembele,+ vyosenevi vyapwile vyaulu wamwaza.
51 Mwangana Solomone akumishile kuzata milimo yosena yakupandama kuzuvo yaYehova. Anehele vyuma vyosena vize ajilikile+ ise Ndavichi, kaha ahakile palata, naulu, navyuma vyeka muze mwakulamina vikumba muzuvo yaYehova.+
Kwinyikila Chamwishi
^ Chipwe “nganda.”
^ Kuvite yimwe yapwile jisendimita 44.5. Tala Chihande B14.
^ Chipwe “Tupete” numba “Myalachi.” MuchiHepeleu vamba kaha ngwavo 15.
^ Chipwe “Senge.”
^ Chipwe “Senge.”
^ Chipwe “Nganda.”
^ Jiloma japwa himuyachi umwe wamihako.
^ Hano tembele yinemanyinako muze Mwajila.
^ Chipwe “kusulo.”
^ Ulumbunwiso, “[Yehova] Azamise.”
^ Chipwe “kunote.”
^ Kulumbununa pamo, “Ngolo.”
^ Chipwe “mwakulamina meya.”
^ Kafwe jisendimita 7.4. Tala Chihande B14.
^ Mbate yapwile jilita 22. Tala Chihande B14.
^ Chipwe “matemba ameya.”
