Vamyangana 1 8:1-66
8 Halwola luze, Solomone akungulwile+ vakulwane javaIsalele vosena, vatwamina jamiyachi yavaIsalele, navamyata vakujizuvo javaIsalele.+ Vejile kuYelusalema kuli Mwangana Solomone mangana vambate chikasha chalushiko lwaYehova kufuma kuNganda yaNdavichi,+ yikiko Zeyone.+
2 VaIsalele vosena valikungulwilile kumeso aMwangana Solomone kuchiwanyino* chize chapwilengako mukakweji waEtanyime,* kakweji wakusokesa 7.+
3 Vakulwane javaIsalele vosena vejile, kaha vapilishitu vambachile chize Chikasha.+
4 Vapilishitu navaLevi vanehele chize Chikasha chaYehova, nambalaka yakuliwanyina,+ navyuma vyajila vyosena vize vyapwile muze mumbalaka.
5 Mwangana Solomone nalizavu lyavaIsalele lyosena lize lyakungulukilile kuli ikiye, vemanyine kuze kuChikasha. Kaha valumbile+ mikoko navangombe vavavulu, kakwapwile mutu ahashile kuvalavako.
6 Jino vapilishitu vengishile chize chikasha chalushiko lwaYehova muchihela chacho,+ mukapete kamukachi chikuma, muze Mwajila Chikuma, vachitumbikile mwishi yamavava avakeluve.+
7 Vaze vakeluve vapwile vakutanduula mavava avo hachihela haze hapwile chize Chikasha, ngocho vaze vakeluve vafwikile chize Chikasha namyalachi yacho.+
8 Yize myalachi+ yasuhwile chikuma, ngocho nge mutu ali muze Mwajila kulutwe lwakaze kapete kamukachi chikuma amwenenga jisongo jayo, oloze nge ali haweluka kajimwenengako. Kaha myalachi kana muyichili nakulikumbi lyalelo.
9 Muze muchikasha kamwapwile vyuma vyekako shina malolwa avali+ kaha aze ahakilemo+ Mose kuHoleve omu Yehova alishikile lushiko+ navaIsalele hakulovoka mulifuchi lyaEjipitu.+
10 Omu vapilishitu valovokele muchihela chajila, livwi+ lyafwikile muzuvo yaYehova.+
11 Vapilishitu kavahashile kuzata milimo yavoko mwomwo yalize livwi. Upahu waYehova wazalile muzuvo yaYehova.+
12 Kaha Solomone ambile ngwenyi: “Yehova ambile ngwenyi mwatwamanga mulivwi lilava.+
13 Ngocho ngunakutungila zuvo yaulangaji, chihela chize mutwamangamo haya myaka yosena.”+
14 Jino mwangana alumukile nakutala lizavu lyavaIsalele lyosena, kaha aputukile kuvakisula oku lizavu lyavaIsalele lyosena linemana.+
15 Ambile ngwenyi: “Vamwalisenga Yehova Kalunga kaIsalele, ou ashikile tata Ndavichi nakanwa kenyi, ou ukwechi livoko lyenyi linalingi vyuma ashikile, ngwenyi,
16 ‘Kufuma halikumbi lize ngwalowele vatu jami vaIsalele muEjipitu, kangwasakwile nganda yeka mumiyachi yavaIsalele yosena yakutela kungutungila zuvo navavulukilanga lijina lyamiko.+ Ngunasakula Ndavichi ayulenga vatu jami vaIsalele.’
17 Tata Ndavichi asakile kutunga zuvo navavulukilanga lijina lyaYehova Kalunga kaIsalele.+
18 Jino Yehova ambile kuli tata Ndavichi ngwenyi, ‘Unasake vene kutunga zuvo navavulukilanga lijina lyami, kaha unalingi kanawa kujina chuma kana mumuchima wove.
19 Oloze kaweshi kutunga zuvo kanako. Mwanove walunga uze naukasema* ikiye mwakatunga zuvo navakavulukilanga lijina lyami.’+
20 Yehova natesamo vyuma ashikile. Ami ngunaswane tata Ndavichi nakutwama halitanda lyaIsalele, nge muze ashikile Yehova. Ngunatungu nawa zuvo navavulukilanga lijina lyaYehova Kalunga kaIsalele.+
21 Ngunalongesa nachihela chakutumbikamo Chikasha chalushiko+ lwaYehova luze alishikile navakakuluka jetu omu avalowele mulifuchi lyaEjipitu.”
22 Kufumaho Solomone emanyine kulijiko lyakulumbila lyaYehova kulizavu* lyavaIsalele lyosena, kaha olwele mavoko enyi mwilu.+
23 Ambile ngwenyi: “Ove Yehova Kalunga kaIsalele, kakweshi Kalunga weka nge ove+ mwilu chipwe hano hamavuko. Weji kulamanga lushiko nakusolola zangi yove yakwilila+ kuli vangamba jove vaze veji kukuzachilanga namichima yavo yosena.+
24 Unalame lushiko lwove luze washikile ngamba yove tata Ndavichi. Washikile lushiko nakanwa kove, kaha livoko lyove linalingi vyuma washikile.+
25 Ngocho jino, ove Yehova Kalunga kaIsalele, lamanga mazu ove washikile ngamba yove tata Ndavichi ngwove: ‘Kachi nge vana vove navalamanga jijila javo nakutambukanga mukulonga kumeso ami nge muze unatambukanga nayami, kaha halitanda lyawangana waIsalele nahakatwamanga lika mutu wamuchisaka chove.’+
26 Shikaho, ove Kalunga kaIsalele, tesamo jino lushiko lwove luze washikile ngamba yove tata Ndavichi.
27 “Uno ove Kalunga unahase kutwama hamavu numba?+ Kachi nge melu anakukehela,+ nyi ngachilihi zuvo eyi ngunatungu?+
28 Shikaho ove Yehova Kalunga kami, tengeleka matwitwi ove kukulomba chayami ngamba yove, nakukulembelela chami, ivwilila kukawelele kami nakukulomba echi nguli nakulomba ami ngamba yove likumbi lyalelo.
29 Meso ove atalenga hazuvo yino ufuku namusana, hazuvo yino wambile ngwove, ‘Navakayivulukilanga lijina lyami,’+ mangana wivwilile kukulomba chayami ngamba yove chize nangulombanga oku ngunatale kuzuvo yino.+
30 Ivwilila kukulembelela chayami ngamba yove navatu jove vaIsalele omu natukulembelelanga oku tunatale kuchihela chino. Twivwilile omwo mwilu watwama,+ twivwilile nakutukonekela.+
31 “Kachi nge mutu mwavulumuna mulonga kuli mukwavo, kahou vanavulumuna mwashingisa uze namuvulumuna* nakumulweza atesemo lushingo* lwenyi, kachi nge uze navulumuna mukwavo mweza kulijiko lyove lyakulumbila eli lili muno muzuvo shimbu achili nachishingo* kana,+
32 kahove ivwilila omwo mwilu watwama, uyule vangamba jove. Muka-kuhuka umuhane mulonga nakumuzangamisa kweseka navilinga vyenyi, kaha muka-kwoloka nawa umusambise nakumufweta kweseka nakwoloka chenyi.+
33 “Kachi nge vatu jove vaIsalele navavafungulula kuli vaka-kole javo mwomwo yakulinga shili kumeso ove,+ kaha hinavakinduluka kuli ove nakwalisa lijina lyove,+ nakukulomba, nakukulembelela uvevwile uselewa kuzuvo yino,+
34 kaha ivwilila omwo mwilu watwama, ukonekele shili yavatu jove vaIsalele nakuvakindulwisa mulifuchi wahanyine vakakuluka javo.+
35 “Kachi nge mwilu munalisoko, vula kayeshi nakunokako+ mwomwo yakulinga shili kumeso ove,+ kaha hinavalomba oku vanatale kuchihela chino nakwalisa lijina lyove nakuseza shili yavo mwomwo yakuvenyisa,*+
36 kaha ivwilila omwo mwilu watwama, ukonekele shili yavangamba jove, vatu jove vaIsalele, kaha uvanangule+ jila yamwaza vatela kuya. Unokese vula mulifuchi+ lize wahanyine vatu jove kupwa uswana wavo.
37 “Kachi nge mulifuchi+ namwiza zala yakalombolombo, chipwe musongo wachihita, chipwe musana wakaza, chipwe kambukungulu,+ chipwe vambimba makumbi, chipwe mavongolo, chipwe nge vaka-kole javo navakavahaka muchingombela munganda yimwe yamulifuchi lyavo,* chipwe cheshocho chipupu chipwe musongo naukavawana,+
38 cheshocho kulomba navakakulomba, chipwe cheshocho kulembelela navakakulembelela+ kuli mutu, chipwe kuli vatu jove vaIsalele vosena (mwomwo mutu himutu natachikiza ukalu wenyi),+ kaha hinavolola mavoko avo kuzuvo yino,
39 kaha ivwilila omwo mwilu watwama,+ uvakonekele+ nakulingaho chuma chimwe, nakufweta mutu himutu kweseka navilinga vyenyi,+ mwomwo watachikiza muchima wenyi (ove yove kaha watachikiza muchima wamutu himutu),+
40 mangana vakwivwenga woma hamakumbi osena navayoyanga mulifuchi lize wahanyine vakakuluka jetu.
41 “Jino kuli vaka-mafuchi eka, vaze kaveshi vamuli vatu jove vaIsaleleko, vaze navafuma kumafuchi akwakusuku mwomwo yalijina* lyove,+
42 nakwiza nakulomba kuzuvo yino, (mwomwo navakevwa puho yalijina lyove lyalinene+ nalivoko lyove lyangolo, lyaundume),
43 kaha ivwilila omwo mwilu watwama,+ uvalingile vyuma navakulomba, mangana vatu vosena vahano hamavu vatachikize lijina lyove nakukwivwa woma+ nge muze veji kukwivwanga woma vatu jove vaIsalele. Kaha vatachikize ngwavo zuvo yino ngunatungu vanayivulukila lijina lyove.
44 “Kachi nge vatu jove navaya nakulwa jita navaka-kole javo kuze unavatumu,+ kaha hinavalomba+ kuli ove Yehova oku vanatale kunganda eyi unasakula,+ nakuzuvo ngunatungu eyi navavulukilanga lijina lyove,+
45 kaha ivwilila kukulomba chavo nakukulembelela chavo omwo mwilu watwama, ulinge mwachiyulo kuli vakiko.
46 “Kachi nge navalinga shili kuli ove (hakuwana nge kakweshi mutu azeneka kulinga shiliko),+ kaha hinaupihilila nakuvahana mumavoko avaka-kole javo, ngocho hinavavakwata ufunge nakuvatwala kulifuchi lyavaka-kole javo, lyakwakusuku chipwe kwakamwihi,+
47 kahomu navakanuka kulifuchi lize vanavatwale ufunge+ ngwavo tunalingi shili, kaha hinavakinduluka kuli ove+ nakukulembelela mulifuchi lyavaze vanavakwate ufunge,+ ngwavo, ‘Tunalingi shili, tunapihisa, tunahengesa,’+
48 kaha hinavakinduluka kuli ove namichima yavo yosena,+ namyono* yavo yosena mulifuchi lyavaka-kole javo vaze vanavakwate ufunge, kaha hinavalomba kuli ove oku vanatale kulifuchi eli wahanyine vakakuluka javo, nakunganda eyi unasakula, nakuzuvo ngunatungu eyi navavulukilanga lijina lyove,+
49 kaha ivwilila kukulomba chavo nakukulembelela chavo omwo mwilu watwama,+ ulinge mwachiyulo kuli vakiko,
50 ukonekele vatu jove vaze vanalingi shili kuli ove, uvakonekele milonga yavo yakuzombwojoka jishimbi yize vanalingi kuli ove. Ukavalingisa vakavevwile keke kuli vaze vanavakwate ufunge, kaha navakavevwila keke+
51 (mwomwo vanapu uswana wove,+ hivatu jove vaze walowele muEjipitu,+ mulilungu lyakakahya lyakuyengunwina fwelu).+
52 Tengeleka matwitwi ove kukulembelela chayami ngamba yove,+ nakukulembelela chavatu jove vaIsalele, nakuvevwilila heshoho navalomba kuli ove.*+
53 Ove Mwata Wakulitulaho Yehova, vatu jove wavasakwile kupwa uswana wove muli vatu veka naveka vosena hano hamavu,+ nge muze wahanjikile kuhichila muli ngamba yove Mose, omu walowele vakakuluka jetu muEjipitu.”
54 Omu Solomone akumishile kulomba kuli Yehova nakumulembelela, akatukile kulijiko lyaYehova lyakulumbila kuze afukamine oku nolola mavoko enyi mwilu.+
55 Kaha akiswile lizavu lyavaIsalele lyosena nalizu lyakukanguka ngwenyi:
56 “Vamwalisenga Yehova ou nahane vatu jenyi vaIsalele chihela chakunokela, nge muze ashikile.+ Mazu osena aze ashikile kuhichila muli ngamba yenyi Mose anatesamo, kakwalihonene lizu numba limweko.+
57 Yehova Kalunga ketu apwenga nayetu nge muze apwile navakakuluka jetu.+ Kanda atuseza chipwe kutusuvililako.+
58 Atalise michima yetu kuli ikiye+ mangana tutambukenga mujijila jenyi josena, nakulamanga jishimbi jenyi, najindongi jenyi, namazu enyi akuyula vize alwezele vakakuluka jetu vavilamenga.
59 Mazu awa ngunalembelela Yehova apwenga lika kumuchima waYehova Kalunga ketu musana naufuku, kaha alinge mwachiyulo kuli ami ngamba yenyi, nakuli vatu jenyi vaIsalele kweseka navyuma vili nakusakiwa hakumbi hakumbi,
60 mangana vatu veka naveka vosena hano hamavu vatachikize ngwavo Yehova ikiye Kalunga wamuchano.+ Kakweshi wekako.+
61 Ngocho zachilenunga Yehova Kalunga ketu namichima yenu yosena+ hakukavangizanga jindongi jenyi nakulamanga jishimbi jenyi nge omu munalingi likumbi lyalelo.”
62 Mwangana navaIsalele vosena vahanyine Yehova vimuna vakuvatula vavavulu.+
63 Solomone ahanyine Yehova mawana akusolola kuunda.+ Ahanyine vangombe 22,000, namikoko 120,000. Ngocho mwangana navaIsalele vosena vakunjikile zuvo yaYehova.+
64 Halikumbi lize, mwangana ajilikile chihela chamukachi kachipango chize chapwile kulutwe lwazuvo yaYehova, mwomwo mukiko alumbilile vimuna vakuvatula, namawana amanona, namaji amawana akusolola kuunda. Alingile ngocho mwomwo lijiko lyakulumbila lyaunengu+ lize lyapwile kumeso aYehova lyapwile lyalindende kulumbila vimuna vakuvatula, namawana amanona, namaji+ amawana akusolola kuunda.
65 Solomone alingile chiwanyino+ navaIsalele vosena kumeso aYehova Kalunga ketu hamakumbi 7, namakumbi akwavo 7, kufutula apwile makumbi 14. Vatu vaze vakungulukile vapwile vavavulu chikuma. Vafumine kuLevo-hamate* swi nakuMwanakalwiji* wakuEjipitu.+
66 Lichako asuwile vatu vayenga kumembo avo, kaha vatu vakiswile mwangana nakuya kumembo avo. Vawahililile nakusuuluka mumichima yavo havyuma vyamwaza vyosena+ vize Yehova alingilile ngamba yenyi Ndavichi navatu jenyi vaIsalele.
Kwinyikila Chamwishi
^ Chikiko Chiwanyino chaVisakila.
^ Tala Chihande B15.
^ Hepe., “Mwanove walunga uze mwakafuma kumitanda yove.”
^ Chipwe “kuchikungulwilo.”
^ Chipwe “kahou vanavulumuna mwangula uze namuvulumuna.” Kulumbununa changu chize nachiza hali uze namuvulumuna kachi nge mwalishinga mwamakuli chipwe mwahokola vyuma nalishingi.
^ Hepe., “changu.”
^ Hepe., “nachangu.”
^ Chipwe “yakuvayanjisa.”
^ Hepe., “yamulifuchi lyavikolo vyavo.”
^ Chipwe “yapuho.”
^ Tala Mukana waMazu.
^ Chipwe “nakwivwilila vyeshovyo navalomba kuli ove.”
^ Chipwe “kuwingililo wakuHamate.”
^ Tala Mukana waMazu.
