Vamyangana 2 1:1-18
-
Elija mwavuluka chimweza kufwa chaAhajiya (1-18)
1 Omu alingile Ahave hanafu lyehi, vaMowave+ valikangile kuli vaIsalele.
2 Jino Ahajiya alondokele mulihanya lyachipato vajingilikile kuzuvo yenyi yahelu muSamaliya nakuholoka, kaha alivulumwine. Ngocho atumine tunganda twenyi, avalwezele ngwenyi: “Yenu mukehule Mbale-zevuve, kalunga wakuEkelone+ mukawane numba nge nanguhinduka.”+
3 Oloze kangelo kaYehova ambile kuli Elija*+ wakuChishivi ngwenyi: “Katuka uyenga nakuliwana natunganda twamwangana waSamaliya, ukambe kuli vakiko ngwove, ‘Uno muIsalele kamweshi Kalungako numba muyenga nakwihula Mbale-zevuve, kalunga wakuEkelone nyi?+
4 Shikaho Yehova nambe ngwenyi: “Hakahela unasavala kaweshi kuhindukahoko, mwomwo naufwa.”’” Ngocho Elija ayile kwenyi.
5 Omu tunganda vakindulukile, mwangana avehwile ngwenyi: “Ika munakindulukila washi?”
6 Vakiko vakumbulwile ngwavo: “Kwapwanga lunga umwe atuwananga mujila, kaha atulwezanga ngwenyi, ‘Kindulukenu kuli mwangana namitumu mukamulweze ngwenu, “Yehova nambe ngwenyi: ‘Uno muIsalele kamweshi Kalungako numba utume vatu vayenga nakwihula Mbale-zevuve, kalunga wakuEkelone nyi? Shikaho hakahela unasavala kaweshi kuhindukahoko, mwomwo naufwa.’”’”+
7 Mwangana avehwile ngwenyi: “Owo lunga amiwananga nakumilweza mazu awa asolokanga ngachilihi?”
8 Vakiko vamukumbulwile ngwavo: “Avwalanga uvwalo waungona+ namuhya wachilambu mumbunda yenyi.”+ Mwangana ambile ngwenyi: “Owo hiElija wakuChishivi.”
9 Jino mwangana atumine kapitau kalizavu lyamaswalale 50 ayenga hamwe namaswalale jenyi 50 kuli Elija. Omu kapitau ayile kuli Elija, amuwanyine natwame helu lyapili. Ambile kuli ikiye ngwenyi: “Ove mutu waKalunga wamuchano,+ mwangana nambe ngwenyi, ‘Suluka oho hapili.’”
10 Oloze Elija akumbulwile uze kapitau kalizavu lyamaswalale 50 ngwenyi: “Kachi nge ngumutu waKalunga, kaha mwilu mufume kakahya+ kakunongese namaswalale jove 50 hamwe.” Ngocho mwilu mwafumine kakahya, kaha kanongesele uze kapitau navaze maswalale jenyi 50.
11 Jino mwangana atumine kapitau weka walizavu lyamaswalale 50 ayenga hamwe namaswalale jenyi 50 kuli Elija. Omu uze kapitau ayile, akambile kuli Elija ngwenyi: “Ove mutu waKalunga wamuchano, mwangana nambe ngwenyi, ‘Suluka washi oho hapili.’”
12 Oloze Elija amukumbulwile ngwenyi: “Kachi nge ngumutu waKalunga wamuchano, kaha mwilu mufume kakahya kakunongese namaswalale jove 50 hamwe.” Ngocho mwilu mwafumine kakahya kaKalunga, kaha kanongesele uze kapitau navaze maswalale jenyi 50.
13 Jino mwangana atumine kapitau wamuchitatu walizavu lyamaswalale 50 ayenga hamwe namaswalale jenyi 50 kuli Elija. Oloze uze kapitau ayile nakufukama hamambuli enyi kumeso aElija, amulembelelele ngwenyi: “Ove mutu waKalunga wamuchano, ami navangamba jove ava 50 tutetele, kanda nautujihako.
14 Mwilu munafumu lyehi kakahya kaze kananongesa tupitau vavali namazavu avo amaswalale, oloze jino ngutetele, kanda naungujihako.”
15 Jino kangelo kaYehova alwezele Elija ngwenyi: “Yako nenyi. Kanda naumwivwa womako.” Ngocho Elija akatukile nakuya nauze kapitau kuli mwangana.
16 Omu ahetele kuze, Elija ambile kuli mwangana ngwenyi, “Yehova nambe ngwenyi: ‘Uno muIsalele+ kamweshi Kalungako numba utume vatu vayenga nakwihula Mbale-zevuve, kalunga wakuEkelone+ nyi? Ika wachinanga kwihula Kalunga wamuchano? Shikaho hakahela unasavala kaweshi kuhindukahoko, mwomwo naufwa.’”
17 Ngocho Ahajiya afwile nge muze Yehova alwezele Elija. Hakuwana nge Ahajiya kapwile namwana walungako, Yeholame*+ aswanyine hawangana. Yeholame aputukile kuyula mumwaka wamuchivali wachiyulo chaYeholame+ mwanaYehoshafwate mwangana wavaYuta.
18 Mujimbu wosena waAhajiya+ wavyuma alingile vausoneka mumukanda wamijimbu yavamyangana javaIsalele.
