Vamyangana 1 9:1-28
9 Omu Solomone akumishile kutunga zuvo yaYehova, nazuvo* yamwangana,+ navyuma vyosena vize ajinyine kutunga,+
2 Yehova alisolwele kuli Solomone kamuchivali nge muze alisolwele kuli ikiye kuNgiveyone.+
3 Yehova ambile kuli ikiye ngwenyi: “Ngunevu kulomba chove nakulembelela chove. Ngunajilika zuvo eyi unatungu mangana vayivulukilenga lijina lyami haya myaka yosena.+ Nangulamanga zuvo eyi nakuyijika muchima.+
4 Kachi nge nautambukanga mukulonga+ namukwoloka+ kumeso ami nge muze atambukilenga iso Ndavichi,+ nakulinga vyuma vyosena vize ngunakulweze,+ nakukavangiza jindongi jami, namazu ami akuyula,+
5 kaha nanguzamisa litanda lyove lyawangana mangana uyulenga vaIsalele haya myaka yosena, nge muze ngwashikile iso Ndavichi, ngwami, ‘Halitanda lyawangana waIsalele nahakatwamanga lika mutu wamuchisaka chove.’+
6 Kachi nge ove navana vove namulitwamina kungukavangiza, nakuzeneka kulama jishimbi jami, najindongi jami jize ngunamihane, oloze hinamuya nakuzachila tulunga veka nakulifukula kuli vakiko,+
7 kaha nangukanongesa vaIsalele mulifuchi lize ngunavahane.+ Zuvo eyi ngunajilika mangana vayivulukilenga lijina lyami nangukayiseza,+ kaha vaIsalele navakavasaula* nakuvatoleka kuli vatu veka naveka.+
8 Zuvo eyi nayikapwa malala.+ Mahitajila navakayitala nakulikomokela, kaha navakalihaha nakwamba ngwavo, ‘Mwomwo ika Yehova alingilile chuma kana kulifuchi eli nakuzuvo eyi?’+
9 Jino navakavakumbulula ngwavo, ‘Mwomwo vasezele Yehova Kalunga kavo uze alowele vakakuluka javo mulifuchi lyaEjipitu, kaha valemesele tulunga veka nakulifukula kuli vakiko nakuvazachila. Shikaho Yehova navanehela lupi lwosena elu.’”+
10 Omu yakumine myaka 20 yize Solomone atungile jize jizuvo jivali, zuvo yaYehova nazuvo* yamwangana,+
11 Mwangana Solomone ahanyine Hilame+ mwangana waTule jinganda 20 jamungalila yaNgalileya, mwomwo Hilame ahanyinenga Solomone vitondo vyamishitale, navyevi vyaminjunyipe, naulu wauvulu.+
12 Ngocho Hilame akatukile kuTule, ayile nakutala jinganda jize amuhanyine Solomone, oloze kasuulukile najoko.*
13 Ambile ngwenyi: “Ove ndumbwami, jinganda muka vene eji unanguhane?” Kaha eji jinganda vajilukile ngwavo Lifuchi lyaKavule* palanga nakulelo.
14 Jino Hilame atuminyine mwangana jitalende* jaulu 120.+
15 Mwangana Solomone asanyikile vatu vazatenga milimo yaundungo+ yakutunga zuvo yaYehova,+ nazuvo* yenyi, naMulundu,*+ nakembwe yaYelusalema, naHazole,+ naMengito,+ naNgezele.+
16 (Fwalo mwangana waEjipitu ejile nakufungulula nganda yaNgezele nakuyocha nakakahya, ajihile nawa vaKanane+ vaze vatwaminenga munganda kana. Kaha eyi nganda ayihanyine kuli mwanenyi,+ pwevo lyaSolomone kupwa wana wakulisalisa nenyi.*)
17 Solomone atungulwile Ngezele, naMbete-holone yaKuchikulo,+
18 naMbalate,+ naTamale yamupambo, mulifuchi vene lize.
19 Solomone atungile nawa jinganda jakulamina vyuma, najinganda jamatemba+ enyi ajita, najinganda javaka-kutambukila hatuvalu, navyuma vyeka vize ajinyine kutunga muYelusalema, namuLevanone, namulifuchi mwosena muze ayulilenga.
20 Jino vatu vosena vaze vasalileho hali vaAmole, navaHete, navaPeliji, navaHivi, navaYevuse+ vaze kavapwile vaIsaleleko,+
21 vana vavo vaze vasalile mulifuchi, vaze kavajihile kuli vaIsaleleko, vavahanyine milimo yaundungo kuli Solomone yize vanazatenga palanga nakulelo lino.+
22 Oloze Solomone katengele vaIsalele kupwa vandungoko,+ mwomwo vapwile vatu jenyi vaka-kwasa jita, navangamba jenyi, navilolo jenyi, natupitau twenyi, navakulwane javaka-kutambukisa matemba enyi, navakulwane javaka-kutambukila hatuvalu twenyi.
23 Solomone apwile nawa navamyata vakulitulaho 550 vaze vatalilenga milimo yenyi, tupitau twavatu vaze vazachilenga milimo.+
24 MwanaFwalo+ afumine kuNganda yaNdavichi+ nakuya muzuvo yenyi yize vamutungilile kuli Solomone. Halwola kanelu hakiko Solomone atungile Mulundu.*+
25 Solomone alumbilenga vimuna vakuvatula namawana akusolola kuunda katatu mumwaka.+ Avilumbilenga halijiko lyakulumbila lize atungililile Yehova+ mangana vikakumukenga wishi halijiko lize lyapwile kumeso aYehova. Ngocho akumishile mulimo wakutunga zuvo.+
26 Mwangana Solomone atungile nawa mato kuEjone-ngevele,+ ngalila yize yapwile kuElote, kungenge yaKalungalwiji Uchila mulifuchi lyaEtome.+
27 Hilame atumine vangamba jenyi vamwe vaze vatachikijile mwakutambukila hakalungalwiji namato+ mangana vazachile hamwe navangamba jaSolomone.
28 Kaha vayile kuOfwile,+ vakambachile jitalende jaulu 420 nakujineha kuli Mwangana Solomone.
Kwinyikila Chamwishi
^ Chipwe “nanganda.”
^ Hepe., “navakavavuluka mutushimutwiji.”
^ Chipwe “nanganda.”
^ Hepe., “kajawahile kumeso enyiko.”
^ Chipwe pamo, “Lifuchi Lyamokomoko.”
^ Talende yimwe yapwile jikilongalamu 34.2. Tala Chihande B14.
^ Chipwe “naMilo.” Milo hilizu lyachiHepeleu lyalumbununa “kuzala.”
^ Chipwe “nanganda.”
^ Chipwe “wana wahachilika chakulimbata; matemo.”
^ Chipwe “Milo.” Milo hilizu lyachiHepeleu lyalumbununa “kuzala.”