Vamyangana 2 10:1-36
10 Ahave+ apwile navana vamalunga 70. Ngocho Yehu asonekele mikanda, kaha ayitumine kuSamaliya kuli vamyata vamuYezelele, kuli vakulwane,+ navaze valaminenga vana vaAhave,* ngwenyi:
2 “Vana vamwata wenu vali lyehi mumavoko enu, namatemba ajita, natuvalu, nanganda yakujingulwisa kembwe, navitwa vyajita. Ngocho omu nayiheta eyi mikanda kuli enu,
3 musakule mwana umwe wamwata wenu uze munamono ngwenu wamwenemwene, wakwoloka mangana mumuhake halitanda lyaise. Kaha mulwile vaze vakuzuvo yamwata wenu.”
4 Oloze vakiko vevwile woma, kaha valyambile ngwavo: “Kachi nge vamyangana vavali vanahono kwimana kumeso enyi,+ nyi etu natuhasa kwimana kumeso enyi tahi?”
5 Jino kalama wakuzuvo yamwangana, nanguvulu wamunganda, navakulwane, navaze valaminenga vana vaAhave vatumine mazu ano kuli Yehu ngwavo: “Etu tuvangamba jove, kaha natulinga vyeshovyo nautulweza kulinga. Katweshi kutongola mutu numba umwe kupwa mwanganako. Linga mweshomwo unamono ngwove mwamwaza.”
6 Yehu avasonekelele mukanda ukwavo ngwenyi: “Kachi nge muli kusali yami nakufwila nawa kungwononoka, kaha kavatulenu mitwe yavana vamwata wenu mukeze nayo kuli ami hamene kuYezelele nalwola nge luno.”
Jino vaze vana vamwangana 70 vapwile navilolo vavalemu vamunganda vaze vavalaminenga.
7 Omu vatambwile mukanda waYehu, vakwachile vaze vana vamwangana 70+ nakuvajiha, kaha vahakile mitwe yavo mumitonga nakuyituma kuli Yehu kuYezelele.
8 Jino kuli Yehu kwejile kanganda nakumulweza ngwenyi: “Mitwe yavana vamwangana vanayinehe lyehi.” Ikiye ambile ngwenyi: “Yilumbikenu milumba yivali kuchikolo changanda, yipwenga kuze palanga nakuchimene.”
9 Omu Yehu alovokele munganda nachimene, emanyine kumeso avatu vosena nakuvalweza ngwenyi: “Enu kamweshi namulongako. Ami yami ngwafumbukilile mwata wami nakumujiha,+ nyi vatu kana ava iya navajihi?
10 Tachikizenu ngwenu mazu osena nahanjika Yehova hali vaze vakuzuvo yaAhave, Yehova mwawatesamo.+ Yehova natesamo lyehi vyuma ahanjikile kuhichila muli ngamba yenyi Elija.”+
11 Yehu ajihile vosena vaze vasalileho kuzuvo yaAhave kuYezelele, navilolo jaAhave vavalemu, namasepa jenyi, navapilishitu jenyi.+ Kakwayovokele mutu numba umweko.+
12 Yehu akatukile nakuya kuSamaliya. Omu apwile nakuya, ahetele kuzuvo yize tufunga vatewililenga mikoko.
13 Jino Yehu alihumanganyine navandumbwaAhajiya+ mwangana wavaYuta, kaha avehwile ngwenyi: “Yenu veya?” Vakiko vamukumbulwile ngwavo: “Yetu vandumbwaAhajiya. Tuli nakuya nakumenekela vana vamwangana, navana vanaye yamwangana.”
14 Yehu ambile ngwenyi: “Vakwatenu!” Ngocho vakwachile vaze malunga 42, kaha vavajihililile kulishima lyapwile kuze kuzuvo yakutewila mikoko. Kakwapwile mutu umwe ayovokeleko.+
15 Omu Yehu afumine kuze, aliwanyine naYehonatave+ mwanaLekave+ uze apwile nakumusesa. Omu amumenekele,* amwihwile ngwenyi: “Uno muchima wove unayi nge omu unayi muchima wami tahi?”
Yehonatave amukumbulwile ngwenyi: “Mukiko vene.”
Jino Yehu ambile ngwenyi: “Nge mukiko, kaha ngwolwele livoko lyove.”
Ngocho amwolwelele livoko lyenyi, kaha Yehu amukwachile nakumukokela mulitemba lyenyi.
16 Kaha ambile ngwenyi: “Tuyenga hamwe umone omu nangulinga vatu vaze veji kulikanganga kuli* Yehova.”+ Ngocho vayile nenyi hamwe mulitemba lyajita.
17 Omu Yehu ahetele kuSamaliya, ajihile vosena vaze vasalileho kuzuvo yaAhave muSamaliya,+ kweseka namazu ahanjikile Yehova kuli Elija.+
18 Yehu akungulwile vatu vosena nakuvalweza ngwenyi: “Ahave kalemesele chikuma Mbaleko,+ olozenyi ami nangumulemesa chikuma.
19 Shikaho ngusanyikilenu vapolofweto jaMbale vosena,+ navaka-kumulemesa vosena, navapilishitu jenyi vosena.+ Kanda nakusala mutu numba umweko mwomwo nangulumbila Mbale vimuna vakuvatula vavavulu. Weshowo mwazeneka kupwako keshi kuyoyako.” Yehu alingile chuma kanechi mangana anongese vaka-kulemesa Mbale vosena.
20 Yehu ambile nawa ngwenyi: “Vilikenu* likumbi navalikungulula vatu valemese Mbale.” Ngocho vavilikile likumbi kana.
21 Kufumaho, Yehu atumine mazu muIsalele mwosena, kaha vaka-kulemesa Mbale vejile. Kakwasalile mutu numba umweko. Vengilile muzuvo* yaMbale,+ kaha zuvo yosena yazalile to.
22 Yehu ambile kuli mukulwane uze alaminenga kapete kakutulikila uvwalo ngwenyi: “Ngunehele uvwalo wosena wavaka-kulemesa Mbale.” Ngocho amunehelelewo.
23 Jino Yehu naYehonatave+ mwanaLekave vengilile muze muzuvo yaMbale. Kaha Yehu ambile kuli vaka-kulemesa Mbale ngwenyi: “Talatalenu kanawa mumone chikupu ngwenu muno muzuvo kamweshi vaka-kulemesa Yehovako, shina vaka-kulemesa Mbale kaha.”
24 Ngocho vatu vaputukile kuhana vimuna vakuvatula, namawana akulumba. Oloze Yehu avangilile kulweza vatu jenyi 80 vemane haweluka, ambile kuli vakiko ngwenyi: “Kachi nge hali ava vatu nahachina umwe, kaha weshowo mwamwecha mwahichikisamo mwono wenyi.”
25 Omu Yehu akumishile kuhana mawana akulumba, ambile kuli vaka-kulama* nakuli tupitau ngwenyi: “Ingilenumo muvajihe. Kanda namwecha mutu umwe amichineko.”+ Ngocho vaze vaka-kulama natupitau vajihile vatu najipoko jamikwale nakuvatapwila haweluka. Kaha vengilile namukapete kamukachi kamuzuvo yaMbale.
26 Valowele jipanda jajila+ jamuzuvo yaMbale nakujocha.+
27 Vashiwile nayize panda yalilolwa yakulemesela+ Mbale, nazuvo yaMbale.+ Hachihela kana vahakileho vimbushu, kaha kuvili nakulelo.
28 Ngocho Yehu anongesele vaka-kulemesa Mbale vosena muIsalele.
29 Oloze ikiye kambilile jishili jaYelovowame mwanaNevate uze ahungumwishile navaIsalele valinge jishili kanako. Alemeselenga uze mwanangombe waulu apwile kuMbetele, nauze apwile kuNdane.+
30 Jino Yehova ambile kuli Yehu ngwenyi: “Hakuwana nge unalingi vyuma vyamwaza, vyakwoloka kumeso ami vize ngwakulwezele ngwami uvilinge kuli vaze vakuzuvo yaAhave,+ ngocho vana vove vamuvisemunwino viwana navakatwamanga halitanda lyawangana muIsalele.”+
31 Oloze Yehu kakavangijile Jishimbi jaYehova Kalunga kaIsalele namuchima wenyi wosenako.+ Kambilile jishili jaYelovowame uze ahungumwishile navaIsalele valinge jishili kanako.+
32 Hamakumbi aze Yehova aputukile kukehesa ngalila yavaIsalele chikoki chikoki. Hazayele anyemukililenga vaIsalele mungalila yavo yosena,+
33 kufuma kumututuko waYotau, kungalila yaNgileyate kuze vatwaminenga vaNgate navaLuvene, navaManase,+ nakufuma nawa kuAlowele kwakamwihi naChinema chaAlanone* swi nakuvihela vikwavo vyaNgileyate naMbashane.+
34 Mujimbu wosena waYehu wakuvuluka ngolo jenyi navyuma vyosena alingile vausoneka mumukanda wamijimbu yavamyangana javaIsalele.
35 Yehu atokele ngana mwavakakuluka jenyi, kaha vamufunjile muSamaliya. Jino mwanenyi Yehowahaze+ aswanyine hawangana.
36 Yehu ayulile vaIsalele hamyaka 28 muSamaliya.
Kwinyikila Chamwishi
^ Hepe., “valaminenga Ahave.”
^ Chipwe “amukiswile.”
^ Chipwe “umone twima nguli nayo hali.”
^ Hepe., “Jilikenu.”
^ Chipwe “mutembele.”
^ Hepe., “vaka-kulaha.”
^ Chipwe “naMwanakalwiji Alanone.”
